رۆژه‌ك ژ ڤان رۆژان
ژ نڤیسینا: گابریێل گاسیا ماركیز
وه‌رگێران: شه‌مال ئاكره‌یی
ئه‌لندا دوشه‌مبیێ، یا گه‌رم و بێ بارانه. ئۆرێلیۆ ئه‌سكوڤار، نۆشدارێ ددانان یێ بێ باوه‌ڕنامه، گه‌له‌ك زوو یێ ژ خه‌و رابووی. ل ده‌مژمێر شه‌ش كلینیكا خوه ڤه‌كر. ده‌ست هاڤیته هنده‌ك ددانێن ده‌ستكرد ژ شووشیه‌كێ و راكرن كو هێشتا د قالبێن كێچێ دابوون، و هژماره‌كا ئامووران ل سه‌ر مێزێ دانان و ل گۆڕی قه‌باره‌یێ وان رێزكرن، هه‌ر وه‌كو یێ وان به‌رهه‌ڤ دكه‌ت بۆ نماییشه‌كێ. كراسه‌كێ بێ یاخه كو ژ ئالیێ حه‌فكێ ڤه ب دۆكمه‌یه‌كا زێری یێ گرتیبوو ل به‌ر بوو، و په‌نته‌لۆنه‌كێ گرێدایی ب دو په‌نته‌لۆنبه‌ندان ل پێیان بوو. كه‌سه‌كێ زراڤ و به‌ژن راست بوو، سیمایێ وی ل گه‌ل وێ ره‌وشا تێدا نه یا گونجای بوو و مینا ره‌وشا كه‌ڕ و لاله‌كی بوو.
ده‌ما رێزكرنا كه‌رسته‌یان ل سه‌ر مێزێ ب دووماهی ئینای، دریل بۆ ئالیێ كورسیێ راكێشا دا كار بكه‌ت و روونشته خوارێ و ده‌ست هاڤێته مه‌ڤره‌دكرن و ئه‌و ددانێن ده‌ستكرد پێ هووسین. خوه‌یا بوو كو هشێن وی نه دسه‌رێ وی دانه. ب خوه‌راگری و هووری هزرا خوه د كارێ خوه دا نه دكر. پێ وی ل سه‌ر ده‌پكێ دریلی دما هه‌تا پشتی كو كار ژی پێ نه‌ما با.
پشتی ده‌مژمێر هه‌شت، بۆ بێهنه‌كێ د په‌نجه‌ركێ ڕا به‌رێ خوه دا ئه‌سمانی، دو ئه‌لهۆ ل سه‌ر كه‌پرا مالا هه‌ڤسوو دیتن كو ل به‌ر تاڤا رۆژێ خوه زوها دكر. زڤڕیڤه سه‌ر كارێ خوه و ل گه‌ل خوه دگۆت كو باران به‌ری ده‌مێ ڤراڤینێ دێ باریت. لێ ده‌نگێ كوڕی وی یێ بلند و ژ نشكاڤه هزرێن وی بژاله‌كرن.
– بابۆ.
– چی یه؟
– سه‌رۆكێ باژێرڤانیێ دڤێت بزانیت كا دێ ددانێ وی هه‌لكێشی یان نه.
– بێژێ ئه‌ز نه ل ڤێرێ مه.
ب هووسینا ددانه‌كێ زێڕیڤه یێ مژوول بوو، ددان هنده‌كێ بلند كر و ب دو چاڤێن نیڤ نقاندی پشكنین بۆ كر. كوڕێ وی یێ یازده سالی زڤڕیڤه و جاره‌كا دی ل ژوورا پێشوازیێ یێ گازی دكه‌ت.
– یێ دبێژیت تو یێ ل ڤێرێ، و وی گوه ل ده‌نگێ ته هه‌یه.
نۆشدار هه‌ر یێ به‌رده‌وام بوو ب پشكنینا وی ددانی. ده‌ما كارێ خوه ته‌مام كری و ددانی شێوه‌یێ دووماهێ وه‌رگرتی، دانا سه‌ر میزێ و گۆت:
– هۆسا باشه.
