رۆژا زمانێ دایك دەرفەتەكە ژ بۆ بەرز راگرتنا ناسنامەیا كوردی
دلڤین رەشید
زمان ب تنێ ئامرازەك نینە ژبۆ پەیوەندی كرنێ، بەلكو ئەندامەكێ گرنگ یێ كەلتوورێ هەر نەتەوەیەكی یە. زمان رەهوریشالێن مللەتانن و رۆلەكێ سەرەكی ژبۆ پاراستنا ناسنامە و كولتۆرێ هەر جڤاكەكێ هەیە، لەورا رۆژا جیهانی یا زمانێ دایكێ ل 21 شوباتێ هاتیە دەستنیشانكرن. ئەڤ رۆژە ژبۆ كوردان ژی گرنگیەكا تایبەت هەیە، چونكی ئەڤە دەهان سالە ژبۆ پاراستنا زمان و كولتۆرێن خۆ خەبات و تێكۆشینی دكەن.
ب درێژاهیا مێژوویێ زمانێ كوردی ژ ئەگەرێ سیاسەتەكا ستەمكار د هندەك وەلاتان دە رووبەروی ئاستەنگێن مەزن بوویە و بكارئینانا ڤی زمانی ل وان هاتیە قەدەغەكرن، ئەڤ چەندە ژی دبیتە ئەگەر كو لاوازی د زمانێ نفشێ نوو دا پەیدا ببیت و مەترسی ل سەر نەمانا وێ بمینیت. بەلێ د دەهان سالێن بۆری دا تا رادەیەكی پێشكەفتن ب خۆڤە دیتیە ب تایبەت ژی ل باشۆرێ كوردستانێ، ل ئیراقێ ئەڤ زمان ب فەرمی مل ب ملێ زمانێ عەرەبی ڤەیە هاتیە پەسەندكرن.
د قۆناغا ئەڤرۆ دا ئەركێ هەر تاكەكێ كوردە، ژبۆ پاراستنا زمانێ دایكێ بزاڤێ بكەت. دشێن ب رێكێن خواندنێ و نڤێسینێ و بەلاڤكرنا بەرهەمێ ئەدەبی و كولتۆری و ب رێكێن راگەهاندنێ ب هەموو ئالاڤان ڤە ئەڤی زمانی بپارێزن و گرنگیێ پێ بدەین. رۆژا زمانێ دایكێ دەرفەتەكە ژبۆ بەرز راگرتنا ناسنامەیا كوردی و هشیاركرنا خەلكێ و گرنگی دان ب پاراستنا زمانی و پشتەڤانیكرنا زمانێ دایكێ.
د ڤێ رۆژێ دا، بلا ئەم هەموو پێكڤە هزر د وێ چەندێ دا بكەین كو پاراستنا زمانی تنێ پاراستنا پەیڤەكێ نینە، بەلكو پاراستنا ناسنامە و كولتۆرێ مرۆڤایەتیێ یە. بلا ئەم بزاڤان خورت بكەین كو ئەڤ زمانە هەردەم زیندی و چالاك بمینیت و نەبیتە قوربانیا جیهانا پێشكەفتی. پاراستنا زمانێ دایكی ئەركێ مە هەمووانە، رۆژا جیهانیا زمانێ دایكێ هزرەكە ژبۆ هندێ ئەڤ ئەرك و ب رۆنی بهێتە دیتن و بەرەڤ پێشڤە ببەین.
