رۆسیا ژ هەلوەستێ نها یێ تورکیا گەلەک دلگرانە
بسپۆرەکێ کاروبارێن رۆژهەلاتا ناڤین دیار دکەت، رۆسیا ژ هەلوەستێ نها یێ تورکیا دلگرانە، چونکی تورکیا بەرێ خوە دایە رۆژئاڤا و دڤێت خوە ژ رۆسیا دوور بکەت، ئەو یەک ژی بوویە جهێ دلگرانیا بەرپرسێن رۆسیا و ژ بەر هندێ ژی هەتا نها سەرۆکێ رۆسیا یێ بەرهەڤ نینە سەرەدانا تورکیا بکەت.
فەهیم تاشتەکین بسپۆرێ کاروبارێن رۆژهەلاتا ناڤین دیار کر، سەرۆک کۆمارێ تورکیا شیا هەتا نها تا رادەیەکێ مفایێ ژ شەرێ د ناڤبەرا رۆسیا و ئۆکرانیایێ دا ببینیت، لێ نها رەوشەکا نوو هاتیە پێش و ژ بەر هندێ ژی تورکیا بەرێ خوە دا رۆژئاڤا و هەروەسا تورکیا دڤێت بلەز پەیوەندیێن خوە ل گەل وەلاتێن عەرەبی ژی باش بکەت، ل تورکیا نها بەرهەڤی بۆ سەرەدانا سەرۆکێ مسرێ دهێنە کرن، هێشتا دەمێ سەرەدانا سیسی بۆ تورکیا دیار نینە، لێ دبیت مەها هەشت یا ئەڤسالە سیسی سەرەدانا تورکیا بکەت، ئانکۆ ب کورتی نها مرۆڤ دشێت بێژیت تورکیا د سیاسەتا خوە یا دەرڤە دا گوهۆڕینێن مەزن کرینە و بێگومان ئەو یەک ژی ب دلێ رۆسیا نینە، چونکی رۆسیا وەسا دبینیت تورکیا خیانەت لێ کریە و جارەکا دی تورکیا بزاڤا هندێ دکەت کو ببیتە ئەنداما ئێکەتیا ئۆرۆپا.
ناڤهاتی ئەو یەک ژی دیار کر، تورکیا نها د قەیرانەکا مەزن یا ئابووری دایە و ئەردۆغانی دڤێت ب رێیا وەلاتێن عەرەبی رەوشا ئابووری یا تورکیا باش بکەت، نها دەست ب بزاڤەکا مەزن ژی یا کری، هەلوەستێ ئەردۆغانی ل دۆر سووریێ ژی هاتیە گوهۆڕین، چونکی ئەردۆغان ب رەنگەکێ ئاشکرا بەری بچیتە سعوودیێ بۆ رۆژنامەڤانان دیار کر دەرگەهێ تورکیا هەردەم بۆ بەشار ئەسەدی ڤەکریە و ئەو بەرهەڤن ل گەل سووریێ دەست ب قۆناغەکا نوو بکەن. ئەو یەک ژی نیشا ددەت قۆناغەکا نوو د سیاسەتا دەرڤە یا تورکیا دا دەستپێکریە، کو ب چو رەنگەکێ ب دلێ رۆسیا نینە، هندەک ژ کەسێن نێزیکی پۆتینی وەسا دبینن تورکیا و ئەردۆغان جهێ باوەریێ نینن و دڤێت رۆسیا یا پێدڤی ل دژی تورکیا بکەت.
بسپۆری کاروبارێن رۆژهەلاتا ناڤین ئەو یەک ژی دیار کریە، تورکیا نەشیا ل سووریێ و لیبیا سەرکەفتی بیت و تووشی ئاریشێن مەزن بوویە، نها تورکیا دڤێت ب رێیا دەستپێکرنا قۆناغەکا نوو خوە ژ زیانێن زێدەتر بپارێزیت، لێ ئەو یەک ژی ب ساناهی نابیت.
