رۆژانە چار تەنێن گیایێ بهاری دهێنە د بازارێ دهۆكێ دا
ئەڤرۆ، هەرهین محەمەد:
د وەرزی بهارێ دا گەلەك جۆرێن گیایی شوین دبن و ژ وان گیایان ژی گەلەك كەس مفادار دبن و وەكو بازرگانیەكا بچووك چێدبیت و ب خێرا وان گیایان لڤینەكا باش دكەڤیتە بازاری و ل دور ڤی بابەتی ژی شارەزایەكێ ئابوری دبێژیت: سالانە گەلەگ گیایێن خوارنێ و دەرمانان ژ دەڤەرێن چیایی د هاتە د بازارێ دهۆكێ دا و ژبەر مەسەلێن ئەمنی كارتێكرنا خوە ب گشتی ل بازاری كریە.
عەگید مەجید، فرۆشیارە ل بنداڤا فێقی و زەرزەواتی دبێژیت: دەمێ گیایێ بهارێ دهێتە د بازاری دا قەرەبالغەكا مەزن چێدبیت د بازاری دا و لڤینەكا مەزن دكەڤیتە بازاری و سالێن بەری نوكە خەلكی گەلەك گیایێ بهارێ د كڕی و دكرە د بەفرگران دا ژ بۆ وەرزێ زڤستانێ، بەلێ نوكە ژ بەر بارێ ئابووری و رەوشا دارایی خەلك ب تنێ دكڕن دا بخۆن و رێژەكا كێم دكرن و رادكەن ژ بۆ وەرزێن دی و ئەڤ جورێن گیایی ل هەموو چول و چیایێن كوردستانێ یێ هەی، بەلێ ئەڤ سالە ژ ئالیێ شێلادزێ ڤە گیا گەلەك یێ كێمە.
هەرل هەمان بازار فرۆشیارەكێ دی ب ناڤێ فەرهاد محەمەد ددەتە دیاركرن، ل دەستپێكا هاتنا گیایێ بهارێ د بازاری دا بهایێ وان یێ گرانە و هەتا كو بهار بەر ب دووماهیێ دچیت، هێدی هێدی ئەرزان دبیت و هەتا وی دەمی خەلك ژ نو بۆ خوە بۆ راكرنێ ژ بۆ وەرزەكێ دی دهەلگرن، چونكو ئەرزان دبیت ب تایبەتی كاری و نوكە كەنگر یێن پاقژكری كیلویا وان ب شەش هزارایە و یێن نەپاقژكری ب سێ هزاریە و ئەو ب خوە نە ژ خارنێن سەرەكی یە پێدڤی یە مرۆڤ بخۆت، بەلێ چونكو ب تنێ ل وەرزێ بهارێ ئەڤ گیایە دەردكەڤن و خەلكێ مەژی حەزدكەن ب تنێ تاقی كەن، ب تنێ هەكە بۆ جارەكێ ژی بیت و پتریا ڤان گیایا دەرمانن بۆ مرۆڤی و مفایەكێ مەزن هەیە و هەروەسان گەلەك گیا ژی ب قیمەتن لنك خەلكی وەكو كاری و كەنگر تەكەزێ ل سەر دكەن ب هەرچ حالەكێ هەبیت دڤێت هندەكان ب هەلگرن ژ بۆ وەرزێ زڤستانێ.
بەیار ئەحمەد، وەكو شارەزا د وارێ ئابووری دا دەتە خۆیاكرن كو گژ و گیایێ بهاری ژلایێ ئابوری ڤە مفایەكێ مەزن دگەهینتە خەلكی د مەسەلێن بازرگانی دا و هەر چەندە ئەڤ سالە جودابوو ژ سالێن بوری ژبەر مەسەلێن ئەمنی و سنوران ب تایبەت ل دەڤەرێن چیایی و ڤێ چەندێ كارتێكرنا خوە هەبوو ل سەر بازاری و بۆ ئەگەرێ گرانبوونا گیایی و د بازاری دا و هەر سال ب رەنگەكێ بەرفرەه گیایێ بهارێ د هاتە دبازاری دا و خەلكی گەلەك مفا ژێ دیت و هەتا گەهشتیە وی رادەی ب داهاتێ گیایی گەنجان بۆ خوە ترۆمبێل و پارچێن ئەردی كرینە و ئەڤە باشارین جورێ بازرگانیێ بۆ دهاتەكرن و ژلایەكێ دیژی ڤە گەلەك جورێن دەرمانان ژی ژڤان گیایان هاتینە چێكرن و بووینە جهێ مفای بۆ خەلكی و هنارتینە ژدەرڤەی وەلاتی ژی.
