رۆژا جیهانی یا پرتووكێ ل زاخۆ هاتە ساخكرن
ئەڤرۆ
زاخۆ، عەلی حاجی:
گروپێ وێژە یێ سەر ب رێڤەبەریا لاوان ڤە ل زاخۆ بۆ سالا دویێ ل دووڤ ئێك رۆژا جیهانی یا پرتووكێ ب پشكداریا چەندن نڤیسەر و كەسایەتیێن پارێزگەها دهۆكێ ب چەندین چالاكیان ساخكر.
بێوار ئەكرەم، رێڤەبەرێ لاوان ل زاخۆ بۆ رۆژناما ئەڤرۆ دیار كر، د سالا ئێكێ دا ئەو شیان سێ هزار پرتووكان ل زاخۆ ل سەر خواندەڤان بەلاڤ بكەن و گۆت: «ئەڤ سالە مە جوداتر ئەڤ رۆژە ساخكر، ب ڤێ هەلكەفتێ دو دیبەیت ژ لایێ دو نڤیسەرێن خودان شیان ڤە هاتنە ئەنجامدان و تێدا ب بەرفرەهی بەحسا مێژوویا نڤیسینێ و دروستكرنا پرتووكان هاتە كرن».
بێواری گۆتژی: «ئارمانجا مە یا سەرەكی ئەوە ب ڕێیا گروپی، ئەم بشێین ئاستێ خواندنا پرتووكان ل زاخۆ پێشڤە ببەین و نوكە هەتا رادەیەكێ باش ئەم یێ بەر ب كەلتۆركرنا خواندنا پرتووكێ ڤە دچین».
د. فازل عومەر، پێشكێشكارێ دیبەتەكێ بۆ ئەڤرۆ گۆت: «زاخۆ د كەڤن دا پێشەنگ بوو د خواندنا پرتووكان دا، بەلێ ل سالێن ١٩٨٠ دا خواندنا پرتووكێ بەر ب لاوازیێ ڤە چوو، بەلێ خوەش بەختانە د نوكە دا بەر ب باشتربوونێ ڤە چوویە ل زاخۆ، پێدڤیە باژێرێ زاخۆ ڤەگەریتە سەر پێشەنگیا خوە د پرتووكێ دا».
د. فازل عومەر گۆتژی: «مە د دیبەتێ دا ب زەلالی باس ل نڤیسینێ كر، كانێ چاوا پەیدابوویە، مە بەحسا قووناغێن پەیدابوونا نڤیسینێ ل جیهانێ كر، جارا ئێكێ نڤیسین د ناڤ شكەفتان دا هاتیە، ئەو ژی ب رێیا دروستكرنا نەخشەیان، كو پرانیا وان نەخشەیان ژی گیانەوەر بوون، پاشی نەخشە بۆ وێنەیان هاتینە گوهۆڕین و ل گەل بۆرینا دەمی بۆ پیتان هاتینە گوهۆڕین، دیسا مە باس ل پەیدابوونا نڤیسینێ د ناڤ كوردان ژی دا كر، ئەز ساخكرنا رۆژا جیهانی یا پرتووكێ ب گرنگ دبینم، ژبەركو د نوكە دا خواندنا پرتووكێ كێمبوویە».
د. سانیا جەبار، دیبەتەك ل دۆر گرنگیا پرتووكێ پێشكێش كر و گۆت: «پرتووك ژ نیشانێن رەوشەنبیریا گەلانە و پێدڤییە و گرنگە ژی لایەنێ دەستهەلاتدار، كو وەزارەتا رەوشەنیری یە پشتەڤانیێ ل بزاڤا چاپكرنا پرتووكان بكەت، د دیبەتێ دا مە بەحس ل هندێ كر كو چ گرنگە بۆ چاپكرنا پرتووكێ و دێ چاوا شێین پرتووكەكێ چاپ كەین، مخابن نوكە رێژەیا خواندنا پرتووكێ كێمبوویە، لەو پێدڤیە نڤیسەر بزانیت دێ چاوا خواندەڤانی بۆ پرتووكێ زێدە بكەت و پێدڤیە بزانیت ژی دێ چ زاراڤ ژی ب كارئینیت، داكو خەلك بشێت پرتووكێ بخوینیت».
ل دوماهیێ ڕێبەر كوردو گۆت: «بابەتێ مە د دیبەتێ دا بۆ هندێ بوو، كا بۆچی ئەم د خوینین، د بنەرەت دا چەند مەرەمەك ژ خواندنێ هەنە، مە د دیبەیتێ دا چەند بابەتێن گرنگ ل دۆر خواندنێ ئازراندن و مە باس ل وان وەراران كر، یێن بووینە ژێدەر بۆ نڤیسینێ،دیسا مە باس ل دروستكرنا چاپخانەیان و چاپكرنا پرتووكان كر، كو ئێك ژ گرنگترین قووناغێن پێشكەڤتنێ بوو د ژیانا مرۆڤان دا ژبەركو هەكە پەرتوك نەبایە ئەو چەرخێن مروڤ تێدا دەرباز د بوویی نوكە دا نە د بوون».
