رێزانێ كلیپەكا نوو بۆ نەورۆزێ بەلاڤكر
زنار تۆڤی:
خانما سترانبێژ رێزان شێروان، كو كچا هونەرمەند كازۆیە، خەلكا باژێرێ وانێ یە ل باكورێ كوردستانێ، د دیدارەكێ دا بۆ رۆژناما ئەڤرۆ دبێژیت: پێدڤییە هونەرمەند نە راوەستیت و بەردەوام كارێن هونەری یێن نوو پێشكێشی حەزژێكەرێن دەنگێ خوە بكەت، هەروەسا ئەز ژی وەكو هونەرمەندەكا كورد، سالانە چەندین كارێن هونەری یێن نوو پێشكێشی گەلێ خوە دكەم، بەری سێ هەیڤان من كلیپەكا نوو ب ناڤێ (كانیا چیا) بەلاڤ كربوو، نوكە ژی بۆ نەورۆزا 2025 ێ، من سترانەكا نوو بەرهەڤكریە، كو ناڤێ سترانێ ژی (نەورۆزە) پەیڤ و ئاوازێن ڤێ سترانێ یێن هونەرمەند كازۆی نە، كارێ مۆزیكێ ژ لایێ مۆزیكژەن (سینان بۆزوبا) ڤە هاتیە كرن، ئەڤ كلیپا نوو دیاریە بۆ هەموو خەلكێ كوردستانێ.
ناڤهاتیێ گۆت: من ل بەرە د ئەڤ سالە دا چەندین ستران و كارێن دیتر یێن هونەری بەلاڤ بكەم، ل گەل هندێ ژی ئەز دچمە ئاهەنگ و هەلكەفتێن كوردان.
