رۆژنامه‌كا ئه‌مریكی: قه‌یرانا ئابووری دێ بیته ئه‌گه‌رێ دوورخستنا ئه‌ردۆغانی ژ ده‌ستهه‌لاتێ
ب، سه‌رجان مه‌حمود:
رۆژنامه‌كا ئه‌مریكی دیار دكه‌ت كو ره‌وشا ئابووری یا توركیا گه‌له‌ك خرابه و نها رێژه‌یه‌كا به‌رچاڤ ژ خه‌لكێ توركیا نه‌شێن ژیانا خوه یا رۆژانه برێڤه ببه‌ن و خه‌لك ئه‌ردۆغانی وه‌كو به‌رپرسێ سه‌ره‌كی یێ ره‌وشا نها یا خراب دبینن.
رۆژناما واشنتۆن پۆست یا ئه‌مریكی راپۆرته‌كا تایبه‌ت ل سه‌ر ره‌وشا نها یا توركیا به‌لاڤكر و راگه‌هاند كو قه‌یرانا ئابووری رۆژه‌ڤا سه‌ره‌كیه ل توركیا و پرانیا مالباتان نه‌شێن ژیانا خوه برێڤه ببه‌ن و كارمه‌ند و كرێكارێن توركیا ژی ژ به‌ر بلندبوونا بهایێ دۆلاری ل هه‌مبه‌ر لیره‌یێ توركی رۆژ ب رۆژێ ره‌وشا وان خرابتر لێ دهێت، ل پرانیا توركیا وه‌لاتی ژ به‌ر ره‌وشا ئابووری نه‌رازینه و نها ئالیگرێن ده‌ستهه‌لاتێ ژی ده‌نگێ خوه بلند دكه‌ن و ژ حوكمه‌تا ئه‌ردۆغانی دخوازن چاره‌یه‌‌كێ بۆ ره‌وشا نها یا خراب په‌یدا بكه‌ت و هه‌كه ره‌وش وه‌سا به‌رده‌وام بكه‌ت دێ خوه‌نیشادان ل دژی ده‌ستهه‌لاتێ ده‌ستپێكه‌ن، چونكو وه‌لاتی نه‌شێن د ره‌وشه‌كا وه‌سا خراب دا بژین و دێ ده‌نگێ خوه ل هه‌مبه‌ر ده‌ستهه‌لاتێ بلند كه‌ن.
د پشكه‌كا دی یا راپۆرتێ دا ژی هاتیه دیار كرن كو ئه‌ردۆغانێ سه‌رۆك كۆمارێ توركیا ژ به‌ر ده‌ستهه‌لاتا خوه یا تاكه‌كه‌سی گۆهداریا كه‌سی ناكه‌ت و به‌رپرس و كه‌سێن نێزیكی ئه‌ردۆغانی و وه‌زیرێن كابینا وی ژی نه‌وێرن ره‌خنان ل سیاسه‌تا ئه‌ردۆغانی بگرن و هه‌ر تشتێ كو ئه‌ردۆغان دخوازیت بێی گه‌نگه‌شه قه‌بوول دكه‌ن و ژ به‌ر ڤێ یه‌كێ سیاسه‌تا ئابووریا توركیا رۆژ ب رۆژێ به‌ر ب هلوه‌شاندنێ ڤه دچیت و بهایێ پارێ توركی ل هه‌مبه‌ر دۆلاری و پارێن دی شكه‌ستیه، هه‌روه‌سا ده‌وله‌مه‌ند و خوه‌دانكارێن مه‌زن ژی ژ به‌ر سیسته‌مێ نها و سیاسه‌تا خراب یا ده‌ستهه‌لاتێ به‌رێ خوه داینه ده‌رڤه‌ی وه‌لاتی و ژ ره‌وشا ئابووریێ و ئێمناهیا كاری نه‌رازینه و پاشه‌رۆژه‌كا گه‌له‌ك تاری ل پێشیا توركیا یه.
د پشكه‌كا دی یا راپۆرتا رۆژناما واشنتۆن پۆست دا ئه‌و یه‌ك ژی هاتیه دیار كرن كو ل توركیا قه‌یرانا ئابووری ده‌ستێ ده‌ستهه‌لاتێ گه‌له‌ك لاواز كریه و باوه‌ریا پرانیا خه‌لكی ب ده‌ستهه‌لاتێ نه‌مایه و قه‌یرانا ئابووری ده‌ستهه‌لاتا ئه‌ردۆغانی دهه‌ژینیت و نه دووره قه‌یرانا ئابووری ببیته ئه‌گه‌رێ هندێ كو ئه‌ردۆغان ژ ده‌ستهه‌لاتێ بهێته دوورخستن.
هه‌مان رۆژنامێ ئه‌و یه‌ك ژی دیار كریه كو ل توركیا گه‌له‌ك ئابووریناس ئانكۆ زانایێن مه‌زن یێن ئابووریێ هه‌نه لێ ئه‌ردۆغان گۆهداریا وان ناكه‌ت و به‌رده‌وام دڤێت وه‌كو خوه سیاسه‌تا ئابووریێ برێڤه ببه‌ت، ژ به‌ر سیاسه‌تا خراب یا ئابووریێ ژی توركیا تووشی قه‌یرانه‌كا گه‌له‌ك مه‌زن یا ئابووریێ بوویه.
ل ئالیێ دی ل دووڤ كۆمپانیێن راپرسیان ل توركیا پارتا كۆماریا گه‌ل ده‌نگێن خوه گه‌له‌ك زێده كرینه و نها د رێزا یه‌كه‌م دایه و دیسان پرانیا وه‌لاتیان قه‌یرانا ئابووریێ وه‌ك پرسا هه‌ری مه‌زن یا توركیا دبینن و نه‌بوونا دادوه‌ریێ، ئێمناهیێ و دیموكراسیێ ژی وه‌كو پرسێن دی یێن گرنگ دبینن، هه‌روه‌سا رێژه‌كا به‌رچاڤ ژ وه‌لاتیێن توركیا پرسا كوردی ژی وه‌كو ئێك ژ پرسێن دی یێن گرنگ ل توركیا دبینن كو ده‌ستهه‌لاتا ئاكپارتیێ د ده‌مێن چه‌ندین سالێن بۆری دا نه‌شیایه پرسا كوردی چاره‌سه‌ر بكه‌ت، ژ به‌ر ڤان ئه‌گه‌ران ژی رێژه‌یه‌كا به‌رچاڤ ژ ده‌نگده‌رێن ئاكپارتیێ ڤێجارێ ئێدی ده‌نگێ خوه ناده‌نه ئه‌ردۆغانی و پارتا وی و دێ ده‌نگێن خوه ده‌نه پارتێن ئۆپۆزسیۆنێ و ژ به‌ر هندێ ژی د هه‌لبژارتنێن بهێت دا دهێته چاڤه‌رێكرن كو ئه‌ردۆغان ژ ده‌ستهه‌لاتێ بهێته دوورخستن.
