رۆلێ رەڤەندا كورد بۆ چارەسەركرنا كێشەیێن هەرێمێ
لەیلا ئسكەندەر
ئەو دەردەسەری و كارەسات و نەهامەتیێن تاكێ كورد تووش بوویی ب درێژاهیا دیرۆكا كو كوردستان پارچەبووی ناهێنە هژمارتن و ناهیتە وەسفكرن، نەخاسمە تاكێ كورد ل دەرڤەی وەلاتی، ب دلەكێ بریندار ئەڤرۆ ژیانا خۆ دبەتە سەر و دلێ وی ل كوردستانێ یە و جەستەیێ وی ل وەلاتێن بیانیانە، گەلەك یا نەخۆشە مرۆڤ ل بهەشتەكێ بیت و خەلكێ مرۆڤی ل دۆر مرۆڤی نەبن، هەلكەفت و جەژن و بیرەوەری كەس نەبیت ل گەل مرۆڤی پشكدار ببیت، مرۆڤ وان خۆشی و ئیمتیازاتان ل وەلاتەكێ وەكو یێ كەنەدا ببینیت و خەلكی مرۆڤی بمیننە بێی بچویكترین ماف و بەهرا خۆ د ژیانێ دا، كو هەردەم ستەمكارێن هۆڤ چارەنڤیسێ نەتەوەیا مرۆڤی دەستنیشان بكەت. هەتا كو قرچەكا ئازادیێ بدەستڤەهاتی لێ ب مخابنی ڤە ئەڤرۆ قووتێ وی یێ ژێ دهێتە بڕین.
ئەڤجا ئەڤە خەمباریە ب تنێ بەس نینە كو كوردێن ل دەرڤەی وەلاتی دژین پشكداری خەلكێ خۆ ل كوردستانێ ببن، چونكو ئەم ژی تەمامكەرێن نەتەوە و ملەتێ خۆینە، هەر مە چو پێ چێببیت درییغیێ تێدا نەكەین. كانێ ئەم كوردێن دیاسپۆڕایێ مینا سامانەكێ مرۆڤینە هەر كریارەكا مفادار هەبیت بكەین كو بلۆكەكی ل دیوارێ كوردستانێ زێدە بكەین، بۆ بلند راگرتنا ناڤودەنگیا كوردستانێ، هەر كێماسیەكا هەبیت بهێتە پڕكرن ژ لایێ خۆڤە چ ب رێیا رێكخراوان بیت یانژی لایەنێن رەسمی بیت، چونكو ژیانا راستەقینە نە تنێ ئەوە مرۆڤ بۆ خۆ بتنێ بژیت، دڤێت مرۆڤاتی بۆ هەڤدو بیت، نەخاسمە ئەو وەلات بیت یێ كو مرۆڤی ئاڤ ژێ ڤەخوار بیت، مرۆڤی خوینا خۆ بۆ ئاخا وێ رێشت بیت، خوینا شەهیدێن مە نە تشتەكێ ئەرزانە كو ب هەروە بچیت، لەورا نابیت مرۆڤت دلسۆزیا خۆ و هەبوونا ب كریار دەرببریت، خەلكی ل دونیایێ تێبگەهینیت كو مافێن مللەتەكێ مەزلۆم یێن دهێنە بڕین، دوور ژ هندێ كو ئالاڤێن پەیوەندیكرنێ ل سەرانسەری جیهانێ ئەڤرۆ پێشكەفتیە و ئێدی دەنگێ مەزلۆمی دگەهیت، لێ ئەم وەكو كریار دڤێت زویتر و ب هێزتر ئەو دەنگ بگەهیت، دڤێت دەست ب دەست پەیاما ملەتێ مە یێ مەزلۆم بگەهیت.
