رۆژهلاتێ كوردستانێ د نێرینا هن ئاماران ده
رژێما ب ناڤ كۆمارا ئیسلامیا ئیرانێ، هه‌ر د ئێه‌كه‌م رۆژا ب تالانبرنا ده‌ستكه‌ڤتێن شۆره‌شا گه‌لێن ئیرانێ و بده‌سته‌گرتنا ده‌ستهلاتێ، سیاسه‌ته‌ك دژمنكارانه و ته‌په‌سه‌ركرنێ ل هه‌مبه‌ر نه‌ته‌وێن ئازادیخوازێن ئیرانێ و یه‌ك ژ وان نه‌ته‌وا كورد مه‌شاند. نێرینا رژێما ئیرانێ ل هه‌مبه‌ر رۆژهلاتێ كوردستانێ، نێرینه‌كه سیاسی و ئه‌منیه‌تییه. ئه‌و ژی ڤه‌دگه‌ره سه‌ر ئه‌كتیڤبوون و به‌رده‌وامیا ته‌ڤگه‌ره‌ك نه‌ته‌وه‌یی و ئازادیخواز د كوردستانێ ده كو هه‌رتم ل هه‌مبه‌ر ده‌سهلاتا دیكتاتۆرا ناڤه‌ندی ده سه‌كنیه. له‌وما رژێم جودا ژ سیاسه‌تا ته‌په‌سه‌ری و گرتن و كوشتن و ژ ناڤبرنا نه‌ته‌وا كورد ب ئاوایه‌كی سیسته‌ماتیك، لێ د وارێ خزمه‌تگۆزاری ڤه ژی تو گرینگیه‌كێ ب هه‌رێمێن كورد ئاكنجی ناده. ئانكو ب ئه‌گه‌را سیاسه‌تا فه‌رق و جوداهیدایێ ژ ئالیێ رژێمێ ڤه، كوردستان د هه‌می واره‌كی وه هاتیه پشتگوهخستن و ملیتاریزه‌كرن. ئه‌و سیاسه‌تا هان ژی بوویه سه‌ده‌ما چێبوون و هاتنه رۆژه‌ڤا ب ده‌هان كریز و دیارده‌یێن جڤاكی د كوردستانێ ده. بێكاری یه‌ك ژ كرَیزا سه‌ره‌كیا خه‌لكێ رۆژهه‌لاتا كوردستانێیه. پێكا ئامارێن فه‌رمییێن ناڤه‌ندێن پێوه‌ندیدار، زێده‌یی ٤١ ژ سه‌دێ یا خه‌لكێ كوردستانێ بێكارن و نفشا جوان و خوه‌نده‌كار ژی پرانیا وێ ئامارێ پێك تینن. ته‌نێ د پارێزگه‌ها كرماشانێ ده، كو نزیك ب ٢ ملیۆن كه‌سی تێ ده دژین، د رێزبه‌ندا یه‌كه‌ما بێكاریێ د ئاستا ئیرانێ ده تێ هه‌سباندن. ئاستا گه‌شه‌كرنا بێكاریێ د ڤێ پارێزگه‌هێ ده، ٢٠. ٧ ژ سه‌دێ یه. ئاستا گه‌شه‌كرنا هه‌ژاریێ د پارێزگه‌ها كرماشانێ ده، ٦٩ ژ سه‌دێ یه، و ئاسات پشكداریكرن د ئابووریا وێ پارێزگایێ ده ژی ٣٥. ٤ ژ سه‌دێ یه، و ئاستا خوانده‌ڤانیا خه‌لكێ وێ ژی ٨١. ٧٢ ژ سه‌دێ تێ ته‌خمینكرن. ل پارێزگه‌ها لۆرستانێ ژی كو یه‌ك ژ پارێزگه‌هێن رۆژهلاتا كوردستانێیه، ١٩. ٥٦ ژ خه‌لكێ وێ نه‌خوانده‌وارن. پارێزگه‌ها سنێ ٢٢. ٣ ژ سه‌دێ یا