رۆلـێ كـوردان د پێكئینانـا حوكمەتـا ئیراقـێ دا
سەردار مەجید
پێكئینانا حوكمەتا ئیراقێ د دەمەكێ نازكدا دهێتە كرن، كو دەڤەرا مە ب گەلەك گوهۆرینان دەرباز دبیت. ل دەمێ نوی، پێدڤیە كوردان رۆلەكێ كاریگەر هەبیت د پێكئینانا حوكمەتا ئیراقێ دا. ئەڤە دبیتە دەرفەتەك بۆ كوردان كو داخوازی و ماف و پشكێن خوە ب دەست بخن. لێ بۆ بدەستڤەئینانا ڤێ ئارمانجێ، پێدڤیە كورد هەمی ئێك دەنگ و ئێك هەلوەست بن. نەبوونا ئێك هەلوەستیێ، دێ بیتە ئەگەرێ كێم بوونا شیانێن كورد و دێ دەرفەتێن باش ژ دەست دەن.چەندین سالێن دەربازبووی، مە دیت كو نەهەڤگرتن و نەیەكدەنگیا كورد د ناڤبەرا لایەنێن كوردی، بوویە ئەگەرێ ژ دەستدانا گەلەك دەرفەتان. پێدڤیە لایەنێن كوردی ڤێ جارێ گەلەك ب هشیاری كار بكەن، چوونكو ئەگەر شاشیەك بهێتە كرن، دێ بهایەكێ گران بۆ ملەتێ كورد هەبیت. نەبوونا هەماهەنگی و هەڤكاریێ، دبیتە ئەگەرێ كەفتنا ماف و پشكێن كوردان و بوهایێ ڤێ نەهەڤكاریێ دێ هەمی كورد دەن، نە ب تنێ لایەنەك یان دوو لایەن.
د ناڤ رۆژەڤا پێشكێشكری بۆ پێكئینانا حوكمەتا ئیراقێ، بابەتێن وەك دابینكرنا موچان و پارچەكرنا بودجێ، دبیت ژ بابەتێن گرنگ بن. دڤێت لایەنێن كوردی هەمی ئێك هەلوەست بن و داخوازا چارەكرنا دەستپێكی و دوماهیێ یا پرسا موچەیێ خەلكێ كوردستانێ بكەن. چوونكو ئەڤە دبیتە ئەگەرێ زێدە بوونا ئاستێ ژیانێ و كێمكرنا برێژا هەژاریێ. هەروەها چارەكرنا دۆسیا نەفتێ و گازێ، كو د دەستوورێ ئیراقێ دا مافێ هەرێما كوردستانێ دیار كریە، ژ بابەتێن گرنگ و داخوازێن سەرەكییە.
هەرێما كوردستانێ ب دومایك ئینانا كێشەیێن هەلاویستی ل گەل حوكمەتا ئیراقێ، دێ كاریت هەنگاڤێن باشتر ل سەر ئاستێ ناڤدەولەتی باڤێژیت و پێوەندیێن خوە دگەل وەلاتێن جیهانێ باشتر بكەت. دڤێت لایەنێن كوردی هەلبژاردنێن داهاتی دفەرە بزانن، دەرفەتەك ژ بۆ دەستڤەئینانا هندەك ئارمانجێن نشتیمانی. دڤێت ئەڤ دەرفەتە ب باشی بهێتە بكارئینان.
رەوشا ئەڤرۆ گەلەك یا ئالۆزە، و گۆهۆرینێن مەزن دەڤەرا مە و جیهانێ پێكدئینن. دەرفەتا نوی یا پێكئینانا حوكمەتا ئیراقێ، دشێت دەرگەهەك بیت بۆ ئالیكاری و هەڤكاریەكا باشتر دناڤبەرا كوردستان و ئیراقێ دا. گرتنا دەستێ ئێك و دۆزینا چارەسەریێن گونجایی، دێ بیتە سەبەبێ ئاڤاكرنا پرێن باش دناڤبەرا هەردوو لایەنان دا.
پێدڤیە بێژین كو ئەڤ رێك و هەڤگرتنە دێ نە ب تنێ بۆ خەلكێ كوردستانێ باش بیت، بەلكو دێ بیتە سەبەبێ چێكرنا ئیراقەكا باشتر بۆ هەمی پێكهاتە و نەتەوەیێن ژیایی ل سەر ئەردێ وی. هەڤگرتن و ئێك دەنگیا كورد، دێ بیتە چەكەكێ بهێز دناڤ دەستێن نوێنەرێن كورد دا، ل دەمێ گفتوگۆیان دگەل لایەنێن دی.
