ریال مه‌درید و سانجێرمان بهێزترین دیدارا چامپیۆنزێ یه
ئه‌ڤرۆ
پشتی هاتیه هه‌لوه‌شاندن بۆ جارا دویێ پشككێشانا قۆناغا 16 یا قاره‌مانیا یانێن ئۆرۆپا قاره‌مانێن خولا چامپیۆنز لیگ و قاره‌مانیا خولا ئۆرۆپا ل باژێرێ نیۆن یا سویسرایێ هاته دوباره‌كرن و ژ بهێزترین یاریێن ڤێ قۆناغێ پاریس سانجێرمان یا فره‌نسی دێ هه‌مبه‌ری ریال مه‌درید یا ئسپانی بیت و د قاره‌مانیا خولا ئۆرۆپا دا به‌رشه‌لۆنا هه‌مبه‌ری ئاسته‌نگا ناپۆلی یا ئیتالی.
پشككێشانا چامپیۆنزێ بڤی ره‌نگی هاته كرن: (سالزبۆرگ یا نه‌مسا- بایرن میونخ یا ئه‌لمانی)، (سپۆرتینگ له‌شبۆنا یا پورتۆگالی – مانچسته‌ر ستی یا ئنگلێزی)، ( به‌نڤیكا یاپورتۆگالی- ئه‌یاكس یا هوله‌ندی)، (چێلسی یا ئنگلێزی- لیل یا فره‌نسی)، ( ئه‌تله‌تیكۆ مه‌درید یا ئسپانی- مانچسته‌ر یۆنایتد یا ئنگلێزی)، (ڤیاریال یا ئسپانی- یۆڤانتۆس یا ئیتالی)، ( ئه‌نتر میلان یا ئیتالی- لیڤه‌رپۆل یا ئنگلێزی)،( پاریس سانجێرمان یا فره‌نسی – ریال مه‌درید یا ئسپانی).
لدووڤ بڕیارا ئێكه‌تیا ته‌پا پێی یا ئۆرۆپا كو چار رۆژ بۆ یاریێن گه‌ڕا چوونێ یێن قۆناغا 16ێ ده‌ستنیشانكرینه ب شێوازێ هه‌ر رۆژه‌كێ دو یاری هێنه كرن ئه‌وژی ل 15، 16، 22، 23ێ شوباتا بهێت یا سالا 2022، هه‌روه‌سا یاریێن هاتنێ ل هه‌شت، نه‌ه و 15 و 16ێ یێن ئادارا سالا بهێت هێنه ئه‌نجامدان، هه‌روه‌سا بڕیار هاته دان سیسته‌مێ هژمارتنا گۆلان ژ ده‌رڤه‌یی یاریگه‌ها خوه د ده‌مێ وه‌كهه‌ڤیا خالان دا هاته هه‌لوه‌شاندن، ئه‌گه‌ر وه‌كهه‌ڤبوون دێ به‌ره‌ڤ ده‌مێن زێده‌كری یێن یاریێ چن هه‌تا بگه‌هیته لێدانێن په‌نه‌لتیێ ژبۆ ئێكلاكرنا تیمه‌كا ده‌ربازبوویی، به‌روڤاژی سالێن بوری كو هه‌كه‌ر خالێن هه‌ردو یانه وه‌كو ئیك بان ئه‌و یانه زێده‌تر گۆل تۆماركرین دا ده‌ربازبیته قۆناغا هه‌شتێ.
دووڤدا پشككێشانا قاره‌مانیا خولا یانێن ئۆرۆپا هاته ئه‌نجامدان و یاریێن گه‌ڕا ئێكێ دێ بڤی شێوه‌یی بن،(دۆرتمۆند یا ئه‌لمانی – رێنجرز یا ئوسكوتله‌ندی)،(به‌رشه‌لۆنا یا ئسپانی – ناپۆلی یا ئیتالی)، (سیڤییا یا ئسپانی- دینامۆ زاگرۆب یا ئۆكراین)، (پورتۆ یا پورتۆگالی- لاتسیۆ یا ئیتالی)، (شیریف تیراسبۆل یا مۆلدیڤیا- سپۆرتینگ براگا یا پورتۆگالی)، (ئه‌تلانتا یا ئیتالی- ئۆلۆمپیاكۆس یا یۆنانی)، (لایبزیگ یا ئه‌لمانی- ریال سوسیداد یا ئسپانی) ،( زێنیت پترۆسبۆرگ یا روسیا- ریال پیتس یا ئسپانی)، یاریێن قۆناغا چوونێ دێ ل 17ێ شوباتا سالا 2022ێ هێنه كرن و یێن قۆناغا هاتنێ و ده‌ربازبوونێ ل 24ێ هه‌مان هه‌یڤ هێته ئه‌نجامدان.
بۆ زانین ل سه‌ر نه‌رازیبوونا هه‌ردو یانێن ئه‌تله‌تیكۆ مه‌درید یا ئسپانی و مانچسته‌ر یۆنایتد یا ئنگلێزی بۆ شێوازێ پشككێشانێ ئێكه‌تیا ته‌پا پێی یا ئۆرۆپا بڕیاردا دوباره بهێته ئه‌نجامدان ئه‌وا لدووڤ داخویانیێن به‌رپرسێن ئۆرۆپایێ كو خه‌له‌تیه‌كا ته‌كنیكی په‌یدابوو.