جاره‌كا دی دریل دا شۆلی، و هنده‌ك پارچه ژ پاكیته‌كا كارتوونی كو تشتێن، هێشتا پێدڤی ب كاركرنێ ل سه‌ر هه‌یه، هه‌لگرتن، و ده‌ست هاڤیته راستكرنێ و هووسینێ.
– بابۆ.
ب هه‌مان ده‌سته‌واژه به‌رسڤا وی دا.
– چی یه؟
– سه‌رۆكێ باژێرڤانیێ یێ دبێژیت هه‌كه ددانێ وی ده‌رنه‌ئینی، دێ گولله‌یه‌كی ل ته ده‌ت.
بێ كو له‌زێ بكه‌ت، هێدی كارێ دریلی راگرت، دوور ژ كورسیێ پالدا، خزینكا (چه‌كمه‌چیا) خوارێ یا مێزێ ڤه‌كر كو ده‌بانجه‌یه‌ك تێدا هه‌بوو، و گۆت:
– باشه، كا بێژێ بلا بهێت گولله‌یا خوه ل من بده‌ت.
كورسی بۆ به‌رامبه‌ر ده‌رگه‌هی پالدا، و ده‌ستێ وی ل سه‌ر لێڤا خزینكێ بوو. سه‌رۆكێ باژێرڤانیێ د ده‌رگه‌هی ڕا خوه‌یا بوو. لایێ چه‌پێ ژ ریهێن خوه تڕاشیبوو، لێ لایێ دی یێ وه‌ڕمتی بوو و دیار بوو ئه‌و پێنج رۆژ بوون ریهێن خوه نه تڕاشیبوون. نۆشداری د چاڤێن وی دا شه‌ڤێن ئازار و بێ خه‌ویێ دیتن، ب سه‌رێن تلان خزینك گرت و ب نه‌رمی گۆت:
– روونێ.
– سپێده باش.
نۆشداری به‌رسڤا وی دا:
– سپێده باش.
ده‌ما نۆشداری كه‌رسته‌یێن خوه گه‌رم دكرن، سه‌رۆكێ باژێرڤانیێ سه‌رێ خوه دانا سه‌ر پالپشتا كورسیێ و هه‌ست ب هنده‌ك ئارامیێ كر. هه‌ناسه‌یێن وی هلم ژێ ده‌ردكه‌فت. كلینیكه‌كا بێسه‌روبه‌ر بوو: كورسیكه‌كا داری یا كه‌ڤن، دریله‌ك ب پێته‌خته‌كێ كار دكه‌ت، شووشه‌یه‌ك كو هنده‌ك بوتلێن سیرامیكی تێدا هه‌نه. ل به‌رامبه‌ر كورسیكێ په‌نجه‌ره‌یه‌كا ب په‌رده‌یه‌كا په‌ڕووك هه‌یه. ده‌ما سه‌رۆكێ باژێرڤانیێ هه‌ستكری كو نۆشدار نزیكی وی بوو، پێ یێن خوه هاڤێتنه سه‌رئێك و ده‌ڤێ خوه ڤه‌كر.
ئه‌سكوڤار سه‌رێ سه‌رۆكێ باژێرڤانیێ به‌ر ب رووناهێ ڤه بادا. پشتی ددانێ هه‌ودایی پشكنی، و ب لڤینه‌كا ب هوشداری لاما وی داناڤه سه‌رئێك، وگۆت:
– دێ ددانێ ته هه‌لكێشم، به‌لێ بێ به‌نجكرن.
– چما؟
– چونكی یێ ب كێم و عه‌دابه.
سه‌رۆكێ باژێرڤانیێ به‌رێ خوه دا چاڤێن نۆشداری. ل دووماهێ هه‌ولدا ب بشكوڕیت و گۆت:
– باشه.
