رۆژانە پتری 9 هزار تەكسیان ل سەنتەرێ پارێزگەها دهۆكێ كاردكەن
دلۆڤان ئاكرەیی
سەرۆكێ ئێكەتیا سەندیكا كرێكارێن كوردستانێ لقێ دهۆك راگەهاند، حوكمەتا هەرێما كوردستانێ بریار ب ڤەكرنا رێڤەبەریەكا تایبەت بۆ بیمەیا تەندروستی دایە و د نوكەدا ژی ئەو پروژە د قوناغا دەستپێكیدایە و كار بۆ ڤەكرنا وێ دهێتە كرن و گۆت: نوكە ١١٥ هزار كرێكار ل سنورێ پارێزگەها دهوكێ كار دكەن كۆ ١٥ هزار ژ وان كرێكارێن ئاوارەنە و ب تنێ ٢٠٪ ژ ڤان كرێكاران د بیمەكری و دابینكرینە و ئەندامێن سەندیكا كرێكارانە.
وەلات ئەمین ئوسمان سەروكێ ئێكەتییا سەندیكا كرێكارێن كوردستانێ لقێ دهۆك بۆ رۆژنامەیا ئەڤرۆ دیار كر، ل هەر سێ سالێن بووری ل سنوورێ پارێزگەها دهۆكێ، ١٩ كرێكاران گیانێ خۆ ل دەستدایە بەلێ خوشبەختانە د سالا بوریدا ژمارا گیان دەستدانا كرێكاران ژبەر پێگریكرنا كرێكاران ب رێنمایین خۆ پاراستنێ كێمتر بوویە ل سالێن بووری و گۆت: ل سنورێ پارێزگەها دهوكێ هەر كرێكارەكێ تەمەنێ وی گەهشتبیتە ٥٥ سالان و ٢٠ سالێن خزمەتێ هەبن دێ هێتە خانەنشینكرن، د نوكەدا نێزیكی ٣٠٠ كرێكار ب رێكا یاسایی ل سنورێ پارێزگەها دهۆكێ هاتینە خانەنشینكرن.
سەروكێ ئێكەتییا سەندیكا كرێكاران زێدەتر گوت: كابینەیا نەهێ یا حوكمەتا هەرێما كوردستانێ گرنگیەكا زور ب كرێكارێن ناڤخۆ و بەرهەمێ ناڤخۆ دایە، نەخاسمە پشتی بریاردای ژمارەیا كرێكارێن ناڤخۆ ل هەر پروژەیەكی كار ل سەر بهێتە كرن ژ ٧٥٪ كێمتر نەبیت.
ل دور رێكخستنا كارێ تەكسی و پاسان گۆت: ل سنورێ پارێزگەها دهوكێ نێزیكی ١٧٠٠٠ تەكسی هەنە كۆ ٩٠٠٠ ژ وان دناڤا سەنتەرێ دهوكێدا كار دكەن و ئەڤ ژمارا زورا تەكسییان زورن، ل دووڤ ستانداردێن جیهانێ نینە، لەوما كار تێتە كرن هند كۆمپانی ب كارێ رێكخستنا تەكسی و پاسان راببن، د پلانا واندا هەیە كارێ كرێكاران ژی بهێتە رێكخستن و كرێكار ب نووبە بچنە سەر كاری دا كۆ هەمی مفاداربن.
سەروكێ ئێكەتییا سەندیكا كرێكاران لقێ دهۆك سەبارەت كرێیا كرێكاران گۆت: ل دووڤ بریارێن حوكمەتێ ل دەمێ ٨ دەمژمێرێن كاریدا كێمترین كرێ بۆ كرێكاری پێتڤییە ژ ٢٥٠٠ دیناران كێمتر نەبیت و پشتی ڤی دەمی پێتڤییە بۆ هەر دەمژمێرەكی ٥٠٠٠ هزار دینار بهێنە دیاركرن و ل دور مووچەیێ مەهانە ژی ئاشكرا كر، كێمترین مووچە پێتڤییە ژ ٣٥٠ هزار دیناران كێمتر نەبیت.
خویاژی كر، دێ كار بۆ نەخوشخانەیەكا تایبەت بۆ كرێكاران كەین و ب نرخەكێ كێم كرێكار بهێتە چارەسەركرن و كاری بۆ زێدەكرنا رێژا پروژەیان ل پارێزگەهێ كەین كو ببیتە ئامرازەك بۆ پەیدا بوونا دەرفەتێن كاری و دێ كاری بۆ سیستەمكرنا ژمارا كرێكاران ل سالا ٢٠٢٥ كەین و گۆت: داخواز ژ كرێكاران دكەین بێ گرێبەست كار نەكەن، هەتا ئەگەر بۆ دەمژمێرەكی بیت، دا كۆ ل پاشەرۆژێ بهێنە خانەنشینكرن مینا كەرتێ حكومی.
