رۆژا جیهانی یا مۆزەخانەیان ل دهۆكێ هاتە ساخكرن
شاكر ئەتروشی:
ل ژێر درۆشمێ (كەلتۆر هێمایێ هەبوونا گەلایە) رێڤەبەریا گشتی یا رەوشەنبیری و هونەری/رێڤەبەریا هونەرێ مللی و كەلتۆر، دوهی 19/5 ل دەمژمێر یازدەی سپێدێ ئاهەنگەكا كەلتۆری هونەری ل هولا مۆزەخانەیا دهۆكێ ب پشكداریا هژمارەكا دەنگبێژان گێڕا و چەند بڕگەیێن خۆش و دلڤەكەر هاتنە پێشكێشكرن.
ل دەستپێكێ بەرێز( ئەمیر عەلی) رێڤەبەرێ گشتی یێ رەوشەنبیری و هونەری ل دهۆكێ، د پەیڤەكێ دا بەحسێ گرنگیا گێڕانا ڤان چالاكیان كر و ئاماژە دا وێ چەندێ ل دووف پلانا رێڤەبەریا وان ژبلی سەنتەرێ ناڤ باژێرێ ئەو هندەك چالاكیێن خوە ل دەوروبەران ژی پێشكێش دكەن.
د سمینارا ئێكێ دا هونەرمەند و هەلبەستڤان (شەعبان سلێمان) بەحسێ چاوانیا پاراستنا سترانا فۆلكلۆری و دكیۆمەتكرنا وێ كر و د سمینارا دویێ دا هونەرمەند و دەنگبێژ (عابد دهۆكی) كو ئێك ژ دامەزرێنەرێن مۆزەخانەیا دهۆك بوو ل سالا 1998 ، بەحسێ گرنگیا پارارستن و ئەرشیفكرنا سترانێن فۆلكلۆری كر و دیاركر كو وی هەتا نوكە (18800) دەمژمێرێن سترانێن فۆلكلۆری دمالا خوە دا پاراستینە، هەروەسا (360) قاوەن و (1920) تیپ و پتری (4000) كاسێتان.
د بڕگا دووڤدا هونەرمەندێ مۆزیكژەن (بەنگین بالەبان) چەند پارچەیێن مۆزیكێ ژەنین و ل دووماهیێ ژی سترانبێژێ فۆلكلۆری (هۆشەنگ نێروەی) ل گەل كۆمەكا گەنجێن دەنگخۆش ئەو چالاكی ب گۆتنا چەند سترانان ب دووماهی ئینا و هندەك خوارنێن كوردی ژی ل هولا مۆزەخانەیێ هاتبوونە دانان و پشكدارێن وێ چالاكیێ مێڤانێن وان خوارنان بوون.
