ریال مه‌درید و چێلسی د یاریه‌كا ئاگرین و تۆلڤه‌كرنێ دا
ئه‌ڤرۆ،
بڕیاره ئه‌ڤرۆ ژی ل ده‌مژمێر 10ی شه‌ڤ حه‌ز ژێكه‌رێن یاریا ته‌پا پێی و جه‌ماوه‌رێ وه‌رزشی ل پرانیا وه‌لاتێن جیهانی چاڤه‌ڕێ دو یاریێن دی یێن بهێزه ژ چارچووڤێ هه‌ڤڕكیێن گه‌ڕا ئێكێ یا چوونێ ژ قاره‌مانیا یانێن ئۆرۆپا قاره‌مانێن خولا چامپیۆنز لیگ بن و یاریا چێلسی و ریال مه‌درید دهێته هژمارتن ئاگرین و بۆ تۆلڤه‌كرنێ یا قۆناغا چارێك دووماهیێ.
- چێلسی – ریال مه‌درید
یانا ریال مه‌درید یا ئسپانی خودانا 13 ناسناڤێن قاره‌مانیێ و ب هیڤیێن مه‌زن دێ بیته مێڤانه‌كا سه‌نگ بۆ خودانێن ئه‌ردی یانا چێلسی یا ئنگلێزی ئه‌وا ناسناڤێ وه‌رزێ بوری ده‌ستڤه ئینایی كو دێ ل یاریگه‌ها ستامفۆرد برێدچ ئێك ژ گرنگترین یاریێن ڤێ قۆناغێ و یا ئاگرین بیت، یانا ئسپانی دێ ب دروشمێ تۆلڤه‌كرن و سه‌ركه‌فتنا ئێكێ هێته د ناڤ یاریگه‌هێ دا پشتی ل وه‌رزێ بوری ژ سه‌رجه‌مێ هه‌ردو یاریێن پێش دووماهیا قاره‌مانیێ دا چێلسی وه‌كهه‌ڤی و سه‌ركه‌فتنه‌ك لسه‌ر یانا شاهان تۆماركری و ده‌ربازبوویه یاریا دووماهیێ و ناسناڤێ خوه یێ دویێ د چامپیۆنزێ دا ب ده‌ستڤه ئینایی پشتی ب سه‌ركه‌فتی ل سه‌ر مانچسته‌ر ستی ب گۆله‌كێ بێ به‌رامبه‌ر، یاریزانێن ریال مه‌درید دێ ب زاخه‌كا بلند هێنه دناڤ یاریێ دا تایبه‌ت پشتی سه‌ركه‌فتنه‌كا گرنگ د خولا ئسپانیا دا لسه‌ر سلتا ڤیگۆ ئینایی، ژلایێ خوه‌ڤه چێلسی دێ بهێزا یاریزان و ب چه‌كێ جه‌ماوه‌رێ خوه شه‌ڕی بۆ سه‌ركه‌فتنێ و به‌رده‌وامیا پێشڤه‌چوونێ كه‌ت به‌ری دیدارا دویێ یا چاره‌نڤیسی بۆ ده‌ربازبوونێ ئه‌وا دێ ل مه‌درید هێته كرن، هه‌رچه‌نده ترس كه‌فتیه دلێ جه‌ماوه‌رێ ریال مه‌درید د یاریا ئه‌ڤرۆ دا لێ داخویانیا راهێنه‌رێ وان یێ ئیتالی كارلۆ ئه‌نشیلۆتی ئه‌وێ تۆشی ڤایرۆسێ كورورنایی بووی و نه‌شێت ل گه‌ل تیما خوه به‌رهه‌ڤ بیت نامه‌كا پشتراستیێ هنارتیه كو دیاركریه كاره‌كێ مه‌زن هاتیه كرن بۆ ده‌ستڤه‌ئینانا سه‌ركه‌فتنێ و ئارمانجا وان تۆلڤه‌كرن و ناسناڤێ چامپیۆنزێ یه.
یانا ریال مه‌درید نه شیایه د مێژوویا خوه دا سه‌ركه‌فتنێ ل سه‌ر چێلسی تۆماربكه‌ت د هه‌ر پێنچ یاریێن دناڤبه‌را واندا هاتینه كرن، سێ جاران یانا ئنگلێزی سه‌ركه‌فتن ل سه‌ر تۆماركریه هه‌مبه‌ری دو وه‌كهه‌ڤیان، دووماهی جار ل وه‌رزێ بوری ده‌مێ دیاریا چوونێ دا وه‌كهه‌ڤبووی و یاریا هاتنێ و ده‌ربازبوونێ بۆ دووماهیا قاره‌مانیێ چێلسی سه‌ركه‌فتن تۆماركربوو، دادڤانێ فره‌نسی كلیمۆنت تۆربان دێ یاریێ بڕێڤه به‌ت.
- پێكهاتیێ پێشبینی كری
دهێته پێشبینی كرن راهێنه‌رێ چێلسی یێ ئه‌لمانی تۆماس تۆخێل ب پلانا 3-4-2-1 یاریێ بڤان یاریزانان بكه‌ت.
گۆلپارێز: ئێدوار مندی.
هێلا به‌ره‌ڤانیێ: ئه‌ندریاس كرێستنسن، تیاگۆ سێلڤا، ئه‌نتونیۆ رۆدرێگر.
