رۆلـێ ژنـا كـورد د دیرۆكـا كـوردستانـێ دا
چیمەن حسێن
خۆیایە كو ژنا كورد د دیرۆكا كوردستانێ دا رۆلەكێ بەرچاڤ و گرنگ هەبوویە كا چاوا ژیانا خۆ برێڤەبریە و كا چاوا بوویە خودان تایبەتمەندیێن خۆ، ژنا كورد جوداتر ژ ژنێن نەتەوەیێن دیتر شیایە بۆ زارۆكێن خۆ ببیتە دایك و باب ب جوانترین شێوە پەروەردە بكەت و ببیتە نموونە د جڤاكی دا، هەروەسا ژنا كورد شیایە ب بەردەوامی پشكداریێ د شۆرەشان دا بكەت و ژبۆ بدەستڤەئینانا مافێن نەتەوەیی یێن كوردستانێ و ئاخا كوردستانێ مل ب ملێ زەلامان ب دژی دوژمنان شەڕی بكەت و بەرخۆدانا وەلاتی بكەت و بێی زەلام شیایە بەرهەنگاریا كاودانێن سەختێن ژیانێ بكەت.
ژنا كورد د هەردوو شۆرەشێن ئەیلوول و گولانێ دا خزمەتكرنا پێشمەرگەی وەكی ئەركەكێ نیشتیمانی یێ پیرۆز بۆ خۆ دیتیە و شویشتن و دروینا جلكێن وان و د هەمان دەم دا ژنێن كورد مل ب ملێ زەلامان و هەلگرتنا چەكێ وان د ناڤ چیایان دا كار و خزمەت كریە، ئەڤ هەمی ئەركێن گران ل سەر ملێن ژنا كورد و ئەوێن چ جاران دەستێن خۆ دانەهێلاینە و ل سەر خزمەتا خۆ بەردەوام بوویە، سەری بۆ دوژمنان نەدانیت و شییا ل گوپیتكا پێشەنگیێ بیت. د نوكە ژی دا د شیاندایە ژن د ڤان ئەركان دا بەردەوام بیت و زارۆكێن خۆ ب سەرفەرازی ب خۆدان بكەت و گوهۆرینان د قۆناغێن ژیانێ دا ژی دا بكەت و پێشڤەچوونێ د جڤاكی دا پەیدا بكەت، ژ بەر كو ژن داهات و ئافراندنا نەتەوەیەكا ئازاد و پێشكەفتی و مرۆڤاتیێ یە.
د دیرۆكا كوردان دا گەلەك ژنێن كورد بوونە ستێرێن گەش ل ئەسمانێ كوردستانێ و بووینە نموونەیێن بەرچاڤ، خزمەت و خەبات مل ب ملێ زەلامی كرینە د وارێ چاند و تەڤگەر و پێشئێخستنا گەلێ كورد د ناڤ مللەتێن جیهانێ دا، ب درێژیا دیرۆكێ ژن بوویە ستوینا نشتیمان و خواندەنگەها گەلێ كورد، بێگومان بەردەوام د ناڤ پیشكەفتنا جڤاكێ دایە، وەكی ئەم دزانین ژنا كورد گەلەك ئاستەنگ و نەخۆشی دیتینە، جار ژ دەستێ خەلكێ و جار ژی ب دەستێ دوژمنان، لێ چ جاران دەست دا نەهێلاینە و بەردەوام قارەمانیێن بەرچاڤ كرینە ئەڤ كەسێ ژنا كورد لاواز ببینیتن ئانكو د رامانا ژیانی ناگەهیتن، و نزانیت رۆلێ ژنێ رولەكێ بنگەهی یە و بەردەوامییا ژیانێ یە.
لەورا باوەرییەك موكم ل دەڤ ژنا كورد چێبوویە كو دشێت هەمی كاران ئەنجامبدەت و ب بۆرینا سالان ئەڤ باوەرییە مەزن بوویە رابوویە ب بەرخۆدان و خەبات و داخوازكرنا مافێ خۆ و مافێ گەل و مللەتێ خۆ، هەروەسا د ئاڤاكرنا وەلاتێ كوردستانێ دا رۆلەكێ بەرچاڤ و مەزن هەبوویە، چ ژ لایێ سیاسەتێ ڤە و چ ژ لایێ خەبات و خزمەتا كوردستانێ دا، گەلەك نموونێن بەرچاڤ هەبووینە و ئەڤە نیشانن كو ژنا كورد ئەگەرێ ڤەكرنا دەرگەهێ ئازادیێ یە، هندی شیای و هێزا هەی بێ راوەستیان هاریكاریا جڤاكا كورد كرییە.
