رۆژین: ئه‌ز یا په‌شێمان نینم كو من بڕیارا پێك ئینانا ژیانا هه‌ڤژینیێ دای
رێوار محه‌مه‌د ره‌شید:
هونه‌رمه‌ندا كورد (رۆژین)ێ د دیاره‌كێ دا بۆ رۆژناما ئه‌ڤرۆ دیار كر كو ل رۆژێن بۆری وێ سترانه‌ك ل گه‌ل گرۆپه‌كێ كچێن ئێزدی بناڤێ (گه‌لیێ شنگالێ) گۆتیه كو ئه‌و ستران یا فلكلۆری یه و نوكه به‌رهه‌ڤیان بۆ كلیپكرنا ڤێ سترانێ دكه‌ت و وێ دڤێت د ڤێ سترانێ دا كاره‌كێ تایبه‌ت بۆ كه‌لتۆرێ ئێزدی و لالشێ چێكه‌ت، ژ به‌ر كو هه‌تا نوكه هنده‌ك ژ كه‌لتۆرێ ئێزدیان ڤه‌شارتی مایه و گۆت: “ژ بلی ڤێ سترانێ نوكه مژوولی تۆماركرنا سترانه‌كێ مه بۆ جه‌ژنابوونان كو ئه‌ڤ سترانه ژ په‌یڤ و ئاوازێن من ب خوه یه و من بۆ رۆژبوونا هه‌ڤژینێ خوه گۆتیه و هه‌ر ده‌مێ ژ قووناغا تۆماركرنێ ب دووماهی هات دێ ل كوردستانێ كلیپ ژی كه‌م”.
ناڤهاتیێ ئاماژه دا وێ چه‌ندێ كو نوكه ل باژێرێ دهۆكێ دژیت، به‌لێ ژ هه‌می پارێزگه‌هێن هه‌رێما كوردستانێ زێده‌تر حه‌ز ژ پارێزگه‌ها هه‌ولێرێ دكه‌ت و به‌هرا پتریا ده‌مێ خوه دده‌ته كارێ هونه‌ری، به‌لێ پشتی به‌لاڤبوونا ڤایرۆسێ كۆرۆنایێ داكو داهاته‌كی بۆ ب رێڤه‌برنا ژیانا خوه په‌یدا بكه‌ت كارێ بازرگانی ژی ئه‌نجام دده‌ت و گۆت: “ب رێیا كارێ خوه یێ هونه‌ری ئه‌ز گه‌له‌ك پشته‌ڤانیێ ل كچێن كورد دكه‌م و دخوازم كچێن كورد د ئازاد بن و پێش بكه‌ڤن كو ئه‌ڤه د ده‌مه‌كی دایه ره‌وشا وان ژ سالێن بۆری گه‌له‌ك باشتر لێ هاتیه”.
رۆژینێ خویا كر كو راسته وێ گه‌له‌ك جاران راگه‌هاندبوو كو ئه‌و چوجاران ژیانا هه‌ڤژینیێ پێك نائینیت، به‌لێ ل هه‌یاما بۆری وێ ژیانا هه‌ڤژینیێ ب ئه‌ڤینی دگه‌ل كوره‌كی پێك ئینایه و هه‌تا راده‌یه‌كی هه‌ڤژینێ وێ پشته‌ڤانێ وێ یه بۆ ئه‌نجامدانا كارێن هونه‌ری و گۆت: “به‌ری ژیانا هه‌ژینیێ پێك بینم من هزر دكر زه‌لام د خرابن، به‌لێ پشتی من ژیانا هه‌ڤژینیێ پێك ئینای من بوچوونا خوه گوهۆڕیه و بۆ من دیاربوو كو هه‌ڤژینێ من ئێك ژ زه‌لامێن گه‌له‌ك باشه بۆ من و ئه‌ز یا په‌شێمان نینم كو من بڕیارا پێك ئینانا ژیانا هه‌ڤژینیێ دای”.
ناڤهاتیێ دیار كر كو نوكه بتنێ ئه‌و سترانێن خوه ب شێوه‌یێ كلیپ به‌لاڤ دكه‌ت و دگه‌ل چێكرنا ئه‌لبۆمان نینه، ژ به‌ر كو ب دیتنا وێ كه‌س نه‌شێت گوهداریا هه‌موو تراكێن د ناڤ به‌رهه‌می دا بكه‌ت و ئه‌ڤه دده‌مه‌كی دایه كو وێ هه‌ر ژ ده‌ستپێكا كارێ خوه یێ هونه‌ری و هه‌تا نوكه نه‌ه ئه‌لبۆم چێكرینه و گه‌له‌ك سترانێن د وان ئه‌لبۆمان دا به‌لاڤبووین كلیپ ژی كرینه و گۆت: “گه‌له‌ك جاران داخواز ژ من دهێته‌كرن ئه‌ز سترانێن دوقۆلی بێژم، به‌لێ هه‌تا نوكه ئه‌ز رازی نه‌بوویمه بێژم ژ به‌ر كو ده‌نگێن مه دگه‌ل ئێك نه‌گۆنجاینه یان ستران یا خوه‌ش نه‌بوویه لێ سه‌ره‌رایی ڤێ چه‌ندێ د به‌رنامێ من دایه سترانه‌كا دوقۆلی دگه‌ل سترانبێژێ تورك (نوری هارون) كو ئه‌و دێ ب زمانێ توركی بێژیت و ئه‌ز ژی دێ ب زمانێ كوردی بێژم”.
ل دووماهیێ رۆژینێ ئاشكرا كر كو ل سالێن بۆری وێ پشكداری د چه‌ندین ئاهه‌نگێن جه‌ماوه‌ری یێن مه‌زن دا ل هه‌رێما كوردستانێ كریه و نوكه ژی هه‌ر ده‌مێ داخواز ژێ بهێته‌كرن با به‌رهه‌ڤه پشكداریێ د ڤان جۆره ئاهه‌نگان دا بكه‌ت و گۆت: “ئه‌ز گه‌له‌ك حه‌ز دكه‌م به‌هراپتریا كارێن خوه یێن هونه‌ری ل هه‌رێما كوردستانێ ئه‌نجام بده‌م ژ به‌ر كو مه ستودیۆ و مۆزیكژه‌نێن گه‌له‌ك باش ل هه‌رێمێ هه‌نه”.