هێلا ناڤین: رێس جێمس، نگۆلۆ كانتی، جورجینیۆ، ماركۆس ئالۆنسۆ.
هێلا هێرشبرنێ: میسۆن ماونت، حه‌كیم زیاش، كای هاڤیرتش.
ژلایه‌كێ دووڤه پێكهاتیێ پێشبینیكری یێ راهێنه‌رێ ریال مه‌درید كارلۆ ئه‌نشلۆتی ئه‌وێ دێ ب پلانا 4-3-3 یاریێ بڤی شێوه‌یی كه‌ت.
گۆلپارێز: كۆرتۆا.
هێلا به‌ره‌ڤانیێ: فێرلان مندی، داڤید ئالابا، ئیدیر میلیتاۆ، دانی كارباخال.
هێلا ناڤین: لۆكا مۆدرێچ، كاسێمێرۆ، تۆنی كروس.
هێلا هێرشبرنێ: ڤێنیسیۆس جونیرۆ، كه‌ریم بنزیما، ماركۆ ئه‌سینسیۆ
- ڤیاریال – بایرن میونخ
یاریا دویێ یا ئه‌ڤ شه‌ڤه و جه‌ماوه‌ر چاڤه‌ڕێ بیت دناڤبه‌را خوون گه‌ڕمێن ئسپانیا و شاره‌زاهیا ئه‌لمانیا، یانا ڤیاریال یا سپانی ئه‌وا ئێك ژ تیمێن سه‌رنجراكێش و ب هێزه‌كا ب نڤشێ نوو هاتیه دناڤ چامپیۆنزێ ل وه‌رزێ ئه‌ڤ ساله دا دێ ل یاریگه‌ها خوه لاسیرامیكا مێڤانداریا بهێزترین هه‌ڤڕكا خوه و ئاسته‌نگا ئارمانجا خوه یانا بایرن میۆنخ یا ئه‌لمانی كه‌ت، هه‌رچه‌نده ڤیاریال نه‌شیایه چو ناسناڤێن قاره‌مانیێ ببه‌ت لێ هه‌رده‌م بوویه تیمه‌كا هه‌ڤڕك و قۆناغا 16ێ دا شیابوو یانا یۆڤانتۆس یا ئیتالی دووربێخیت و سالا بوری ناسناڤێ ئێكه‌تیا ئۆرۆپا ژی ب ده‌ستخوه‌ڤه ئینایه، ئانكو تیمه‌كا ب سانه‌هی نابیت ژبه‌ركو ب نڤشه‌كێ نوو و خوون گه‌ڕمن، ژلایێ خوه‌ڤه یانا بایرن میونخ ئه‌وا شاره‌زاهیه‌كا باش د چامپیۆنزێ دا هه‌یه و شیایی شه‌ش جاران ناسناڤانێ قاره‌مانیێ ببه‌ت، ل وه‌رزێ ئه‌ڤ ساله ژی به‌ربژارێن بهێزه بۆ ناسناڤێ حه‌فتێ و دێ پشتبه‌ستێ لسه‌ر كۆمه‌كا ستێرێن خوه كه‌ت تایبه‌ت گۆلكه‌رێ قاره‌مانیێ رۆبێرت لیڤاندۆڤێسكی ئه‌وێ هه‌تا نوكه 12 گۆل تۆماركرین، ئه‌ڤ یاریه دهێته هژمارتن یا سێیێ دناڤبه‌را هه‌ردو تیمان دا یانا ئه‌لمانی شیابوو د هه‌ردو یاریێن بوری دا سه‌ركه‌فتنێ تۆماربكه‌ت، دادڤانێ ئنگلێزی ئه‌نتۆنی تایلۆر دێ یاریێ بڕێڤه‌به‌ت.
- پێكهاتیێ پێشبینی كری
پێشبینی دهێته كرن راهێنه‌رێ یانا بایرن میونخ جۆلیان ناجلسمان ب پلانا 4-2-4 یاریێ بكه‌ت كو پلانه‌كا تایبه‌ته و پشتبه‌ستنێ لسه‌ر هێرشێن هه‌ردو لایێن د یاریگه‌هێ دا دكه‌ت و بڤی ره‌نگی.
گۆلپارێز: مانوێل نوێر
هێلا به‌ره‌ڤانیێ: لۆكاس هێرناندز، دایۆت ئۆبامیانكۆ، تانگیۆ كۆاسی، بنیامێن بافارد،
هێلا ناڤین: لیۆن گۆریتسكا، جوشۆا كێمتچ.
هێلا هێرشبرنێ: كینگێسلی كۆمان، تۆماس مۆله‌ر، لیوری سانی، لیڤاندوڤێسكی هێرشبه‌رێ ئازاد.
پێكهاتیێ پێشبینی كری یێ ڤیاریال كو راهێنه‌ر ئۆنایی ئیمری پشتبه‌ستنێ لسه‌ر كه‌ت ب پلانا 4-4-2 یه.
گۆلپارێز: جیرۆمی رۆلی.
هێلا به‌ره‌ڤانیێ: ئاستۆبینان، پاۆ تۆرێس، ئالبیول، ئۆریێ
هێلا ناڤین: تچۆكیزی، مۆی جۆمێز، ئیبۆرا، تریگۆرێس.
هێلا هێرشبرنێ: بۆلایی دییا، جیرارد مۆریدۆ.
.