خه‌لكێ ڤێ نه‌خوانده‌وارن و ب ڤی ئاوایی د ئاستا گشتیا ئیرانێ ده، ب پله‌یا دویه‌ما پارێزگه‌هێن نه‌خوانده‌وار تێ هه‌سباندن. ل گۆر پێوه‌ر و ده‌ركه‌وتێن گه‌شه‌كرنا جڤاكی، رۆژهلاتێ كوردستانێ ب گشتی و ب تایبه‌تی پارێزگه‌هێن ئیلام، سنه و كرماشان و لۆرستانێ، د رێزبه‌ندا “زۆر بێپار” ده جه گرتنه. د ئاستا خوه‌شبژێڤیا ناڤگین ده، د ئاستا ئیرانێ ده، د ئاستا هه‌ری نزم ده هاتیه جهگرتن. ب سه‌ده‌ما نه‌بوونا ده‌رفه‌تێن كاری د كوردستانێ ده، خه‌لك ب نه‌چاری بۆ په‌یداكرنا رسقێ مالباتا خوه، به‌رێ خوه ددن سه‌ر سینۆران ژ بۆ كارێن قاچاخ و هه‌ر د رێكێ ده ژی، ب ده‌هان خۆرتێن مه د سالێ ده ب گوڵه‌یێن راسته‌راستێن كرێگرتیێن رژێمێ ڤه تێن كوشتن و برینداركرن. ژێهه‌لچوونا ئاستا به‌رچاڤا ته‌لاقێ و كێمتربوونا پرۆسه‌یا پێكانینا ژیانا هه‌ڤپار، د رۆژهلاتێ كوردستانێ ده یه‌ك ژ ئاریشه‌یێن دن یێن ڤێ جڤاكێ یه، كو سه‌ده‌ما سه‌ره‌كیا ڤێ یه‌كێ ژی ڤه‌دگه‌ره بۆ بێكاری و نه‌بوونا ده‌رفه‌تێن كاری و بێهێڤیبوون ژ ژیانێ. هه‌ر ل گۆر ناڤه‌ندا ئامارێن فه‌رمی یێن رژێمێ پارێزگه‌ها ئیلامێ ب پله‌یا ٢٨ێ د وارێ ته‌لاقێ د ئیرانێ ده تێ هه‌سباندن. ئانكو ته‌لاق د ڤێ پارێزگه‌هێ ده، ب به‌رهه‌ڤدان ته‌ڤی ئاستا گشتیا ته‌لاقێ د ئیرانێ ده، ٥٠ ژ سه‌دێ یه. هه‌ر دیسان ل گۆر ئامارێن ناڤه‌ندی رژێمێ ل پارێزگه‌ها ئورمیێ، د چه‌ند هه‌یڤێن ده‌ستپێكا ئیسال ده، ٢٢ هزار و ١٣٧ هاله‌تێن پێكانینا ژیانا هه‌ڤپار هاتنه تۆماركرن، كو ل گولا سالا بۆری ٧ ژ سه‌دێ كێم كریه. هه‌ر دیسان د ڤان چه‌ند هه‌یڤێن ده‌ستپێكا ئیسال ده، ٣ هه‌زار و ٩٣٩ هاله‌تێن ته‌لاقێ هاتنه تۆماركرن، كو ل گور سالا بۆری ١٤ ژ سه‌دێ زێده كریه. ب گشتی ب سه‌ده‌ما بێكاری و ئاریشه‌یێن جڤاكی، ئاستا ته‌لاقێ ل گۆری سالێن به‌رێ ٤٠ ژ سه‌دێ زێده كریه. هه‌ر ل گۆر ئامارێن نه فه‌رمی، زێده‌تر ژ ٢٥ ملیۆن كه‌س د ئیرانێ ده موعتاد (به‌نگدار)ن. ته‌مه‌نێ بكارانینا ماده‌یێن هوشبه‌ر د ئیرانێ ده بۆ ژیێ خواری ١١ سالیێ داكه‌تیه. د رۆژێ ده ب گشتی ١٠ كه‌س ب سه‌ده‌ما بكارانینا ماده‌یێن هوشبه‌ر ژیانا خوه ژ ده‌ست ددن. ٦٣ ژ سه‌دێ یا بكاربه‌رێن ماده‌یێن هشبه‌ر، خێزاندارن. ٧٠ ژ سه‌دێ یا بكاربه‌رێن ماده‌هیێن هشبه‌ر، ئاستا خوانده‌ڤاریا وان سه‌رڤه‌یی دیپلۆمێیه. ١٠ ژ سه‌دێ یا بكاربه‌رێن ماده‌یێن هشبه‌ر ژنن، و ل چاڤ سالێن به‌رێ دیارده‌یا هان د ناڤا ژنان ده چه‌ند قات زێده كریه. لێ دیارده‌یا بكارانینا ماده‌یێن هشبه‌ر هه‌یا پێش هاتنه سه‌ركارا رژێما ب ناڤ كۆمارا ئیسلامی، دیارده‌یه‌كه بیانی و نه‌ناسكری بوو د كوردستانێ ده. لێ پشتی هاتنه سه‌ركارا رژێما ب ناڤ كۆمارا ئیسلامی، ئه‌و دیارده‌یا هان ب ئاوایه‌كی پلاندارێتی ژ ئالیێ دام و ده‌زگه‌هێن ئه‌منیه‌تی و ته‌په‌سه‌ركاریێن رژێمێ ڤه د كوردستانێ ده گه‌شه كر، و نها جڤاكا كوردستانێ ب ته‌واهی هه‌ڤریشی ڤێ دیارده‌یا مالوێرانكه‌ر بوویه، و ئاستا بكارانینا ماده‌یێن هشبه‌ر ده، رۆژ ب رۆژێ د كوردستانێ ده زێده دكه.
ته‌نێ د ٣ێ هه‌یڤێ بهارا ئیسال ده، ٥١٩ هاله‌تێن بنپێ كرنا مافێ مرۆڤ ژ ئالیێ دام و ده‌زگه‌هێن ته‌په‌سه‌ركاریێن رژێمێ د ئیرانێ ده هاتنه ئه‌نجام دان. ئانكو به‌شه‌ك ژ وان ب تاوانێن سیاسی و دژبه‌ری ته‌ڤی نزامێ هاتنه ئیدام كرن و هه‌روسان به‌شه‌ك به‌چاڤ ژ وان ژی ب جه‌زایێن گران و درێژهه‌یام هاتنه هه‌پسی كرن.
كوردستانا رۆژهلات ب گشتی بوویه قۆربانیێ سیاسه‌تا بیۆم و دوژمنكارانه‌ا رژێما ئیرانێ و جودا ژ ته‌په‌سه‌ر كرن و بنپێكرنا مافێ نه‌ته‌وه‌یییێن گه‌لكێ كورد، د وارێ خزمه‌تگوزاری و گه‌شه‌كرنا ئابووری و پێكانینا ده‌لیڤه‌یێن كاری وه ژی هاتیه بێپار كرن و پشتگوه خستن. ئه‌وا كو د سه‌ری ده هاتی باس كرن پاره‌ك بچووك ژ كریز و ئاریشه‌یێن جڤاكییێن خه‌لكێ رۆژهلاتا كوردستانێ بوو كو د ئه‌نجاما ڤێ سیاسه‌تا قرێژا ده‌شلاتا ناڤه‌ندیا ئیرانێ ده، ئیرۆ رۆژه خه‌لكێ به‌له‌نگاز و بێ مافیێ كورد پێڤه به‌نده‌وار و دنالن.
*ئه‌ندامێ كومیته‌یا ناڤه‌ندی یا پارتی دیموكراتی كوردستان-ئیران
