رۆژنامه‌كا بریتانی: پرۆژێ ئۆباما ل رۆژهه‌لاتا ناڤین بجه دبیت
ئه‌ڤرۆ:
دێیڤید گاردنر رۆژنامه‌ڤانێ ناڤدار یێ رۆژناما فاینایشل تایمز یا بریتانی راگه‌هاند كو د ناڤ ده‌ه سالێن ده‌ربازبوویی دا هه‌موو ده‌وله‌تێن ل رۆژهه‌لاتا ناڤین د ناڤ ئالۆزیان بوون و نها ژی هه‌موو وه‌لاتێن هه‌رێمێ سیاسه‌تێن دژوار یێن ل دژی هه‌ڤدو دمه‌شین و ره‌وش هه‌ر كو دچیت ئالۆزتر دبیت و گۆت: (ب تایبه‌تی ژی د ده‌مێ سه‌رۆكاتیا دۆنالد ترامپی دا وه‌لاتێن هه‌ڤپه‌یمان یێن ئه‌مریكا ژ به‌ر هه‌لوه‌ست و سیاسه‌تا ترامپی ژ ئه‌مریكا بێ هێڤی ببوون و بۆ ڤێ چه‌ندێ ژی د گه‌له‌ك بیاڤان دا ده‌ست ب گوهۆرینان كربوون، لێ نها ره‌وشه‌كا نوو هاتیه پێش و جاره‌كا دی ئه‌م دبینین كو وه‌لاتێن رۆژهه‌لاتا ناڤین ده‌ست ب هه‌ڤدیتنان دكه‌ن و دخوازن ئاریشێن د ناڤبه‌را خوه دا چاره‌سه‌ر بكه‌ن).
رۆژنامه‌ڤانێ ناڤهاتی ئاشكرا ژی كر به‌ری حه‌فت سالان د ده‌مێ ده‌ستهه‌لاتا خوه دا باراك ئۆباما سه‌رۆكێ به‌رێ یێ ئه‌مریكا دخواست كو هه‌موو وه‌لاتێن رۆژهه‌لاتا ناڤین ئاریشێن د ناڤبه‌را خوه دا بده‌نه ره‌خه‌كێ و نێزیكی هه‌ڤدو ببن و گۆت: (حه‌فت سالان به‌ری نها ده‌مێ باراك ئۆبامای ئه‌و یه‌ك دیار كری پرانیا وه‌لاتێن هه‌رێمێ هه‌بوونا ئیرانێ وه‌ك گه‌ف نیشادان و ره‌ت كرن ل گه‌ل ئیرانێ ده‌ست ب دانوستاندنان بكه‌ن لێ پشتی ده‌ستهه‌لاتا ترامپی و بێ خه‌میا ئه‌مریكا ل هه‌رێمێ ئه‌و ژی نه‌چار مان نێزیكی هه‌ڤدو ببن و د ناڤبه‌را ئیسرائیلێ و ئیماراتێ هه‌روه‌سا مسرێ و سعوودیێ دا په‌یوه‌ندیێن ئه‌رێنی ده‌ستپێكرن و د هه‌مان ده‌می دا پرسێن ل گه‌ل ئیرانێ ژی هاتنه جه‌مداندن و هه‌موو ئالی ڤه‌گه‌ریانه سه‌ر داخوازا باراك ئۆباما).
ناڤهاتی ئه‌و یه‌ك ژی دیار كر كو ئه‌ڤرۆ توركیا ژی ل هه‌مبه‌ر وه‌لاتێن رۆژهه‌لاتا ناڤین، وه‌لاتێن عه‌ره‌بی، ئسرائیلێ و ئیرانێ سیاسه‌تا خوه گوهۆریه و ژ نوو ڤه ده‌ست ب هه‌ڤدیتنان دكه‌ت و گۆت: (چه‌ند رۆژان به‌ری نها ئه‌ردۆغانی سه‌ره‌دانا ئیماراتێ كر و د ڤان رۆژان دا دێ سه‌ره‌دانا سعوودیێ ژی كه‌ت و سه‌رۆك كۆمارێ ئسرائیلێ ژی دێ سه‌ره‌دانا ئه‌نقه‌ره كه‌ت و هه‌روه‌سا ل گه‌ل مسرێ ژی هه‌ڤدیتنێن ئه‌رێنێ ده‌ستپێ كرینه و ئه‌و یه‌ك ژی نیشا دده‌ت كو هه‌موو وه‌لاتێن رۆژهه‌لاتا ناڤین د چارچۆڤێ به‌رژه‌وه‌ندیێن هه‌ڤپشك دا نێزیكی هه‌ڤدو دبن و د ناڤبه‌را خوه دا ئاشتیه‌كا سار دروست دكه‌ن).
