ریال مەدرید و بایرن دێ بزاڤێن دەربازبوونا خوە مسۆگەر كەن
بڕیارە ئەڤرۆ ژی هەشت یاریێن دی ژ چارچووڤەیێ هەڤڕكیێن گەڕا چارێ و قۆناغا كوما قارەمانییا یانەیێن ئۆرۆپا قارەمانێن خولا چامپیۆنز لیگ یا تەپا پێی بهێنە ئەنجامدان ئەوا جەماوەرێ وەرزشی ل بەندا چەند یاریێن بهێزە.
كۆما ئێكێ
یانەیا بایرن میونخ یا ئەلمانی بەربژارەكا دی یا بهێز بۆ ناسناڤێ چامپیۆنزا ئەڤ سالە دێ ل یاریگەها خوە ئالیانز ئارینا مێڤاندارییا گالاتا سارایی یا توركی كەت، بایرن ئەوا ب نمرەیێن تەمام ژ سێ یارییا نەهـ و سەرێ لیستێ دهێت دێ بزاڤێ كەت سەركەفتنا ئەڤ شەڤە دەربازبوونا خوە بكەتە فەرمی بۆ قۆناغا 16ێ، لێ گالاتا سارایی ژی هیڤیێن مەزن هەنە جهێ خوە یێ رێزا دویێ پارێزیت ئەوا نوكە ب چار خالان رێزا دویێ دهیت ودێ پشت گەرمیێ گۆلكەرێ خوە ماورۆ ئیكاردی كەت ئەوێ پێنچ گۆل د چامپیۆنزێ هەین لێ دبیت زەحمەتەكا مەزن بەرانبەر زلهێزەكا ئۆرۆپا ببەت و نەگەهیتە ئەوێ هیڤیێ، ژلایێ خوەڤە مانچستەر یۆنایتد یا ئنگلتەرا دێ بیتە مێڤانا یانەیا كۆبنهاگن یا هۆلەندی راوەستیێت ژبۆ بەردەوامییا پێشڤەچوونێ و سەركەفتنا وێ، یانەیا ئنگلتەرا ب سێ خالان رێزا سێیێ دهێت، یانەیا هۆلەندی بتنێ ئێك خال هەیە رێزا چارێ دهێت، هەردو یاری دێ ل دەمژمێر 11ـی شەڤ هێنە كرن.
كۆما دویێ
ئێك ژ یاریێن دی یێن ب هێز دناڤبەرا دو چەمسەرێن ئۆرۆپا ئارسنال یا ئنگلتەرا دێ مێڤاندارییا سیڤییا یا ئسپانی كەت، د یارییا ئێكێ یا هەردو یانەیان ئارسنالێ ئەوا نوكە ب شەش خالان رێزا ئێكێ دهێت شیابوو ل یاریگەها وێ سەركەفتنێ بینت لەوما بۆ یارییا ئەڤ شەڤە دبیت هیڤیێن وێ ژی ژ ناڤ ببەت ئەوا ب دو خالان رێزا چارێ دهێت، ژلایەكێ دووڤە لانس یا فرەنسی ئێك ژ یانەیێن دهێنە هژمارتن هەسپێ رەش یێ چامپیۆنزێ ب پێنج خالا رێزا دویێ دهێت دێ بیتە مێڤانا ئایندهۆڤن یا هولەندی خودانا رێزا چارێ ب دو خالان، ئەڤ یارییە چارەنڤیسە بۆ هەردو یانەیان و دۆپاتكرن بۆ هەڤڕكییا پلێتا دەربازبوونێ هەردو یاری دەمژمێر 11ێ شەڤێ هێنە ئەنجامدان.
كۆما سێیێ
ل دەمژمێر 11ـی شەڤ یانەیا ریال مەدرید یا ئسپانی خودانا زوورترین ناسناڤێن چامپیۆنزێ ب14 ناسناڤان و ئێك ژ بەربژارێن بهێز بۆ چامپیۆنزا ئەڤ سالە دێ ل یاریگەها خوە بیرنابیۆ مێڤاندارییا سپۆرتینگ براغا یا پۆرتۆگالی كەت، یانەیا ئسپانی ب سەركێشییا ستێرێن خوە بیلینگهام، فێنێسیۆس جونیرۆ، تۆنی كرۆس، لۆكا مۆدرێچ و خیسیۆس و كاماڤینگا شیانێن مەزن هەنە بۆ دەربازبوونا ئاستنەگا یانەیا پۆرتۆگالی ئەوا سێ خال كۆمكرین و رێزا سێیێ دهێت و باش دزانیت ئەركێ وێ ب سانەهی نینە لێ دێ بزاڤێ كەت هیڤیێن خوە ژ دەست نەدەت، ژلایێ خوەڤە یانەیا ناپۆلی یا ئیتالی ل یاریگەها خوە ب مۆرالەكا بلند مێڤاندارییا یۆنیۆن برلین یا ئەلمانی كەت، ناپۆلی خودانا شەش خالانە و رێزا دویێ دهێت و سەركەفتنا وێ یا ئەڤ شەڤە دێ هیڤیێن دەربازبوونێ نێزكتر لێكەت تایبەت هەكە سپۆرتینگ دگەل ریالێ خوسارەت بیت، یۆنیۆن چو خال نینن و رێزا چارێ دهێت و چو هیڤیێن دەربازبوونێ نینن ئەڤ یارییە دێ ل دەمژمێر 8:45 شەڤ هێتە ئەنجامدان.
كۆما چارێ
د ڤێ كۆمێ دا شەڕێ سەرێ لیستێ و پلێتا دەربازبوونێ دناڤبەرا سێ یانەیان ئاگرینە، ریال سوسیداد یا ئسپانی دێ چەكەكێ مەزن و پلانێن سەركەفتن ژبۆ پاراستنا سەرێ لیستێ هێتە دناڤ یاریێ دا دەمێ مێڤاندارییا بەنفیكا یا پۆرتۆگالی دكەت، سوسیداد ب حەفت خالان رێزا ئێكێ دهێت و بەنفیكا چو خال نینن و رێزا دووماهیێ دهێت لێ رامانا وێ نادەت تیمەكا ب سانەهی نابیت و دبیت ترسێ بۆ خودانا سەرێ لیستێ پەیدابكەت، بەرانبەر دا هەڤڕكا سەرێ لیستێ ئەنتەر میلان یا ئیتالی خودانا رێزا دویێ ب حەفت خالان كێمترییا گۆلەكی یە ژ خودانا سەرێ لیستێ دێ بیتە مێڤانا رێدبۆل سالزبۆرگ یا نەمسا ئەوا سێ خال كۆمكرین و رێزا سێیێ دهێت، هەكە هەر ئێك ژ یانەیا ریال سوسیداد و ئەنتەر میلان سەركەفتن د یاریێن خوە دا ئینان دێ دەربازبوونێ بۆ قۆناغا 16ێ مسۆگەر كەن.
