رۆلێ قانوونێ ل هەمبەر تاوانێن دژی ژنان یێ لاوازە
هەولێر، قائید میرۆ:
چالاكڤانەكا بیاڤێ ژنان دیار كر كو هێشتا عەشیرەتگەری دەستهەلاتدارە دناڤا جڤاكی دا و قانوون وەك پێدڤی رۆلێ خوە نابینیت بۆ كێمكرنا تاوانان و توندۆتیژیێ هەمبەری ژنان و گۆت: حوكمەت بەرپرسیارە ژ وان تاوانێن ل هەمبەری ژنان دهێنە كرن.
بەهرە حەمەڕەش، چالاكڤان د بیاڤێ ژنان دا بۆ رۆژناما ئەڤرۆ دیار كر،دەستپێكا ئەنجامدانا هەر تاوانەكێ و بكارئینانا توندۆتیژیێ دەوروبەر هاریكارن، خابن ئێك كەس نابیتە قوربانی هەر روویدانەكا پەیدا دبیت، دەمێ ژنەك دهێتە كوشتن بەری هینگی كەسایەتیا ژنێ دهێتە شكاندن و كوشتن و گۆت: (ئەڤە ژی بۆ ڤێ چەندێ ڤەدگەڕیت ئەم جڤاكەكێ پاشكەفتینە و گۆت گۆتك زۆرن، چونكی ژلایێ ژینگەها دەوروبەرێن بكوژی دهێتە هاندان بۆ ئەنجامدانا تاوانێ).
چالاكڤانا ژنان دا زانین كو كلتوورەك دناڤا جڤاكێ كوردی دا هەیە ئەو ژی سەرۆك خێزانە پێناسا سەرۆك خێزانی وەسا دهێتە كرن كو هەكە كەسەك ببیتە سەرۆكێ خێزانەكێ ئیدی ب حەزا خوە دێ رەفتارێ كەت و هەر تشتەكێ بڤێت دێ ئەنجام دەت، لێ بەرۆڤاژی سەرۆكاتیا خێزانێ بەرپرسیاریە نەك ب حەزا خو رەفتاران بكەن و گۆت: بەری ئەنجامدانا تاوانێن كوشتنا ژنان زەلام دهێتە بەرهەڤكرن).
بەهرەیێ ئەو چەندە ژی دیار كر كو ژلایێ سیاسی ڤە رەوشەكا ئالۆز ل هەرێما كوردستانێ هەیە و خرابیا رەوشا سیاسی كارتێكرن ل سەر دەروونێ وەلاتیان پەیدا كریە، هەروەسا دەزگەهێن راگەهاندنێ و سۆشیال میدیا ژی رۆلەكێ خراب دبینن و گۆت: (نزانم حوكمەت و وەزارەتا رەوشنبیری ئاگەهداری رەوشا میدیایێ نە یان ژی ئاگەهدار نینن ئەڤا دهێتە رێڤەبرن راستەوخۆ كاریگەری ل سەر جڤاكی پەیدا كریە، راگەهاندن و سۆشیال میدیا پالنەرن كو خەلك توشی واس واسێ و قەلەقێ ببیت).
چالاكڤنا ژنان د بەردەوامیا ئاخفتنێن خۆدا گۆت: (مخابن تاوانێن دهێنە ئەنجامدان پلا ئێكێ ژن دبیتە قوربانی و پلا دویێ زارۆك، خالا ژ هەموویێ گرنگتر حوكمەت بەرپرسیارە ژ وان تاوانێن دهێنە ئەنجامدان، چونكی ل جهێ قانوونێ عەشیرەت یا رۆلی دبینیت بۆ ئێكلاكرنا ئاریشەیان، ژبەركو زۆر ئاسانكاری بۆ تاوانباران دهێتە كرن).
