رۆژ كۆبانی: هونه‌ر ل ده‌ف مه كوردان یێ مری یه
دهۆك، شاكر ئه‌تروشی:
سترنبێژ (رۆژ كۆبانی) كو خه‌لكا رۆژئاڤایێ كوردستانێ یه و نوكه ل كه‌مپه‌كا په‌نابه‌ران ل سنۆرێ پارێزگه‌ها دهۆكێ دژیت، د دیداره‌كێ دا بۆ رۆژناما ئه‌ڤرۆ دیاركر، وێ حازریا خوه كربوو كو سترانه‌كێ ب هه‌لكه‌فتا جه‌ژنا نه‌ورۆزێ تۆمار بكه‌ت، لێ ئه‌و نه‌شیا چنكو كه‌سێ هاریكاریا وێ نه‌كر.
رۆژێ گۆت: ئه‌ز خه‌لكا باژێرێ كۆبانێ مه و ل وێرێ ژدایكبوویمه، لێ دژیه‌كێ بچووكدا مالامه چووینه شامێ و ل وێرێ مه‌زن بوویمه، هه‌روه‌سا ل شامێ من ل سه‌ر مۆزیكێ خواندیه و ده‌ست ب سترانگۆتنێ كریه، پشتی چه‌ند سالان من شووكر و بۆ ده‌مه‌كی ژ سترانگۆتنێ دووركه‌فتم، پاشان دوباره زڤریمه ڤه، پاشان شه‌رێ سوریێ ده‌ستپێكر و جاره‌كا دی ژ سترانگۆتنێ دوور كه‌فتم هه‌تا روودانێن ل (راس ئه‌لعه‌ینێ) چێبووین ژ نه‌چاری ئه‌م ژ وه‌لاتێ خوه ده‌ركه‌فتین و ل ده‌ستپێكێ هاتینه كه‌مپه‌كا په‌نابه‌ران ل زاخۆ و ل وێرێ ته‌له‌فزیۆنا ده‌لال ئه‌ز مێڤانكرم و دیداره‌ك ل گه‌ل من كرن، پشتی ده‌مه‌كی ئه‌م چووینه كه‌مپه‌كا دی ل سنۆرێ قه‌زا به‌رده‌ره‌ش و نوكه ل گه‌ل زارۆیێن خوه ل وێرێ دژیم و هنده‌ك جاران دچمه ئاهه‌نگان سترانان دبێژم، هه‌روه‌سا ب شێوێ خوه به‌خش ل گه‌ل سه‌نته‌ره‌كێ پێشمه‌رگه‌ی یێ نێڤده‌وله‌تی كار دكه‌م.
ل دووماهیێ گۆت: تشتێ ئه‌ز گه‌له‌ك پێ دئێشم ئه‌م كورد قه‌درێ هونه‌ر و هونه‌رمه‌ندێن خوه نوزانین و ده‌مێ هونه‌رمه‌نده‌كێ عه‌ره‌ب یان بیانی دهێت ئه‌م پتر قه‌درێ وان دگرین، له‌ورا ب مخابنی ڤه هه‌ر ده‌م ئه‌ز دبێژم هونه‌ر ل ده‌ف مه كوردان یێ مری یه.
