رۆژا ئالایێ كوردستانێ
سالح دۆسكی
نە تەنها پارچە قوماشە..
بیردانكە ل ئەسمانا
دا ئاخ ناڤێ خۆ ژبیر نەكەت.
سۆر:
شەهید و ئەنفالە،
پرسیارەكا ڤەكرییە،
خوینبەربوونەكا كەڤنارە،
بیرئانین و یادگارە
دا بزانین چەوا چیا هزر دكەن و
چەوا دەردۆر خۆ ل بەر
رەنیێن بەفرێ ڤەددەن..
د سۆری دا،
شەهید بێ سیبەر دمەشن
ژبەركو ئەو بوونە بیرۆكە
ژیان و باوەری وئادارە.
سپی:
باكگراوندێ ئاقلدارە،
بێدەنگییا بیرتیژە
ئاگربەستەكە دنەقەبا دو قیرییان دایە..
د سپی دا
ژیری بێ درووشمە
فێر دبیت راستەقینەییێ
كو سادە بیت
كانیكا دلێ كوردێ زەلالە.
كەسك:
خەونا ئەردییە
خەملە
هەناسەیا گوندایە
بیردانگا گولیگەنمایە
دەستكێ مەڕێ یە
كو دەستێ جۆتیاری ژبیر نەكری..
هزرا مانێ یە
بەردەوامبوونە
سەرەرای هەمی مرنێن چارگۆشە
ڤەژین و بوهارە.
زەر:
هەتاڤە
نە تەنها هێمایە
بەلكو چاڤێ زەمەنی یە
چاڤدێرییا مە دكەت
دا پشتراست بیت
ئەم ل سەر رێبازێ
بەر ب داخوازێ
دروست د چین..
پارێزەرێ باخ و رەز و چیاییە
رەهوڕیشال و دیرۆكە
خودان و بریارە..
بیست و ئێك تیشك
بیست و ئێك زوحاك هەبن
دێ بیست و ئێك چەكووچ
ژ جەرگێ چیا دەركەڤن و
بیست و ئێك ئاگر گەش بن
بیست و ئێك نەورۆز خوەش بن
و ئالا دێ ل سەرێ چیا بلند مینیت
بلند.. بلند
تێكدا كاوەنە ئەڤ وارە.
