رۆژ كۆبانی: ئه‌ز ل دهۆكێ به‌رنیاس بووم
دهۆك، شاكر ئه‌تروشی:
سترانبێژ رۆژ كۆبانی، كو خه‌لكا باژێرێ كۆبانێ یه ل رۆژئاڤایێ كوردستانی و نێزیكی دو سالانه وه‌ك په‌نابه‌ر ل كه‌مپه‌كا سنۆرێ پارێزگه‌ها دهۆكێ دژیت، د دیداره‌كێ دا بۆ رۆژناما ئه‌ڤرۆ گۆت: هاتنا من بۆ دهۆكێ دو مفا گه‌هاندنه من، یا ئێكێ ئه‌م هاتینه پاراستن چنكو ره‌وشا مه ل رۆژئاڤا ژلایێ ئێمناهیێ ڤه یا باش نه‌بوو، یا دویێ دویێ ژی ل ڤێره ئه‌ز شیام هونه‌رێ خوه بده‌مه نیاسین و ب هاریكاریا چه‌ند هه‌ڤالێن سترانبێژ و مۆزیكژه‌ن ئه‌ز شیام خوه بده‌مه نیاسین و نوكه خه‌لكه‌كێ زۆر وه‌ك سترانبێژ من دنیاسن.
رۆژێ گۆت: ده‌مێ ئه‌ز هاتیمه پارێزگه‌ها دهۆكێ ل ده‌ستپێكێ ل كه‌مپه‌كا زاخۆ ببنه‌جه بووم، پشتی من ده‌لیڤا خوه دیتی هنده‌ك كه‌نالێن ته‌له‌فزیۆنی و رادیۆیان ئه‌ز مێڤانكرم و من ستران بۆ وان دگۆتن، هه‌روه‌سا جاره‌كێ ئه‌ز مێهڤانا به‌رنامێ بێده‌ر بووم ل كه‌نالێ دهۆك تیڤی، پشتی وی به‌رنامه‌ی ئه‌ز زێده‌تر هاتمه نیاسین، لێ ئاریشا من ئه‌وه نوكه ئه‌ز ل كه‌مپه‌كا به‌رده‌ره‌ش دژیم، ئانكو دناڤبه‌را هه‌ردو پارێزگه‌هێن دهۆك و هه‌ولێرێ و كه‌نالێن راگه‌هاندنێ ژی ب تایبه‌ت رادیۆ و ته‌له‌فزیۆن دووری منن و گه‌له‌ك جاران ئه‌ز هاتیمه داخوازكرن لێ ژبه‌ر دووریا رێكێ ئه‌ز زوو ب زوو نه‌شێم به‌رهه‌ڤ ببم.
ل دووماهیێ گۆت: وه‌ك سترانبێژه‌كا كوردا رۆژئاڤا ئه‌ز گه‌له‌كا دلخۆشم كو ل رۆژێن بۆری من پشكداری د هژماره‌كا ئاهه‌نگێن جه‌ماوه‌ری دا كری ل سنۆرێ قه‌زا ئاكرێ و به‌رده‌ره‌ش كو ب هه‌لكه‌فتا سه‌ركه‌فتنا لیستا پارتی بۆ په‌رله‌مانێ ئیراقێ هاتبوونه رێكخستن و دووماهی ئاهه‌نگ ژی دوومی ئێڤاری بوو ل كه‌مپا دۆمیز ل دهۆكێ و هیڤیا من ئه‌وه رۆژه‌ك بهێت ئه‌م ئاهه‌نگێن راگه‌هاندنا ده‌وله‌تا كوردی بگێڕین.
