رۆمانا كوردى و فیستیڤالا سینهمایا نێڤدهولهتى ل دهۆكێ
راسته دیرۆكا رۆمانێ وهك داستانا برژوازى یا نوو، دهێته ناسین، گهلهك ژ دیرۆكا سینهمایێ درێژتره، لێ پشتى ئامیرێ سینهمایێ ل سهر دهستێ ههر دو برایان (لویس لۆمیر) ل سالا 1895 هاتییه ئافراندن، ڤان ههر دو هونهرێن ههڤچهرخ، مینا ئاسنى و مهغناتیسى خوه لێك دا و رۆژ بۆ رۆژێ گههشتنه ئێك و پهیوهندیا وان ب هێزتر لێ هات و سالانه گهلهك رۆمانێن ناڤدار ل سهرانسهرى جیهانێ دبنه فلمێن ناڤدار، یان هزرێ ژێ وهردگرن (اقتباس)ێ و خهلاتێن جیهانى ب دهستڤه دئینن. ئهڤه ژى دزڤڕیته پێشكهفتنا سازیێن هونهرى و ئهدهبى ل وان وهلاتێن پێشكهفتى و رهواجا بازارێ ههردو هونهران كو سالانه، دهولهت سهرێ زهگینیا رهوشهنبیرییا ههر دو هونهران ل وان وهلاتان، داهاتهكێ باش پێڤه دهێت. ئهڤه سالا چارێ یه سهرهرایى ههموو كێم و كاسیان و سستی یا رهوشهنبیریا سینهمایێ ل باژێرێ دهۆكێ، وهك نهریتهك سالانه فیستیڤالا نێڤدهولهتى یا سینهمایێ ل ڤى باژێرێ ب هاریكاریا حكوومهتا ههرێما كوردستانێ دهێته كرن، ئهڤه ژى جهێ شانازیا مه ههموویانه. ئهوا من دڤێت ل ڤێ نڤیسارێ زێده بكهم، د ڤان چار سالان دا داخوازنامه بۆ پڕانیا جهێن پهیوهندیدار یێن دهرڤهى وهلاتى و ناڤخوهیى دهێنه هنارتن، لێ ههتا نها وهك ئهز دزانم، ئهو داخوازنامه بۆ تێكست نڤیس (رۆمان- چیرۆك) نههاتینه هنارتن كو ب فهرمى پشكداریێ د فیستیڤالێ دا بكهن. تنێ پشكداربوونا وان ژى وهك ههر وهلاتیهكى دمینت ژ دهڤ خوه دهستپێشخهریێ بكهن و پشكدار ببن. ژ من ڤه، ههكه ب فهرمى داخوازیا رۆماننڤیس و چیرۆكنڤیسێن كوردستانێ، تایبهت دهۆكێ هاتبا كرن، دا پهیوهندى ل ناڤبهرا سینهماكاران و رۆماننڤیسان ب هێزتر بكهڤیت، تایبهت د دهمێ دانوستاندن و وۆركشۆپان دا كو رێك بهێته خوهشكرن مفا ژ تێكستێن رۆمانێن كوردى ژى بهێته وهرگرتن، چ ب رێكا تێكستى و دانانا سیناریۆیان یان ژێوهرگرتنێ (اقتباس)ێ. ههلبهت هینگێ رۆمانا كوردى ژى دا پێش كهڤیت، دهمێ ل هۆلێن سهرانسهرى جیهانێ ئهو فلمێن مفا ژێ وهرگرتى دهێنه نیشادان و فلمێ كوردى ژى دا سهنگهكێ خۆمالى و جیاواز ههبیت. هیڤیا مه ئهوه ل فیستیڤالێن بهێت ئهڤ دهستپێشخهریه بهێته كرن و ههڤكارى د ناڤبهرا سازیێن ئهدهبى و سینهمایێ دا بهێته ڤهكرن و رۆماننڤیسێن كوردستانێ ژى فهرمى پشكداریێ د فیستیڤالێ دا بكهن، دا كو ئهو دووركهتنا ل ناڤبهرا ئهدهبى و هونهرێ سینهمایێ ل كوردستانێ ژى خۆرت ببیت، مینا ل وهلاتێن پێشكهڤتى خۆرت و ههردو ئالى د خزمهتا نهتهوهیا خوه دا قازانجێ ژ هونهرێ ههڤدو ببینن.
