رۆژنامه‌كا ئه‌مریكی: ٩ شاشیێن پۆتینی بووینه ئه‌گه‌رێ شكه‌ستنا رۆسیا
ئه‌ڤرۆ:
رۆژنامه‌كا ئه‌مریكی دیار دكه‌ت كو ٩ شاشیێن پۆتینی د شه‌رێ ل ئۆكرانیایێ دا وه‌سا كر كو له‌شكرێ وی وه‌لاتی د شه‌ری دا سه‌ركه‌فتی نه‌بن و نها رۆسیا چو پیلانێن نوو ژی نینن و به‌رده‌وامیا شه‌ری د به‌رژه‌وه‌ندیا رۆسیا دا نینه.
رۆژناما واشنتۆن پۆست یا ئه‌مریكی د راپۆرته‌كێ دا ٩ خالان وه‌كو شاشیێن سه‌ره‌كی یێن پۆتینی ده‌ستنیشان دكه‌ت كو ژ به‌ر وان شاشیێن پۆتینی رۆسیا نه‌شیا د شه‌رێ ل ئۆكرانیایێ دا سه‌ركه‌فتی بیت و نها رۆسیا د شه‌ری دا تووشی شكه‌ستنێ هاتیه و ب گوهۆڕینا فه‌رماندارێن شه‌ری ژی ره‌وشا شه‌ری ناهێته گوهۆڕین، چونكو سه‌ربازێن رۆسیا ئێدی هه‌ست ب هندێ كرینه كو ئه‌و نه‌شێن د شه‌ری دا سه‌ركه‌فتی بن و به‌رۆڤاژی سه‌ربازێن ئۆكرانیایێ كو هه‌ست دكه‌ن شیاینه رۆسیایێ تووشی شكه‌ستنه‌كا مه‌زن بكه‌ن.
رۆژناما واشنتۆن پۆست ٩ خالێن سه‌ره‌كی وه‌سا دیار دكه‌ت:
ئێك: پۆتینی و فه‌رماندارێن رۆسیا هزرا خوه‌راگریا له‌شكرێ ئۆكرانیایێ نه‌كربوون.
دو: له‌شكرێ رۆسیا بۆ شه‌ره‌كێ وه‌سا به‌رهه‌ڤ نه‌بوون.
سێ: خوارن وه‌كو پێدڤی بۆ سه‌ربازان نه‌هاتبوو به‌رهه‌ڤ كرن.
چار: چه‌كێن پێدڤی د هه‌موو به‌ره‌یێن شه‌ره‌كی دا ل به‌ر ده‌ستێ سه‌ربازان دا نه‌بوو.
پێنج: هێزێن رۆسیا نه‌شیان سیسته‌مێ به‌رگریا ئه‌سمانی یا له‌شكرێ ئۆكرانیایێ ژناڤ ببه‌ن.
شه‌ش: له‌شكرێ رۆسیا گه‌له‌ك به‌ره‌یێن شه‌ری ڤه‌كرن و د ئه‌نجام دا نه‌شیان كۆنترۆلا شه‌ری بكه‌ن.
حه‌فت: د بیاڤێ هه‌والگریێ دا گه‌له‌ك لاوازی دروست بوون و زانیاریێن گه‌هشتنه پۆتینی د راست نه‌بوون.
هه‌شت: ژ به‌ر لاوازیا هنده‌ك فه‌رمانداران له‌شكرێ رۆسیا هه‌ر زوو هه‌ست ب شكه‌ستنێ كرن.
نه‌ه: رۆسیا چو پیلانێن دی و به‌دیل بۆ شه‌ری نینن.
د به‌رده‌وامیا راپۆرتێ دا ئه‌و یه‌ك ژی هاتیه دیار كرن كو پۆتینی هزرا هندێ نه‌كربوو دێ ئه‌مریكا و وه‌لاتێن ناتۆ چه‌كێن پێشكه‌فتی ده‌نه له‌شكرێ ئۆكرانیایێ، چونكو هه‌موو حسابا پۆتینی ئه‌و بوو دێ شێن د ده‌مێن چه‌ند رۆژان دا هه‌موو ئۆكرانیایێ داگیر بكه‌ن، وی ده‌می دێ ئۆكرانیا و هه‌تا وه‌لاتێن ئۆرۆپا ژی نه‌چار بن كو هه‌موو داخوازیێن رۆسیا قه‌بوول بكه‌ن، لێ خوه‌راگریا له‌شكرێ ئۆكرانیایێ و پاشی ژی پشته‌ڤانیا ئه‌مریكا و ئۆرۆپا وه‌سا كر كو رۆسیا گه‌له‌ك ته‌نگاڤ ببیت، نها رۆسیا هه‌ست ب شكه‌ستنا خوه ل ئۆكرانیایێ كریه، ژ به‌ر هندێ ژی پۆتینی جه‌نه‌راله‌كێ توندره‌و یێ رۆسی كریه به‌رپرسێ شه‌رێ ئۆكرانیایێ.
د دووماهیا راپۆرتا رۆژناما واشنتۆن پۆست دا ئه‌و یه‌ك ژی هاتیه دیار كرن كو مۆرالا له‌شكرێ رۆسیا گه‌له‌ك خرابه، ئه‌و له‌شكرێن كو د شه‌ری دا پشكدار ببوون هه‌ست ب شكه‌ستنێ كرینه و به‌رهه‌ڤ نینه جاره‌كا دی بچنه شه‌ری، رۆسیا ب چه‌كێن پێشكه‌فتی ژی نه‌شێت د شه‌ری دا سه‌ركه‌فتی بیت، چونكو بریتانیا و ئه‌مریكا چه‌كێن پێشكه‌فتی داینه له‌شكرێ ئۆكرانیایێ و د شه‌رێ هه‌تا نها دا ب سه‌دان فرۆكه و كۆپته‌رێن شه‌ری یێن رۆسیا ژناڤ چووینه و سه‌ربازێن ئۆكرانیایێ ژی هه‌ست ب سه‌ركه‌فتنا خوه د شه‌ری دا كرینه.
