رۆژنامەڤانەکا تورکیا ناڤەڕۆکا رێککەفتنا تورکیایێ و ئۆجەلانی ئاشکرا دکەت
رۆژنامەڤان و ڤەکۆلەرەکا تورکیا دیار دکەت دێ ١٥ێ مەها بهێت ئۆجەلان داخوازێ ژ پەکەکێ کەت دەست ژ چەکی بەردەن و ل هەمبەر دا دێ تورکیا ژی راستیا رۆژئاڤایێ کوردستانێ قەبوول کەت و نها کارێن گەلەک باش و مەزن دهێنە کرن، لێ هەموو تشت بۆ رایا گشتی ناهێتە ئاشکرا کرن.
گۆنوول تۆل رۆژنامەڤان و ڤەکۆلەرا تورکیا سەبارەت ب هه‌ڤدیتنێن د ناڤبەرا دەولەتا تورکیا و ئۆجه‌لانی دا دیار کر، د هه‌ڤدیتنا دویێ یا ل گەل ئۆجەلانی دا بەحسێ گەلەک بابەتێن گرنگ هاتینە کرن و هندەک بریارێن دیرۆکی ژی هاتینە دان و گۆت: (ل دووڤ زانیاریێن کو گەهشتینه من دێ ئۆجه‌لان رۆژا 15 هه‌یڤا دو یا ئه‌ڤسالە داخواز ژ بەرپرسێن پەکەکێ کەت کو دەست ژ چەکی بەردەن، ڤێ دووماهیێ بەرپرسێن پەکەکێ یێن ل قەندیلی ژی ژ هەڤدیتنێن د ناڤبەرا تورکیا و ئۆجەلانی دا ئاگەهدارن، ژ بەر ڤێ یەکێ ژی ئەز باوەر ناکەم سەبارەت ب دەست بەردانا ژ چەکی بەرپرسێن پەکەکێ چ ئاریشان دروست بکەن).
رۆژنامەڤان و ڤەکۆلەرا ناڤهاتی ئەو یەک ژی دیار کریە، ل هەمبەر دەست بەردانا ژ چەکی ژ ئالیێ پەکەکێ ڤە دێ دەولەتا تورکیا ژی لێبۆرینا گشتی دەرخینیت و دێ هەموو ئەندامێن پەکەکێ یێن ل زیندانان هێنە ئازاد کرن، هەروەسا سیاسەتمەدارێن نێزیکی پەکەکێ یێن ل زیندانان ژی دێ هێنە ئازاد کرن و گۆت: (ل گۆر زانیاریێن گەهشتینە من، دێ هەموو قەدەغەیێن ل سەر زمانێ کوردی هێنە راکرن، دەولەت دێ هاریکار بیت بۆ خواندنا ب زمانێ کوردی و خالا هەری گرنگ ژی دێ گوهۆڕینێن مەزن د دستوورێ تورکیا دا هینە کرن، دێ هەبوونا کوردان ب فەرمی هێتە قەبوول کرن و دێ کورد گەهنە مافێن خوە).
گۆنوول تۆل د دووماهیا ئاخڤتنا خوە دا بەحسێ رەوشا سووریێ و رۆژئاڤایێ کوردستانێ ژی کریە و دیار کریە، د هەڤدیتنا ڤێ دووماهیێ یا ل گەل ئۆجەلانی ل ئیمرالیێ دا بریارێن گرنگ ل دۆر رۆژئاڤایێ کوردستانێ ژی هاتینە دان و گۆت: (ل دووڤ رێککەفتنا نوو یا د ناڤبەرا بەرپرسێن تورکیا و ئۆجەلانی دا دێ ل باکورێ سووریێ ب پشکداریا ئەنجوومەنێ نشتیمانی یێ کوردی ل سووریێ و پەیەدێ حوکمەتەکا نوو هێته ئاڤاکرن و دێ پشکه‌ک ژ هێزێن سوویا دیموکرات چنە ناڤ لەشکرێ نوو یێ سووریێ و دێ پشکه‌ک ژی وه‌ک هێزێن پاراستنا باکورێ سووریێ و رۆژئاڤایێ کوردستانێ مینن. ل هه‌مبه‌ر ڤان پێنگاڤان دێ تورکیا ژی ئاسته‌نگێن ل هه‌مبه‌ر رێڤه‌به‌ریا خوه‌سه‌ر راکه‌ت و دێ مافێن کوردان ل سووریێ ژی قه‌بوول که‌ت، نها کارێن گەلەک باش و مەزن دهێنە کرن و دێ هەتا چەند مەهێن دی گوهۆڕینێن گەلەک مەزن هێنە کرن).
