رۆژبین مژوولی تۆماركرنا دو سترانێن نوو یه
ئه‌ڤرۆ، رێوار:
ره‌ڤه‌ند سه‌باح جه‌میل، یێ به‌رنیاس ب (رۆژبین) ئێك ژ راپه‌رێن پارێزگه‌ها دهۆكێ یه د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو بۆ ده‌مێ پتری 10 سالانه ئه‌و سترانان ب شێوه‌یێ راپ دبێژیت و هه‌تا نوكه چه‌ندین سترانێن تۆماركری و كلیپ هه‌نه و گۆت: “نوكه مژوولی تۆماركرنا دو سترانێن نوو مه بشێوه‌یێ راپ و هه‌ر ده‌مێ ب دووماهی هاتن د پلانا من دایه كلیپ ژی بكه‌م”.
ناڤهاتی ئاماژه دا وێ چه‌ندێ كو به‌هرا پتریا سترانێن ئه‌و دبێژیت ژ په‌یڤێن وی ب خوه‌نه و گۆت: “نوكه من ستودیۆیه‌كا تایبه‌ت هه‌یه و هه‌موو كارێن خوه یێن هونه‌ری لێ ئه‌نجام دده‌م سه‌ره‌رایی ڤێ چه‌ندێ ل ستودیۆیا خوه خزمه‌تا سترانبێژ و مۆزیكژه‌نان ژی دكه‌م”.
رۆژبینی خویا كر كو هه‌تا نوكه وی چه‌ندین سترانێن دوقۆلی ب شێوه‌یێ راپ گۆتینه و نوكه ژی یێ به‌رهه‌ڤه هه‌ر سترانبێژه‌كێ هه‌بیت ده‌نگه‌كێ وان دگه‌ل ئێك بگونجیت سترانه‌كا دوقۆلی دگه‌ل بێژیت و گۆت: “ئه‌ز به‌رده‌وام پشكداریێ د به‌رنامێن هونه‌ری یێن ته‌له‌ڤزیۆنان و كۆنسێرتێن ئاست بلند دا دكه‌م و من دڤێت ب رێیا هونه‌ری خزمه‌تا وه‌لاتێ خوه بكه‌م”.
ل دووماهیێ ناڤهاتی گۆت: “خێزانا من ب تایبه‌تی دایك و بابێن من پشته‌ڤانێن من یێن سه‌ره‌كی نه بۆ هه‌ر كاره‌كێ هونه‌ری یێ ئه‌ز ئه‌نجام بده‌م ژ به‌ر ڤێ چه‌ندێ من چوجاران هزر د وێ چه‌ندێ دا نه‌كریه رۆژه‌كێ ده‌ستان ژ كارێ خوه یێ هونه‌ری به‌رده‌م”.
