رۆژهەلاتا ناڤین بەر ب چارەنڤیسەکێ نەدیار ڤە دچیت
پشتی کو لەشکرێ ئسرائیلێ راگەهاند وان حەسەن نەسروللا کوشتینە، چاڤدێرێن سیاسی ژی دیار دکەن ئەو یەک دێ کاریگەریا خوە ل سەر هەموو رۆژهەلاتا ناڤین کەت و دێ شەڕێ نها بەرفرەهتر لێ هێت و دبیت شەڕ بگەهیتە یەمەن، سووریێ و عێراقێ ژی.
لەشکرێ ئسرائیلێ راگەهاند د ئەنجاما ئێرشا وان یا بەری دو رۆژان ل لوبنانێ وان شیاینە حەسەن نەسروللا ئەمیندارێ گشتی یێ حزبوللا لوبنانێ بکوژن و ب کوشتنا نەسروللای ژی گەلەک مەترسی ل سەر ئسرائیلێ نەمان و ئەو یەک ژی سەرکەفتنەکا گەلەک مەزنە.
لێ پەیڤدارێ حزبوللا لوبنانێ دوهی راگەهاند هەتا نها بابەتێ کوشتنا حەسەن نەسروللای ئێکلا نەبوویە و ئەو ڤەکۆلینان دکەن دا بزانن کا حەسەن نەسروللا ساخە یان نە لێ جارێ بابەتێ کوشتنا وی ئێکلا نەبوویە.
د ڤێ دەربارێ دا چاڤدێرێن سیاسی دیار دکەن، ئسرائیلێ دڤێت حەماس و حزبوللاهێ ب تەمامی ژناڤ ببەت و پاشی ژی دێ بەرێ خوە دەتە حوسیێن یەمەنێ، حەشدا شەعبی و هێزێن سەر ب ئیرانێ ل سووریێ، چونکی د گۆتارا بنیامین نەتانیاهۆ یا ل نەتەوەیێن ئێکگرتی دا دیار بوو ئسرائیلێ دڤێت هەتا هەلبژارتنێن ئەمریکا دربێن کوژەک ل هێزێن سەر ب ئیرانێ بدەت، چونکی ئیرانێ نها ئەو شیان نینن و نەشێت ب رەنگەکێ راستەوخوە ئێرشی ئسرائیلێ بکەت، ئەو یەک ژی بۆ ئسرائیلێ دەلیڤەکا زێرینە و دڤێت د دەمەکێ کورت دا هەموو دژبەرێن خوە ژناڤ ببەت.
ل ئالیێ دی دوهی موحسێن رزایی فەرماندارێ بەرێ یێ سوپایێ پاسداران ژی راگەهاند کو نها رەوشا دەڤەرێ گەلەک خرابە، دڤێت وەلاتێن ئیسلامی بەرەیەکێ دروست بکەن و رێگریێ ل ئسرائیلێ بکەن، هەکە نها رێگری ل ئسرائیلێ نەهێتە کرن ئسرائیل دێ ئێرشی سووریێ، عێراقێ و ئیرانێ ژی کەت، چونکی نەتانیاهۆ ب پشتەڤانیا ئەمریکا و وەلاتێن رۆژئاڤایی بەردەوام یێ ئێرشان دکەت و دڤێت رێگری ل ئسرائیلێ بهێتە کرن.
رزایی ئەو یەک ژی دیار کر، هەکە نها بەرسڤا ئسرائیلێ نەهێتە دان دێ پاشی زیانێن گەلەک مەزن گەهنە وەلاتێن ئیسلامی ب تایبەتی ژی هەر سێ وەلاتێن سووریێ، عێراق و ئیرانێ و نها باشترین دەمە بەرەیەک بهێز ل دژی ئسرائیلێ بهێتە دروست کرن، چونکی رەوشا نها نیشا ددەت دێ شەڕ رۆژ ب رۆژێ بەرفرەهتر لێ هێت و دڤێت یا پێدڤی ل دژی ئسرائیلێ بهێتە کرن.
ل گۆر باوەریا چاڤدێرێن سیاسی هەکە کوشتنا حەسەن نەسروللاهی یا راست بیت ئەو یەک سەرکەفتنەکا گەلەک مەزنە بۆ ئسرائیلێ، چونکی نها نە ئیران و نە ژی وەلاتێن عەرەبی بەرسڤا ئسرائیلێ نادەن و ئەو یەک ژی وەسا دکەت ئسرائیل ب دلێ خوە یا دڤێت بکەت، ئسرائیل ب پشتەڤانیا ئەمریکا و ب چەکێ گران و پێشکەفتی سەلماند دشێت ل هەر جهەکێ دربێن کوژەک ل دوژمن و نەیارێن خوە بدەت.
