رۆژنامەیەکا تورکیا جهـ و ژڤانێ دیدارا ئەردۆغانی و بەشاری ئاشکرا دکەت
رۆژنامەکا تورکیا دیار دکەت ب ناڤبژیڤانیا رۆسیا دێ د دەمەکێ نێزیک دا سەرۆک کۆمارێ تورکیا و سەرۆکێ سووریێ کۆمبن و بەری کۆمبوونێ ژی بەرهەڤیێن باش هاتینە کرن و تورکیا یا بەرهەڤە هندەک ژ داخوازیێن بەشار ئەسەدی ژی قەبوول بکەت.
رۆژناما دێیلی سەباح یا تورکیا د راپۆرتەکێ دا بەحسێ ڤێ یەکێ کریە کو دەمەکە ب ناڤبژیڤانیا رۆسیا کار بۆ ڤێ یەکێ دهێتە کرن کو سەرۆک کۆمارێ تورکیا ل گەل سەرۆکێ سووریێ کۆمبن، هەرچەندە هەتا بەری دەمەکێ ژی بەشار ئەسەد یێ رازی نەبوو بێی مەرج ل گەل ئەردۆغانی کۆمبیت، لێ رۆسیا فشارێن خوە ل سەر بەشاری زێدەتر لێ کرینە وەسا دیارە ڤێ دووماهیێ بەشار ئەسەد ژی یێ رازی بوویە کو ل گەل ئەردۆغانی کۆمبیت.
هەمان رۆژنامێ ئەو یەک ژی دیار کریە، کەسەکێ نێزیکی ئەردۆغانی دیار کریە کو هەڤدیتنا بەشار ئەسەد و ئەردۆغانی دێ ل مۆسکۆ بیت و بەری هەڤدیتنێ ژی هەر دو شاندێن تورکیا و سووریێ ل دۆر هندەک بابەتان دانوستاندن کرینە و تورکیا ژی بەرهەڤە هندەک ژ داخوازیێن سووریێ قەبوول بکەت.
ل گۆر هەمان رۆژنامێ دێ مەها ٨ یا ئەڤسالە ئەردۆغان و بەشار ئەسەد کۆمبن و دبیت رێککەفتنەکا سەرەتایی ژی ل دۆر چاوانیا چارەسەرکرنا قەیرانا سووریێ بهێتە کرن، ژ بەر ڤێ یەکێ ژی گرۆپێن چەکدارێن سەر ب تورکیا نەرازیبوونا خوە ل هەمبەر سیاسەتا نوو یا تورکیا دیار کرینە و بەرپرسەکێ گرۆپێن چەکدار ژی دیار کریە هەکە تورکیا پەیوەندیێن خوە ل گەل شامێ ئاسایی بکەت ئەو ئێدی نەچار نینن گۆهداریا فەرمانێن ئەنقەرە بکەن.
چاڤدێرێن سیاسی ژی دیار دکەن، تورکیا نها د قەیرانەکا گەلەک مەزن یا ئابووری دایە، لێ ژ بەر شەرێ نها ل ئۆکرانیایێ رەوشەکا دی هاتیە پێش و رۆسیا ژی نەڤێت تورکیا ژ خوە دوور بکەت، ژ بەر ڤێ یەکێ ژی دەمەکە رۆسیا دڤێت تورکیا و سووریێ دەست ب قۆناغەکا نوو بکەن، بەری دەمەکێ پەیڤدارا وەزارەتا دەرڤە یا رۆسیا ژی دیار کربوو ئەو ب هەموو رەنگەکێ پشتەڤانیێ ل دەستپێکرنا قۆناغەکا نوو د ناڤبەرا تورکیا و سووریێ دا دکەن.
ل گۆر ژێدەرێن میدیایی یێن ئۆرۆپی ئەمریکا و ئیران پشتەڤانیێ ل ڤێ بزاڤا رۆسیا ناکەن، چونکی د رەوشا نها دا ئیرانێ نەڤێت تورکیا و سووریێ پەیوەندیێن خوە ئاسایی بکەن، چونکی ئەو یەک دێ کاریگەریا ل سەر پێگەه و بەرژەوەندیێن ئیرانێ ل سووریێ هەبیت و د هەمان دەمی دا ئەمریکا ژی باش دزانیت هەکە ب رێککەفتنەکێ پەیوەندیێن تورکیا و سووریێ باش ببن وی دەمی دێ سێ وەلاتێن رۆسیا، تورکیا و سووریێ ب هەموو رەنگەکێ ئەمریکا تەنگاڤ کەن دا هێزێن خوە ژ سووریێ ڤەکێشیت، ژ بەر ڤێ یەکێ ژی نها ئەمریکا ل دژی ڤێ یەکێ یە تورکیا و سووریێ دەست ب قۆناغەکا نوو بکەن.
