رۆلێ خرابێ هنده‌ك كه‌نالان بۆ روودانێن ئه‌ڤرۆ
راگه‌هاندنێ رۆله‌كێ زۆرێ گرنگ هه‌يه د هه‌مي روودانانداچ ب باشي يان خرابي هه‌ر وه‌كي دبێژن شيره‌كێ دوسه‌ره يان دێ سه‌رێ دوژمنێ خوه بڕيت يانژي سه‌رێ خودانێ خوه.
به‌لێ مخابن ئه‌ڤرۆ ئه‌م يێ دبينين كو گه‌له‌ك كه‌نالێن مه يێن راگه‌هاندنێ ل شوونا هندێ كو رۆلێ خوه يێن نيشتمانپه‌روه‌ري بگێرن د هۆشياركرنا گه‌لێ كوردستانێ دا، بۆ رووب رووبوونا هێرشێن داعشێ ل سه‌ر ملله‌تێ مه و پتر خورتكرنا هزرا نه‌ته‌واتي و پشته‌ڤانيكرنا هێزێن پێشمه‌رگه‌ي و پاراستنا ئێكرێزيا نيشتماني د ڤان روودانان دا، و ل جهێ هندێ ڤي رۆلي بگێرن رابۆينه ژبۆ به‌رژه‌وه‌نديێن ته‌سكێن كه‌ساتي و پارتاتي و بۆ (موزايه‌ده‌كرنا) سياسي رابۆينه ب رۆلێ خرابێ خوه بۆ هاندانا خه‌لكه‌كي دژي حوكمه‌تا هه‌رێمێ و بريارێن وێ و ب تايبه‌تي گێرانا رۆلێ خرابێ خوه د خۆنيشاندانێن خه‌لكي دا ل ده‌ڤه‌رێن پارێزگه‌ها سلێمانيێ ژبه‌ر زێده‌كرنا بهايێ (پانزينێ).
يا دياره هه‌ر وه‌كي مه‌دياركري كو مه‌ره‌ما ڤان هنده‌ك كه‌نالێن (تي ڤي) چه‌ند د خراب بوون و ب مخابنيڤه دبێژم ئه‌ڤ كه‌ناله ببوونه ئه‌گه‌رێن هندێ كو پتر خه‌لكێ مه ب ڤان خوه‌نيشادانان راببن و ئه‌گه‌رێ ئازراندنا هه‌ست و سۆزا خه‌لكه‌كي ل بن ناڤێ راگه‌هاندنا ئازاد، به‌لێ دياره يان تێنه‌گه‌هشينه و يانژي خوه تێنه دگه‌هاندن كو ئه‌ڤ كارێ ئه‌و دكه‌ن خرابي و زيانا وێ چه‌نده، له‌ورا ئه‌ڤ كه‌ناله بوونه جهێ گومانێ كو ده‌سته‌كێ نه‌په‌ني ل پشت دايه، چنكو ده‌م ده‌مێ وێ چه‌ندێ نه‌بوو كو ب وي ره‌نگي وان خۆنيشادانان ب وي ره‌نگي بۆ رايا ناڤخوه‌يي و ده‌رڤه بده‌نه دياركرن د ده‌مه‌كي د اكو كوردستان ل بن مه‌زنترين هێرشێن دوژمنان دايه و رۆژانه شه‌هيد و بريندارێن پێشمه‌رگه هاتنه د ناڤ مالێن ملله‌تێ مه دا و هه‌ر چو نه‌با بلا رێز ل هه‌ست و ئازارێن ملله‌تێ خوه كربان و بلا زانيبان كا ملله‌تێ وان د چ كاودان دا دبۆريت و چ پێدڤيه ل سه‌ر وان بكه‌ن بۆ خۆراگري و به‌ره‌ڤانيكرنا كوردستانێ نه‌ك ئازراندن و پالدانا خه‌لكي و به‌لاڤكرنا وان كريارا دژي حوكمه‌تا هه‌رێمێ.
له‌ورا ژلايه‌كي ڤه ئه‌م داخوازێ ژ وان كه‌نالێن راگه‌هاندنێ دكه‌ين كو چه‌نده‌كێ هه‌ستێ وان ژي يێ نه‌ته‌وايه‌تي بلڤيت به‌رامبه‌ر دۆزا ملله‌تێ وان و ژلايه‌كێ دي ڤه ژي داخوازێ ژ حوكمه‌تا هه‌رێمێ دكه‌ين د ڤان كاودانان دا و ژبه‌ر رۆلێ خرابێ وان و ب به‌هانا ميديا ئازاد كو زۆر كارتێكرنا وا ن راگه‌هاندنا خرابتره ژ مفايێ وان و نه‌هێلن ب ڤي شێوه‌ي كاربكه‌ن و دخوازين ده‌رگه‌هێن وانژي بهێنه گرتن و نابيت حوكمه‌تا هه‌رێمێ ده‌ليڤێ بده‌ته وان كه‌نالان كو زيان و خرابيا وان پتر بيت بۆ ملله‌تي و بلا به‌رژه‌وه‌نديا بلندا گه‌لێ كوردستانێ ل سه‌ر هه‌مي به‌رژه‌وه‌نديێن حزبي وكه‌سايه‌تي بن و بلا به‌س بيت وهه‌تا كه‌نگي ملله‌تێ مه ببيته قوربانيێ ڤان جۆره كاران؟.
