رۆژنامەیەکا ئەمریکی: دووماهیا بەشاری نێزیکە و ئیران ژی هێزێن خوە ژ سووریێ ڤەدکێشیت
رۆژنامەکا ئەمریکی دیار دکەت، ئێدی رۆسیا و ئیران ژی نەشێن رژێما بەشاری قورتال بکەن، رژێما بەشاری دێ ژناڤ چیت و ئیرانێ ژی دەست ب ڤەکێشانا هەموو هێزێن خوە ژ سووریێ کریە و بالیۆزخانا ئیرانێ ل شامێ ژی دوهی هاتیە داخستن.
رۆژناما نیویۆرک تایمز یا ئەمریکی د راپۆرتەکێ دا دیار کریە، رژێما بەشاری نەشیا خوە ل هەمبەر ئێرشێن هێزێن دەستەیا تەحریر شام راگریت و نها پرانیا ئاخا سووریێ د دەستێ دژبەرێن ئەسەدی دایە و رژێما بەشاری د رۆژێن خوە یێن دووماهیێ دایە و هەروەسا رۆسیا و ئیران ژی گەهشتینە ڤێ باوەریێ کو ئێدی گەلەک یا ب زەحمەتە بشێن رژێما بەشاری قورتال بکەن و ژ بەر ڤێ یەکێ ژی بەری چەند رۆژان رۆسیا هێزێن خوە ژ دەڤەرێن نێزیکی شەڕی ڤەکێشان و نها ئیرانێ ژی دەست ب ڤەکێشانا هێزێن خوە یێن ل سووریێ کریە.
هەمان رۆژنامێ ئەو یەک ژی دیار کریە، گەلەک ژ فەرماندارێن ئیرانێ و شیرەتکارێن سەربازی یێن وی وەلاتی بەری دو رۆژان ب رێیا فرۆکەخانا شامێ چووینە تەهرانێ و هندەک هێزێن ئیرانێ ژی ب رێیێن ئەردی ژ ئاخا سووریێ دەرکەفتینە و ئیرانێ بالیۆزخانا خوە یا ل شامێ ژی داخستیە و هەموو کارمەندێن بالیۆزخانێ ژی چووینە ئیرانێ و ئەو یەک ژی نیشا ددەت کو ئیران ژی گەهشتیە ڤێ باوەریێ کو ئێدی دووماهیا رژێما بەشاری یا هاتی و ئەو نەشێت بەشاری قورتال کەت.
رۆژناما ئەمریکی ئەو یەک ژی دیار کریە، نها بەرپرسێن ئەمریکا و ئسرائیلێ هزرا قۆناغا پشتی ئەسەدی دکەن و ب تایبەتی ژی هێزێن ئسرائیل ل سەر سنۆرێن سووریێ د ئامادەباشیێ دانە و تورکیا ژی دڤێت کاریگەریا وێ ل سەر سووریا نوو گەلەک بیت و ب هەموو شیانێن خوە پشتەڤانیا دەستەیا تەحریر شام دکەت، لێ هێشتا ژی رەوشا سووریێ گەلەک یا ئالۆزە، چونکی نها پشکەک مەزن ژ ئاخا سووریێ د دەستێ کوردان دانە و ئەمریکا ژی پشتەڤانیێ ل کوردان دکەت، ئەو یەک ژی دشێت پێگەهێ کوردان د سووریا نوو دا گەلەک بهێز بکەت و بێگومان تشتەک وەسا ب دلێ تورکیا نینە.
چاڤدێرێن سیاسی دیار دکەن سووریا دێ پارچە بیت، چونکی نها هێزێن ئۆپۆزسیۆنێ گەلەک بهێزن و ئێدی وان ژی نەڤێت ل گەل بەشاری دانوستاندنان بکەن و خوە بەرهەڤ دکەن دا ب کۆنترۆلکرنا شامێ دووماهیێ ب دەستهەلاتا بەشاری بینن و ل ئالیێ دی تورکیا ژی ژ بهێزبوونا کوردان دترسیت و دبیت تورکیا پشتی شامێ تەحریر شام نەچار بکەت ئێرشی دەڤەرێن کوردی بکەت، لێ ئەو یەک دێ سووریێ بەر ب چارەنڤیسەکێ نەدیار ڤە بەت.
