رۆژبین دێ كلیپه‌كا نوو به‌لاڤ كه‌ت
دهۆك، زنار تۆڤی:
رۆژبین كزل، سترانبێژا به‌رنیاسا باژێرێ مێردینێ، كو ئه‌ڤه‌چه‌ند ساله ل وه‌لاتێ ئه‌لمانیا دژیت وخودانا چه‌ندین ستران و كلیپانه، د دیداره‌كێ دا بۆ رۆژناما ئه‌ڤرۆ دگۆت: ئه‌ڤه ده‌مه‌كه ئه‌ز مژوولی تۆماركرنا سترانه‌كا نوومه ب ناڤێ (جانۆ) كو ژ په‌یڤ و ئاوازێن منن و دێ ب ب دوقۆلی ل گه‌ل سترانبێژ فه‌هیمایێ بێژیم و دێ كلیپا وێ ژی ل ئیسته‌مبولێ چێكه‌م و زانا كزل دێ ب كارێ كلیپكرنا وێ رابیت و ئه‌ز ب خوه دێ ب كارێ سه‌رپه‌رشتی و ده‌رهێنانا وێ كلیپێ رابم و ل نێزیك دێ هێته به‌لاڤكرن.
رۆژبینێ گۆت: پشتی ڤێ كلیپێ وێ ل به‌ره سترانه‌كا دی تۆمار بكه‌ت، هه‌روه‌سا ئه‌و سترانێن سینگل چێدكه‌ت، به‌لێ هه‌تا نوكه وێ چو ئه‌لبۆم چێ نه‌كرینه و هزر ژی د هندێ دا نه‌كریه، نوكه ئه‌و ل زانكۆیێ پشكا موزیكێ دخوینیت و ئامیرێ سازێ دژه‌نیت، هه‌تا نوكه هه‌شت كلیپ به‌لاڤ كرینه و چه‌ندین سترانێن دوقۆلی ژی ل گه‌ل سترانبێژ فه‌هیمایێ گۆتینه، پرانیا سترانێن وێ گۆتین ژ په‌یڤ و ئاوازێن وێ ب خوه‌نه، مالباتا وێ گه‌له‌ك پشته‌ڤانییێ ل كارێ وێ یێ هونه‌ری دكه‌ن و گه‌له‌ك حه‌ز ژ سترانێن فولكلۆری ژی دكه‌ت.