نۆشداری به‌رسڤا بشكوڕینا وی نه‌دا. ئامانێ كه‌رسته‌یێن تافیلكری ئینا و دانا سه‌ر میزێ و ب گازه‌كێ سار ژ ئاڤا كه‌لاندی ئینانه ده‌ر، بێی كو هیچ له‌زیه‌ك لێ دیار ببیت. تفدانك ب لیڤا پێلاڤا خوه هنده‌كێ وێڤه بر، و چۆ به‌ر ده‌ستشۆیێ ده‌ستێن خوه بشۆت. ئه‌ڤه هه‌می كرن بێی كو به‌رێ خوه بده‌ته سه‌رۆكێ باژێرڤانیێ، لێ پا چاڤێن سه‌رۆكێ باژێرڤانیێ هه‌ر ل سه‌ر وی بوون.
ددانه‌كێ عه‌قلی یێ خوارێ بوو. نۆشداری پێ یێن خوه ڤه‌كرن و ب كه‌لبه‌تانێ كه‌ل ددان گرت. سه‌رۆكێ باژێرڤانیێ ب توندی خوه ب ده‌ستكێن كورسیكێ ڤه گرت، و ب هه‌موو هێزا خوه پێ یێن خوه ب ئه‌ردی ڤه شداندن.
نۆشداری ب تنێ زه‌ندا خوه بلند كر. بێی هیچ كه‌رب و كینه‌كێ نیشا بده‌ت، ب نه‌رمیه‌كا سار گۆت: – نها دێ به‌هایێ بیست ژ مریێن مه ده‌ی.
سه‌رۆكێ باژێرڤانیێ هه‌ست ب هه‌ڕشینا هه‌ستیێن خوه كر د ناڤ لامێن خوه دا و چاڤێن وی تژی رۆندك بوون. لێ هه‌ناسه‌كا دروست نه وه‌رگرت هه‌تا زانی كو ددان هاته ده‌ر، و پاشی ددانی خوه دنێڤ رۆندكان ڕا دیت. ل وێ گاڤێ نه شیا ژ ئه‌شكه‌نجه‌یا د وان پێنج شه‌ڤێن بۆری بگه‌هیت.
ب بێهنه‌كا كورت خوه نزم كره تفدانكێ، و خوه یا ژێ دباریت. قوپچكێن چاكێتێ خوه یێ ته‌نگ ڤه‌كرن و ده‌سته‌ك كره د ناڤ به‌ریكا په‌نته‌لۆنێ خوه دا، داكو ده‌رسۆكا خوه بینیته ده‌ر. نۆشداری پارچه په‌ڕووكه‌كێ پاكژ داڤێ، و گۆتێ:
– رۆندكێن خوه بستره.
سه‌رۆكێ باژێرڤانیێ د له‌رزی و رۆندكێن خوه دسترین. و ده‌ما یێ مژوولی شووشتان ده‌ستێن خوه بوو، ئه‌سكۆڤارێ نۆشدار بانێ كلینیكێ یێ به‌ر ب هه‌رفتنێ و تۆڕه‌كا ته‌ڤنپیركێ یا تۆزگرتی و هێكێن ته‌ڤنپیركێ و مێریێن مری دیتن. نۆشدار زڤڕی و ده‌ما ده‌ستێن خوه زوها دكرن. گۆته سه‌رۆكێ باژێرڤانیێ:
– غه‌رغه‌ره‌كا ئاڤا خوێ وه‌ربگره، و پاشی هه‌ره بنڤه.
سه‌رۆكێ باژێرڤانیێ، رابوو ژ پێرڤه. سلاڤه‌كا مالئاڤاهیێ یا سه‌ربازی لێ كر و پاشی به‌ر ب ده‌رگه‌هی ڤه چۆ و پێ یێن خوه ل دووڤ خوه دكێشان، و بێی قوپچكێن چاكێتێ خوه یێ ته‌نگ دائێخیته‌ڤه، گۆت:
– بۆ من پسوولێ فرێكه.
– بۆ كێ فرێكه‌م؟ بۆ ته یان بۆ باژیرڤانیێ؟
سه‌رۆكێ باژێرڤانیێ لێ نه‌نێڕی، ل گه‌ل ده‌رگه‌ه گرتنێ گۆت:
– نه‌فره‌ت بیت، هه‌مان تشته.
http://www.classicshorts.com/stories/ootdays.html
