رۆسیا کـار بۆ بهێزبوونا پێگـەهێ خـوە ل رۆژهـەلاتێ فراتێ دکـەت
چەند رۆژن هێزێن رۆسیا ل گەل هێزێن سووریا دیموکرات ل رۆژهەلاتێ فراتێ دەست ب مانۆرەکا سەربازی کرینە و چاڤدێرەکێ سیاسی ژی دیار دکەت، رۆسیا کار بۆ بهێزبوونا پێگەهێ خوە ل رۆژهەلاتێ فراتێ دکەت و ئەو یەک ژی بوویە جهێ دلگرانیا ئەمریکا و تورکیا.
ژێدەرێن میدیایی ل رۆژئاڤایێ کوردستانێ دیار دکەن، چەند رۆژن هێزێن سەربازی یێن رۆسیا ل گەل هێزێن سووریا دیموکرات پێکڤە دەست ب مانۆرەکا سەربازی ل رۆژهەلاتێ فراتێ کرینە، نها پەیوەندیێن رۆسیا ل گەل هێزێن سووریا دیموکرات و رێڤەبەریا خوەسەر د باشن و ئەو یەک ژی بوویە جهێ دلگرانیا ئەمریکا، چونکی بەری نها فەرماندارەکێ ئەمریکا دیار کربوو، رۆسیا و رژێما بەشاری پێکڤە دخوازن هێزێن ئەمریکا ل سووریێ نەمینن و ئەو یەک ژی ب چو رەنگەکێ ناهێتە قەبوول کرن.
د ڤێ دەربارێ دا زەکەریا عەفرینی چاڤدێرێ سیاسی ل رۆژئاڤایێ کوردستانێ ژی دیار دکەت، نها رەوشا سووریێ گەلەک جودایە، چونکی سووریا بەر ب گوهۆڕینێن بلەز ڤە دچیت، ل ئالیەکێ رۆسیا دڤێت هەموو هێزێن بیانی ب تایبەتی ژی هێزێن ئەمریکا و تورکیا ژ ئاخا سووریێ دەرکەڤن دا جارەکا دی رەوشا سووریێ یا ئارام بیت و ل ئالیێ دی ژی تورکیا یا بەرهەڤ نینە بێی مەرج ژ ئاخا سووریێ دەرکەڤیت و هەروەسا ئەمریکا ژی دبێژیت هەتا مەترسیا داعشێ ل سووریێ هەبیت ئەو دێ ل وێرێ مینن، چونکی داعش مەترسیەکا گەلەک مەزنە ل سەر بەرژەوەندیێن ئەمریکا، رەوشا نها ژی نیشا ددەت کو ناکۆکیێن هێزێن جیهانی ب تایبەتی ژی رۆسیا و ئەمریکا سەبارەت ب پاشەرۆژا سووریێ رۆژ ب رۆژێ پتر دژوار دبن، ژ بەر هندی ژی هەر یەک ژ ئەمریکا و رۆسیا ل گۆر بەرژەوەندیێن خوە ل سووریێ کار دکەن، نها رۆسیا ژی دڤێت گرنگیێ بدەتە کوردان، چونکی بەری نها ژی چەندین جاران بەرپرسێن رۆسیا دیار کربوون ئەو ل دژی مافێن رەوا یێن کوردان نینن، لێ دڤێت کورد خوە ژ ئەمریکا دوور بکەن، چونکی ئەمریکا چو بەرنامە بۆ پرسا کوردی ل سووریێ نینن و ئارمانجا ئەمریکا تنێ ئەوە کوردان بۆ بەرژەوەندیێن خوە بکار بینیت.
چاڤدێرێ سیاسی ئەو یەک ژی دیار کر، دڤێت کورد ل رۆژئاڤایێ کوردستانێ بشێن مفایەکا باش ژ رەوشا نها وەربگرن، چونکی مەترسیا هندێ یا هەی جارەکا دی تورکیا ئێرشی هندەک دەڤەرێن رۆژئاڤایێ کوردستانێ بکەت، هەکە کورد بشێن مفایەکا باش ژ ناکۆکیێن نها د ناڤبەرا ئەمریکا و رۆسیا دا وەربگرن دێ شێن پێگەهێ خوە بهێز کەن، چونکی دڤێت کورد ژبیر نەکەن هەکە سوباهی رەوشا سووریێ یا ئارام بیت، وی دەمی دێ رەوشەکا نوو هێتە پێش و رەنگە ئەو یەک بۆ کوردان باش نەبیت، گرنگە نها کورد ل سووریێ کار بۆ بهێزکرنا پێگەهێ خوە بکەن.