ل ئالیێ دی دوهی سالح موسلیم هەڤسەرۆکێ بەرێ یێ پەیەدێ ژی دیار کر، وان نەڤێت ب چو رەنگەکێ شەڕێ تەحریر شام بکەن و هەلوەستێ هەتا نها یێ دەستەیا تەحریر شام ل هەمبەر کوردان ژی جهێ دلخوەشیێ یە و ئەو دشێن ب رێیا دانوستاندنان هەموو پرسێن هەی چارەسەر بکەن، چونکی دەستەیا تەحریر شام ژی باش دزانیت یێن بەری نها شەڕێ کوردان کری ژناڤچوون، واتە شەڕ د بەرژەوەندیا تەحریر شام دا نینە و هیڤیدارین ئەو شاشیەکا وەسا نەکەن.
سەبارەت ب ئالۆزیێن سووریێ دوهی مەزلوم عەبدی فەرماندارێ گشتی یێ هێزێن سووریا دیموکرات ژی دیار کر، ڤەکێشانا هێزێن سووریێ وەسا بلەز ژ گەلەک دەڤەران پێشهاتەکا نەچاڤەرێ کریبوو لێ وەکو هێزێن سووریا دیموکرات وان شیان د دەمەکێ کورت دا گەلەک دەڤەرێن گرنگ کۆنترۆل بکەن و نها دێرازۆر و ئەبوکەمال و گەلەک جهێن دی د دەستێ هێزێن وان دانە و هێزێن سووریا دیموکرات خوە بۆ هەر ئەگەرەکێ ژی بەرهەڤ کرینە و گۆت: (بێگومان وەکو هێزێن سووریا دیموکرات ئەم دێ ئاخ و خەلکێ خوە پارێزین، مە نەڤێت شەڕێ دەستەیا تەحریر شام بکەین و هەتا نها وان ژی بریارەکا وەسا نەداینە، لێ هەکە ئەو ئێرشی هێزێن مە بکەن ئەم ژی دێ ب توندی بەرسڤا وان دەین و رێ نادەین زیان بگەهیتە خەلکێ مە).
سەبارەت ب تاخێن کوردان یێن ل حەلەبێ ژی فەرماندارێ گشتی یێ هێزێن سووریا دیموکرات دیار کر، نها هێزێن وان ل هەر دو تاخێن کوردی یێن ل حەلەبێ هەنە و خەلکێ خوە دپارێزن و هەتا نها ژی ئاریشە نینن و ئەو بزاڤا ڤێ یەکێ دکەن ب رێیا دانوستاندنان ئاریشێن هەی ل گەل دەستەیا تەحریر شام چارەسەر بکەن، چونکی شەڕ چارەسەری نینە.
ئەو یەک د دەمەکێ دایە کو گەلەک ژ دەزگەهێن راگەهاندنا عەرەبی دبێژن نها بەشار ئەسەد ل تەهرانێ یە و دوهی وەزیرێ دەرڤە یێ ئیرانێ ژی دیار کر، پیلانەک گەلەک مەزن ل دژی رۆژهەلاتا ناڤین هەیە و نها ئەمریکا و ئسرائیل دخوازن نەخشێ دەڤەرێ ب تەمامی بگوهۆڕن و پشتی سووریێ مەترسیەکا گەلەک مەزن ل سەر عێراقێ ژی هەیە، وەکو ئیران ئەو دێ ب هەموو شیانێن خوە پشتەڤانیێ ل بەشار ئەسەدی کەن و دڤێت رێ نەدەین پیلانا ئەمریکا و ئسرائیلێ ل دژی خەلکێ رۆژهەلاتا ناڤین سەر بگریت، چونکی ئەو یەک دێ دەڤەرێ تووشی کارەساتێن گەلەک مەزن کەت.
