رۆژان سلێڤانه‌یی: بیمه‌یا ساخله‌میێ دێ بۆ وه‌لاتیان هێته چێكرن
هه‌ولێر، قائید میرۆ
ئه‌ندامه‌كا لیژنا ساخله‌میێ ل په‌رله‌مانێ كوردستانێ ئاشكراكر، پڕۆژێ چێكرنا بیما ساخله‌میێ بۆ وه‌لاتیان گه‌هشتیه قۆناغێن دووماهیێ و بڕیاره پێشكێشی په‌رله‌مانێ كوردستانێ بهێته‌كرن و دبێژیت: چێكرنا بیما دێ كار ئاسانیێن زۆر بۆ وه‌لاتیان كه‌ت د ده‌مێ وه‌رگرتنا چاره‌سه‌ریان و مینا وه‌لاتێن پێشكه‌فتی دێ ب پاره‌یه‌كێ كێم پشكنین و چاره‌سه‌ری بۆ نه‌ساخان بهێنه‌كرن.
رۆژان سلێڤانه‌یی، ئه‌نداما لیژنا ساخله‌میێ بۆ رۆژناما ئه‌ڤرۆ دیار كر “كارناما كابینا نه‌هێ یا حوكمه‌تا هه‌رێما كوردستانێ هاتبوو دێ ده‌زگه‌هه‌كێ نیشتیمانی یێ ده‌رمان و خوارنێ هێته دامه‌زراندن، دامه‌زراندنا ده‌زگه‌هه‌كێ هوسا گرنگیا خۆ بۆ هه‌رێما كوردستانێ هه‌یه، ئه‌م ب رژدی دگه‌ل وه‌زاره‌تا ساخله‌میێ دانوستانان دكه‌ین، هه‌تا پڕۆژێ دامه‌زراندنا ده‌زگه‌هێ سه‌لامه‌تیا ده‌رمان و خوارنێ پێشكه‌شی حوكمه‌تێ بكه‌ن، نوكه ژلایێ وه‌زاره‌تا ساخله‌میێ پڕۆژه دهێته به‌رهه‌ڤكرن و پشتی به‌رهه‌ڤكرن دێ پێشكێشی په‌رله‌مانی هێته‌كرن
زێده‌تر گۆت: بێگومان ده‌زگه‌هه‌ك بهێته دامه‌زراندن دێ كاریگه‌ری لسه‌ر ره‌وشا ده‌رمان و خوارنێ هه‌بیت، چونكه ده‌رمان و خوارن دو بابه‌تێن هه‌ره گرنگن و گرێدایی ژیانا خه‌لكێ كوردستانێ نه، كۆنتڕۆلكرنا كه‌رتێ ده‌رمان و خوارنێ ئاسایشا ئه‌ڤی وه‌لاتیه و دێ دوماهیێ ب چه‌ندین ئاریشه‌یان ئینیت د كه‌رتێ ده‌رمان و خوارنێ دا، رۆژانه وه‌لاتی ده‌رمان و خوارنا بكار دئینیت و هه‌تا راده‌یه‌كێ زۆر دێ چاره‌سه‌ریا ئه‌ڤێ پرسێ هێته‌كرن، بتایبه‌تی ده‌رمان و خوارن ب رێكێن زانستی دێ هێنه هه‌لگرتن و دیارده‌یا بسه‌رڤه چوون و قه‌چاخیا ئینانا ده‌رمان و خوارنێ دێ هێته چاره‌سه‌ركرن.
رۆژان سلێڤانه‌یی ئاماژه كره وێ چه‌ندێ ژی “چاكسازی د كه‌رتێ ساخله‌می دا یا به‌رده‌وامه، په‌رله‌مانێ كوردستانێ ژی بزاڤان دكه‌ت ب رێیا ده‌ركرنا چه‌ندین قانوونان چاكسازیێ د كه‌رتێ ساخله‌می دا بكه‌ت، ئێك ژ وان كارێن نوكه په‌رله‌مان و حوكمه‌ت كار لسه‌ر دكه‌ن ده‌ركرنا بیمه‌یا ساخله‌میێ یه، نوكه پڕۆژێ بیما ساخله‌می گه‌هشتیه قۆناغێن دووماهیێ و دێ گه‌هیته په‌رله‌مانی بۆ په‌سه‌ندكرنێ”.
زێده‌تر دبێژیت: پڕۆژێ بیما ساخله‌می بارگرانیا دارایی تێدایه، له‌وڕا ژلایێ حوكمه‌تا هه‌رێما كوردستانێ هاتیه به‌رهه‌ڤكرن، ئه‌ز باوه‌رم پشتی په‌سه‌ندكرنێ دێ مفایه‌كێ زۆر هه‌بیت بۆ وه‌لاتیان، ژ به‌ر كو مینا وه‌لاتێن پێشكه‌فتی دێ نه‌ساخ شێت ب بهایه‌كێ گونجایی چاره‌سه‌ریێن خوه یێن پزیشكی وه‌رگریت، ئه‌ڤه ژی ده‌ستكه‌فته‌كێ مه‌زنه بۆ خه‌لكێ كوردستانێ، ژ به‌ر كو د ده‌مێ نوكه‌دا وه‌لاتی پاره‌یه‌كێ زۆر بۆ وه‌رگرتنا چاره‌سه‌ریێن نۆشداری د مه‌زێخن و بارگرانیه‌كا زۆر كه‌فتیه سه‌ر وه‌لاتیێن نه‌ساخ، ل وه‌لاتێن پێشكه‌فتی ب رێیا بیمه‌یا ساخله‌می وه‌لاتی دهێنه چاره‌سه‌ركرن و گه‌ره‌نتیا ژیانا وان هاتیه‌كرن.
