رۆژا جیهانیا زلامان ب بێ ده‌نگی بوری
ئه‌ڤرۆ، نه‌زاد هلۆری:
ئه‌ینی یا بوری رۆژا جیهانیا زه‌لامان بوو، هه‌ر چه‌نده ل وه‌لاتێن جودایێن جیهانێ ئه‌ڤ رۆژه ب چه‌ند چالاكیان دهێته ساخكرن، به‌لێ ل هه‌رێما كوردستانێ بێده‌نگی بوری، سه‌رۆكێ رێكخراوا خانه‌یا راوێژ و رێنمایا خێزانی ژی جورێن زه‌لامان دیار دكه‌ت و دبێژیت: زه‌لامان كارتێكرنه‌كا زۆر ل سه‌ر جڤاكی و خێزانێ هه‌یه.
ئازاد جه‌لال، سه‌رۆكێ رێكخراوا خانه‌یا راوێژ و رێنمایا خێزانی بۆ رۆژناما ئه‌ڤرۆ گۆت: (زه‌لام ئێكه ژ گرنگترین پێكهاته‌یێن جڤاكی و روله‌كێ هه‌ری به‌رچاڤ دجڤاكی دا هه‌یه، له‌وا دڤێت رێز ل زه‌لامێن خودان كه‌سایه‌تی و خه‌بات بهێته‌گرتن، نوكه ل جیهانێ و كوردستانێ ژی چه‌ندان جورێن زه‌لامان په‌یدابوینه له‌وا پێدڤی یه جوداهی دناڤبه‌را وان دا بهێته‌كرن).
زێده‌تر گۆت: (ل كوردستانێ زه‌لام هه‌یه خودان رێز و بهایه و زێده‌تر ژنه‌ك لده‌ڤ وی گرنگه كو ببیته هه‌ڤژینا وا، جڤاك ب گشتی و ژن ب تایبه‌تی رێزه‌كا زۆر لێ دگرن و دخوازن هه‌ڤژینیی ل گه‌ل ئه‌نجام بده‌ن ژبه‌ركو د چاڤ و دلێ وان دا ئه‌ڤینی و ڤیان و حه‌ژێكرن زۆره، دیسان زه‌لام هه‌یه گه‌له‌ك چاڤ ڤه‌كری یه و ب هه‌موو ئافره‌تان حێبه‌تیه و هه‌موو ئومێد و هیڤێن وی دیوان و سوحبه‌تێن ژنایه، دیسان زه‌لام ژی هه‌یه دناڤبه‌را هه‌ردوان دا دژیت، هندی دهێت وه‌كو یێ ئێكێ بیت به‌لێ هنده‌ك جاران كونترولا خوه ژ ده‌ست دده‌ت و دچیته سه‌ر رێبازا زه‌لامێ دوویێ).
ناڤبری د درێژاهیا ئاخفتنێن خودا ل بارا جورێن زه‌لامان گوت ژی: (زه‌لامێن بێ سه‌ر و به‌ر و بێ به‌رنامه، هندی خێزان و هه‌ڤژینا وی دهێت كو خزمه‌تا وی بكه‌ت، به‌لێ نه خزمه‌تا وێ دیار و به‌رچاڤ دبیت، نه ژی سه‌ر و به‌رێ زه‌لام و هه‌ڤژینێ وێ دیار دبیت، ژبه‌ركو زه‌لامێ وێ ب شێوازه‌كێ روتینی دژیت، دیسان زه‌لام هه‌یه كه‌سه‌كێ ساویلكه و گێژه و وه‌سا هزر دكه نكو هه‌ڤژینا وی كرێكار و خزمه‌تكاره و ب چوو تشته‌كێ رازی نابن و ل به‌رچاڤ نیه، زه‌لام ژی هه‌یه هه‌ژاره، ئه‌ڤ جوره نه‌ك ئه‌ون كو نان نیه بخون به‌لكو زه‌لامێن بن ده‌ستن و هه‌ر كه‌س ب تایبه‌تی ژن دشێت كونترولا وی بگریت و كیڤه بڤێت و چ ژی بڤێت پێ دده‌ن كرن، بۆ وی ژی خه‌م نیه هه‌ر تشتی بكه‌ت، زه‌لام هه‌یه دلپیسه ب تایبه‌تی هه‌مبه‌ری هه‌ڤژنا خوه و د هه‌مبه‌ر دا رێكێ دده‌ت خوه كو سه‌حا ژنێن خه‌لكی و كچێن وان بكه‌ت، له‌وا ژیانێ ل هه‌ڤژینا خوه دكه‌ت دوزه‌خ هه‌تاكو بچته گه‌شت و گه‌ریانه‌كێ و بزڤریت ڤه، هه‌ر دیسان دجڤاكێ مه‌دا زه‌لامێ ره‌زیل ژی هه‌یه ئانكو هه‌ر تشت ل به‌ر ده‌ستێ وی هه‌یه و دشێت بكه‌ت، به‌لێ مرۆڤه‌كێ ره‌زیله ب تایبه‌تی هه‌مبه‌ر خێزان و هه‌ڤژینا خوه و حه‌ز ناكه‌ت چوو تشته‌كێ بۆ مالا خوه بكه‌ت ئه‌گه‌ر ب نه‌چاری نه‌بیت، دیسان زه‌لام هه‌یه بێ شانسه هندی خزمه‌تا مال و خێ.انا خوه بكه‌ت دیار و به‌رچاڤ نابیت و كه‌سه‌كێ زۆر رێنجبه‌ر و دلسوزه بۆ خێزانا خوه به‌لێ شانسێ وی چوو تشت دیار نینه، دیسان زه‌لامێ پیاوسالار ژی هه‌یه و دخوازیت بچوكترین و مه‌زنترین بریار یا وی بیت و مالا خوه وه‌كو سه‌ربازگه‌هێ لێ كریه و هه‌رده‌مێ دهێـه مال دڤێت خێزان و زارویێن وی سلاڤا سه‌ربازی بۆ بكه‌ن، ب چوو ئاوای رێ ب كه‌سێ ناده‌ت بوچوونه‌كێ بێژیت هه‌ڤژدی یا وی بیت، زه‌لام ژی هه‌یه زمان پیسه و هه‌رده‌م خێزان و هه‌ڤژین و ده‌وربه‌رێن خوه ژی ره‌زیل و رسوا دكه‌ت ب ئاخفتن و زمانێ خوه و هه‌موو كه‌س خوه ژ وی دویر دكه‌ن، زه‌لامێ ئاقل ژی دناڤ جڤاكێ مه دا هه‌یه و رێزێ دده‌ت هه‌ڤژین و كچ و زارویێن خوه و هه‌موو تاكێن جڤاكی و ئافره‌ت و كچێن خه‌لكی ئه‌ڤجا چ ل مال بیت یان ژی ل ده‌رڤه و سه‌ر كاری و هه‌موو كه‌س حه‌ز دكه‌ن ل دیوانا وی بن و زۆر كه‌سه‌كێ دلنازكه و هه‌ر تشته‌كێ دهێته دده‌ستان داب ۆ خێزانا خوه د مه‌زێخیت و ب گوره‌ی شیان ژی خزمه‌تا جڤاكێ خوه و كه‌سانێن پێدڤی دكه‌ت).
