رۆلێ ئیرانێ د ئالوزیێن رۆژههلاتا ناڤین دا
ئیران رۆلهكێ سهرهكی د گێریت د وێ توَند و تیژی و نه ئارامییا ئهڤروَ رۆژههلاتا ناڤین ڤهگرتی. ئهگهرێ ڤی روَلێ تێكدهر و خرابكارانه نه پێگههێ ئیرانێ یێ سیاسییه یان هێزا وێ یا لهشكرییه بهلكو كارڤهدانا گرێیهكا دهرونییه د بیته ئهگهرێ ئازاردانا هزرا پرانییا سهركردێن ئیرانێ. ووژدانا وان یا ئارام نینه و ههست ب كێماسیێ دكهن بهرامبهر مللهتێ خوه، پشتی نهشیاین د شهرێ ههشت سالان دا ل گهل رژێما عێراقێ د بهرژهوهندییا خوه دا ئێكلا بكهن. ئهو ب نهچاریڤه هاتنه ژێر بارێ بریارا ئهنجومهنێ ئاسییشێ كو وی شهری ب راوستینن و رێك بكهڤن ل گهل دوژمنێ خوه یێ ژماره ئێك بێی كو سهروَكێ رژێمێ ژ ناڤ ببهن ل دووڤ وی درووشمێ وان شهر ژ بوَ درێژ دكر. دهما رژێما بهعس ژ لایێ ئهمریكا ڤه هاتیه روَخاندن و ئهو نهشیاین ب شێوهكێ راست و دورست عێراقێ ب رێڤه ببهن، ئێرانێ ئهو پاشڤهچوونا ئهمریكا ب دهلیڤه زانی كو بهێت و ب سیاسهتا توَلڤهكرنێ مایتێكرنهكا نهرهوا د كاروبارێن وهلاتێن دهڤهرێ دا بكهت. ئێران مهزههبێ شیعاتیێ ب كار دئینیت بوَ بهرفرههكرنا پێگههێ خوه ل سهرانسهری رۆژههلاتا ناڤین ب خهونا دامهزراندنا ئیمپراتوَریهكا فارسی. بێ پاكییا وان یا گههشتیه ئاستهكی كو مایتێكرنێ د كاروبارێن عێراقێ و ههرێما كوردستانێ، سوریا، لوبنان و یهمهنێ دا بكهت و ڤهفا ل ئهمریكا و وهلاتێن كهنداڤی بكهت. ئیران ئهگهرێ ئالوَزیێن عێراقێ یه ئهوژی ب وێ سیاسهتا شاش ئهوا پهیرهو دكهت ب پشتهڤانییا پێكهاتێ شیعا و بزاڤا نهچاركرنا ههردوو پێكهاتێن دی، سوونا و كوردان، كو ملكهچی ئیرانێ و شیعا ببن. ب راستی نه سوننه ژ بهر شێعا د دانن و نه مللهتێ كورد دهست ژ خهباتا و مافێن خوه بهردهت ب فشارا هیچ هێزهكێ. دووماهیك مایتێكرنا ئیرانێ بوَ كوردستانێ ئهوه دهما راوێژكارێ سیاسیێ رابهرێ شوَڕهشا ئیسلامی دژایهتییا خوه بوَ ریفراندوَم و دامهزراندنا دهولهتا كوردی دیاركری. ههر ههلویستهكێ نهرێنیێ ئیرانیا بهرامبهر كوردان شاشیهكا مهزنه ژبهر ئیران د زانیت كو سهرهرای پێلانێن ههرێمێ و هوَڤاتییا رژێمێن عێراقێ ب تایبهت بهعسیان نهشیان هیچ كارتێكرنهكا نهرێنی ل هزرا نهتهوهییا مللهتێ كورد بكهن. جارهنڤێسێ ههر پیلانهكا دژی كوردان بێته رستن دێ ههمان چارهنڤێسێ دانهرێن رێككهفتنا جهزائر بیتن، ئهوێن خیانهت ل مللهتێ كورد كرین. ژ لایهكێ دیڤه، ل دهستپێكا شوَڕهشێ، ئیرانێ درووشمێ خوه كربو پشتهڤانییا خهلكێ ستهملێكری ، لێ ئهڤروَ یێ هاریكارییا دوروندهترین رژێما ڤی سهردهمی دكهن، كو رژێما سووریا یه. ئهڤ درێژكرنا شهرێ سووریێ و وێرانكرنا ب سهرێ وان هاتی د زڤریتن بوَ مایتێكرنا ئیرانێ د قهیرانا سووریا دا. بارێ لوبنانێ ژ دهستێوهردانا ئێرانێ ژ یێ ههر وهلاتهكێ دی گرانتره ئهوژی ب رێكا حزب الله كو ب فهرمانێن ئیرانێ كار دكهت. نموونهكی زیندیی مایتێكرنا ئیرانێ و حزب الله ههلبژارتنا سهروَكێ لوبنانێ یه كو ئهڤه سال و نیڤه گیرو بووی. ل دووڤ سیستهمێ لوبنانێ، مافێ مارونیانه سهروَكی دهستنیشان بكهن و پاشی ل پهرلهمانی بهێته پهسهندكرن، لێ حزب الله یا بوویه ئاستهنگ تاكو پالێوراوهك بیتن ل دووڤ ئێجهندا وان كار بكهت. حزب الله ب پشتهڤانییا ئیرانێ وهك دهولهت د ناڤا دهولهتا لوبنانێ دا سهرهدهریێ دكهت. ههر بریارهكا ژ لایێ حوكمهتێڤه بێته دان و نه گونجیت ل گهل هزر و بیرێن وان ئهو پهنایێ بوَ هێزێ دبهن بوَ ژناڤبرنا وێ بریارێ. ل یهمهنێ ئیرانێ دهستهكێ درێژ یێ ههی بوَ درێژهپێدانا شهرێ نافخوهیی ب پشتهڤانیا حوسیا و هێزێن سهروَكێ یهمهنێ یێ بهرێ. ئهڤ كارێن ئیرانێ هندهك وهلاتێن سوونه مهزههب پالدان بوَ پێكئینانا بهرهیهكێ ههڤدژ و پهیدابوونا دوجهمسهرییا ههرێمی كو دێ دهڤهرێ بهر ب وێرانییێ ڤه بهت. زێدهگاڤیێن ئیرانێ یێن گههشتینه وی رادهی كو بزاڤێ د كهت ههڤڕكییا هێزێن ئهمریكا بكهت ل كهنداڤی و دهریا عهرهبی چ ب دهستهسهركرنا پاپورورهكا لهشكری ئهمریكی و ژمارهكا سهربازێن دهریایی ب بههانا بهزاندنا سنوورێن ئاڤا وان یانژی ب سیخوَریكرنێ ل سهر هێزێن ئهمریكا یێن دهریایی ب رێكا فروَكێن بێ فروَكهڤان. بێ باوهریا ئهمریكا ب ئیرانێ هاندایه كو ئاگههدارییا هاوهلاتیێن خوه بكهت سهرهدانا ئیرانێ نهكهن. راسته رهخنه تێته كرن كو رێڤهبهریا ئهمریكا ب نهرمی سهرهدهریێ ل گهل ئیرانێ دكهت لێ پێشبینی تێته كرن كو پشتی ههلبژارتنێن ڤێ سالێ یێن سهروَكاتییا ئهمریكا ئهو نهرمی نه مینیت.
