رۆسیا ژ پلانەکا هەڤپشک یا ئۆکرانیایێ و ناتۆیێ یا دلگرانە
رۆژناما گاردیەن یا بریتانی د راپۆرتەکێ دا بەحسێ هندەک کریە کو مەها بۆری شاندەکێ سەربازی یێ ئۆکرانیایێ ل گەل فەرماندارێن ناتۆ کۆمبووینە و د کۆمبوونێ دا بابەتێ ئەندامەتیا ئۆکرانیایێ و هەروەسا بابەتێ هاریکاریێن سەربازی هاتینە گەنگەشەکرن و هەر دو ئالی ژی رێککەفتینە کو پتر هاریکاریا ئۆکرانیایێ بهێتە کرن، فەرماندارێن ناتۆ بریار داینە هەتا سالا ٢٠٢٤ د گەلەک بیاڤان دا هاریکاریا ئۆکرانیایێ بکەن، ب تایبەتی ژی مەشق و راهێنان ب هێزێن ئۆکرانیایێ پشکەک ژ رێککەفتنا هەر دو ئالیان و د چارچۆڤێ وێ رێککەفتنێ دا ئۆکرانیا دێ پێنگاڤ ب پێنگاڤ بیتە ئەنداما ناتۆیێ.
هەمان رۆژنامێ ئەو یەک ژی دیار کریە، بەرپرسێن رۆسیا هەر زوو هەست ب رێککەفتنا ئۆکرانیا و ناتۆیێ کرینە، ژ بەر هندێ ژی دەمەکە رۆسیا ب هەموو شیانێن خوە ئێرشی جهێن گرنگ یێن ئۆکرانیایێ دکەت و دڤێت دربێن کوژەک ل ئۆکرانیایێ بدەت دا ئۆکرانیا یا نەچار بیت دەست ژ پلانێن خوە بەردەت.
ئەو یەک د دەمەکێ دایە دیمیتری میدڤیدێڤ جێگرێ سەرۆکێ جڤاتا ئاسایشا رۆسیا ژی راگەهاند، وان بەری نها ژی هۆشداری داینە ناتۆ کو نابیت خوە نێزیکی سنۆرێن رۆسیا بکەت، ئۆکرانیا دڤێت پیلانێن ئەمریکا و ناتۆیێ ل دژی رۆسیا بجه بینیت و ژ بەر هندێ ژی نها شەڕەکێ دژوار د ناڤبەرا وان و ئۆکرانیایێ دا هەیە، هەتا رۆسیا نەگەهیتە ئارمانجێن خوە ژی دێ شەر بەردەوام بیت، مخابن سەرۆکێ ئۆکرانیا بوویە پشکەک ژ پیلانێن ناتۆ و ئەمریکا ل دژی رۆسیا، نها ژی ئەمریکا و ناتۆ ب هەموو رەنگەکێ کار دکەن دا ب رێیا درێژکرنا شەرێ نها رۆسیایێ لاواز بکەن، لێ ئەو ناگەهنە ئارمانجێن خوە، چونکی رۆسیا بۆ هەموو جیهانێ یا سەلماند کا چەند یا بهێزە و هەتا رۆسیا ل ئۆکرانیایێ نەگەهیتە ئارمانجێن خوە ژی دێ شەرێ نها بەردەوام بیت، چونکی پیلانەکا مەزن ل دژی رۆسیا هەیە و مە دڤێت وێ پیلانێ ژناڤ ببەین.
