رۆژنامەیەک:عەبادی دێ دەست ب دانوستاندنان ل گەل هەرێمێ کەت
ئەڤرۆ نیۆز ، زنار تۆڤی:
ژێدەرەکێ عێراقی ئاشكرا دکەت کو حەیدەر عەبادی سەرۆك وەزیرێن عێراقێ حەزا دەست پێكرنا گفتوگۆیێ و چارەسەركرنا كێشەیان ل گەل حوکمەتا هەرێما كوردستانێ ل دەف دروست بوویە و هۆكار ژی بۆ نێزیكبوونا هەلبژارتن و ترسا مفا وەرگرتنێ ژ نەیارێن خۆ ژ ڤێ تەنگژەیا ل گەل هەرێمێ بۆ بەرژەوەندیا وان ڤەدگەرینیت.
لدووڤ وی ژێدەری،کو نێزیکی نڤێسینگەها سەرۆك وەزیرێن عێراقێ یە، عەبادی ئاگەهداری هوورکاریێن ئەنجامێ گفتوگۆیێن هەردو شاندێن عێراقی و كوردستانی بوویە،ل هەولێرێ و روونكریە،کو تا نوکە ئەو دووڤچوونا چاوانیا ڤەكرنا دەرگەهێ گفتوگۆیان بۆ چارەسەركرنا تەنگژەیان ل گەل هەرێمێ دکەت،کو پشتی ریفراندۆما هەرێمێ ل 25 سپتێمبەرا بوری بۆ سەربەخۆیێ ل عێراقێ سەرهەلداینە.
هەروەسا گوتیە،عەبادی دڤێت هەڤدەم ل گەل نێزیكبوونا هەلبژاردنان ل عێراقێ،ڤێ پرسێ بۆ بەرژەوەندیا خۆ و بەرەف چارەسەربوونێ ببەت، بتایبەتی چارەسەركرنا هەر تەنگژەكێ ل گەل هەرێمێ،د نوکەدا د بەرژەوەندیا وی دایە و دێ رێکێ ژی ل بەردەم نەیارێن خۆ گریت بۆ سوودوەرگرتن و دیتنا ڤان پرسان بۆ بەرژەوەندیا خۆ.
دیسا دیارکریە،کو ل ڤان نێزیکان دێ شاندەکێ كوردستانێ سەرەدانا بەغدا کەت بۆ بەحسکرنا هژمارەکا پرسان و دەرگەه ژێ دێ ل هەمبەری وی شاندی هێتە ڤەکرن بۆ چارەسەركرنا چەند فایلەیان و پشتی دەرگەهێ گفتوگۆیێ دێ هێتە ڤەکرن، ئاشكرا كریە،كو شاندێ بەغدا گوتیە حوکمەتا هەرێما كوردستانێ کو عەبادی حەزا گەهشتنا چارەسەریان هەیە و پێدڤیە ئەو گفتوگۆیە نوکە بەرەف پێش بچن بۆ گەهشتن بۆ گفتوگۆیێن راستەوخۆ.
هەروەسا رۆژناما ئەلعەرەبی جەدید گوتیە،هەڤدەم عەبادی ترسا هندێ هەیە كو تەنگژەیا بەغدا ل گەل هەرێما كوردستانێ و ب نەرێنی كار بكەتە سەر هەڤپەیمانیا وی ل هەلبژارتنان،کو رەنگە دەرگەە ل هەمبەری نەیارێن وی ڤەببیت و دەلیڤە بۆ ون چێبیت کو ئەو خۆ نێزیکی هەرێمێ بکەن ل سەر حسێبا عەبادی.
