رێزانێ كلیپەكا نوو بەلاڤكر
زنار تۆڤی:
خانما سترانبێژ (رێزان شێروان) د دیدارەكێ دا بۆ رۆژنامەیا ئەڤرۆ گۆت: بەری چەند رۆژان من كلیپەكا نوو كو ب شێوێ پۆتپۆری بوویە بەلاڤكر، ئەو ژی سترانێن (مە بهارە، هەلەمەندێ، من بڕەڤینە) بوون، هەروەسا ئەڤ هەرسێ سترانە بۆ من گەلەك د گرنگ بوون، چونكی سترانێن سەردەمێ زارۆكاتیا من بوون، ئەو سترانە من ب دەنگێ بابێ خۆ، هونەرمەند كازۆیی و ب دەنگێ دایكا خۆ، ب دەنگێ مامێ خۆ و مەتا خۆ، ل دەمێ زارۆكاتیا خۆ من گۆهدارییا وان سترانان كرییە، دیسان د هەموو ئاهەنگ و كۆنسێرتان ژی من ئەو سترانە گۆتینە، لەوما من ڤییا ب رەنگەكێ پرۆفیشنال ئەز ژی وان سترانان تۆماربكەم و پیشكێشی گەلێ خۆ و حەزژێكەرێن دەنگێ خۆ بكەم.
هەروەسا گۆت: ئەڤ سترانە ژ پەیڤ و ئاوازێن كازۆیی نە، سترانا ( هەلەمەندێ) ژ پەیڤ و ئاوازێن كەمالێ خانێ نە، سترانا (من بڕەڤینە) سترانا زارۆكاتیا منە، ئەڤ بەرهەمە ب رێڤەبەریا ردوان بۆزوبا یە و ژلایێ دەرهێنەر سیداد قەدری ل باژێرێ زاخۆ هاتییە تۆماركرن، كارێ دەرهێنانا كلیپێ ژی ژلایێ وەیسەل ئاسلان ڤە، زانا پرۆدەكشن هاتیەكرن.
