رێبوار تەوفیق: نوکە مۆزیک و ڤیدیۆ کلیپ ب تەمامی کەفتینە د خزمەتا ھونەرێ بیانی دا
ئەڤرۆ، زنار تۆڤی: سترانبێژ، رێبوار تەوفیق بەنگینە، خەلکێ باژێرێ سلێمانیێ یە و نوکە ژی ل ھەمان باژێر دژیت، د دیدارەکێ دا بۆ رۆژناما ئەڤرۆ دیار کر کو: دووماھی کارێ وی تۆمارکرنا سترانەکێ بوو ب ناڤێ “بۆ کۆچی ئازیزان”، وی ئەو سترانە ب وان کەسان گۆتیە، یێن کو ب ئەگەرێ ڤایرۆسێ کۆرۆنایێ وەغەر کرین، ھەلبەست یا بەندی عەلی بوویە، کارێ ژەنینا عودێ ژ لایێ خانما نیگار بوبان ڤە ھاتییە کرن و کارێ موزیک و ڤیدیۆیێ ژ لایێ فریا کالێ ڤە ھاتییە ئەنجامدان، ھەروەسا ل سالا ١٩٧٨ وی بەرھەمێ دو ئاوانەکە بەلاڤکریە، سرۆدا کە ئێوەدێن ل سالا ١٩٩٤ تۆمارکریە، پشتی ھنگێ وی سترانا نیشتیمانی ون و ھاواری شەھید چێکریە، کو ئەڤ ھەر دو سترانە ژ پەیڤێن سەلام عوسمانی و کارێ موزیکێ ژی ژ لایێ فریا کالێ ڤە بۆ ھاتینە کرن، ھەروەسا وی چەندین کارێن دیتر ژی تۆمار کرینە.
ناڤھاتی زێدەتر گۆت: من ب گۆتنا سترانان پشکداری د چەندین کارێن شانۆیی دا کرینە، ژ وان ژی شانۆگەریا ” رێگا ” ژ نڤێسینا چیخۆفی و ژ دەرھێنانا عەلی سەعیدی بوویە، شانۆگەریا ” ماریانا پیندا ” ژ نڤێسینا لۆرکا و دەرھێنانا ئیبراھیم چێوار بوویە، ل سالێن ھەشتییان ل سەدێ بوری ئەڤ شانۆگەریە، ل ھۆلا تیپا پێشرەو یا شانۆیا کوردی ھاتینە نیشادان، ھەروەسا من ستران ل شانۆگەریا ” دادگا “، کو ژ نڤێسینا فوئاد مەجید مسری بوویە گۆتیە، ئەڤ شانۆگەرییە ل دەستپێکا سالێن نۆتان ل سەر شانۆیا ھونەرمەندان ل سلێمانیێ ھاتییە نیشادان.
رێبوار ھێشتا دبێژیت: ل سالێن حەفتێ و ھەشتێیان پانتایا ھونەر و موزیک و سترانا کوردی ل چاڤ جاران یا بەرفرەھتر بوو، ھەر چەندە ھندەک کێماسی تێدا ھەبوون، ل وی دەمی کارێن گەلەک باش ھاتنە ئەنجامدان، ل گەل ھندێ ژی، ھندەک ھونەرمەندان کارێن نەباش و موزیکێن بیانی ئینانە دناڤا موزیکا کوردی دا و ڤێ چەندێ کاریگەریەکا خراب کرە سەر ھونەرێ کوردی، لێ سترانبێژێن وی دەمی گەلەک ب ھشیاری و ب قالبەکێ کوردی ستران دگۆتن، لێ ئەو کارێ نوکە دھێتە ئەنجامدان، نە ستران بەلکو موزیکا سترانێ و ڤیدیۆ کلیپ ژی ب تەمامی کەفتینە د خزمەتا ھونەرێ بیانی دا.
