رێكا گوپیتكێ یا ب زەحمەتە، لێ مانا وێ ب زەحمەتترە
بەیارێ زاویتەیی
د مەها نیسانا ئەڤسالە دا، یانا دهۆك ئاهەنگ ب دەلیڤەكا دیرۆكی گێران دەمێ بوویە قارەمانا كەنداڤی، كو جارا ئێكێ یە یانەكا ئیراقی و كوردستانی ڤی ناسناڤی بدەستڤە دبەت، سەقا ئاهەنگگێران بوو، هیڤی دبلندبوون، پاشەرۆژ ژی وەسا دیار بوو یێ گەش بوو. لێ پشتی وێ یەكێ یانێ خوە د كریزەكا راستەقینە دا ل سەر ئاستێ خولا ستێرێن ئیراقێ دا دیت، كو پاشڤەزڤرینەكا ل بەرچاڤ بخوەڤە دیت ژ روویێ یاریێ و ئەنجامان ڤە.
دا ئەم بیرا خوە ل قەبارێ وان دەستكەفتان بینین یێن یانا دهۆك ل وەرزێ بووری بدەستڤەبرین، یانە ب دەستڤەبرنا ناسناڤێ كەنداڤی ب تنێ رازی نەبوو كو ل سەر گەلەك یانێن كەنداڤی یێن كەڤنار سەركەفت بوو، بەلكو هیڤیێن وێ پتر بوون هەتا ناسناڤێ كۆبا ئیراقێ ل سەر كیستێ زاخۆ بدەستڤەبری، ڤان دەستكەفتێن جووت یانا دهۆك ئێخستە د بازنەیێ بالكێشییێ دا و ئاستێ پێشبینییان گەلەك بلندتر لێكر.
د ڤی وەرزی دا 2024 – 2025 چیرۆكەكا تەمام جودا ڤەدگێریت، ئەنجامێن خراب د خولا ستێرێن ئیراقێ دا ئاماژە ب وێ یەكێ دكەن كو تیم یا ل همبەری ئاریشێن كوور، تیم یا ل رێزبەندێن داویێ و ئەڤە بۆ تیمەكا بوویە قارەمانا كەنداڤی وێرانی یە. ژمارە درەوان ناكەن، ئەنجامێن لاواز د گەرێن دەستپێكێ دا، وەكهەڤی و شكەستن همبەری تیمێن شیانێن وان كێمتر، هەموو ئاماژەنە كو تشتەك ژ رهوریشالان د تیمێ دا هاتیە گوهارتن.
ئێك ژ مەزنترین چالنجێن دكەڤنە د رێكا یانێن وەرزشی دا دەمێ ژ نشكەكێ ڤە سەركەفتنان دئینن، ئەو چالنج ژی شیانێن كارگێرییەكا باش و پاراستنا وان دەستكەفتانە، دهۆك یا ل وەرزێ بووری ب عەقلیەتا لاوازیێ یاری دكر، خوە دیت قارەمان و هەموو یێن رادهێلنێ، ئەڤ گوهۆرینا دەروونی دبیت كارتێكرنەكا مەزن ل سەر ئەدایا یاریكەران و ستافێ راهێنەران هەبیت، ژبەركو پشتی دەستكەفتێن مەزن، پێشبینی د تیمێ دا گەلەك مەزنتر لێهاتن، جەماوەر و پشتەڤان، كارگێری، راگەهاندن، هەموویان پێشبینی دكر كو تیم دێ د هەموو یارییان دا سەركەڤیت، ئەڤ فشارا زێدەتر دبیت كارتێكرنەكا نەرێنی ل سەر ئەدایا یاریكەران كربیت، بتایبەت د چارچووڤێ شارەزاییەكا سنۆردار دا ژبۆ سەرەدەریكرنێ ل گەل ڤان جۆرە هەلوەستان.
پشكداری د پتر ژ ئێك قارەمانی دا ل وەرزێ بووری، ژ وان ژی یاریێن ئێكلاكەر د قارەمانییا كەنداڤی و كۆبا ئیراقێ دا، وزەیا یاریكەران ژ روویێ جەستەیی و دەروونی ڤە لاواز كر، نەبوونا دەمێن پێدڤی بۆ بێهنڤەدانێ یان لێكزڤراندنا كارا یا یاریكەران دبیت ئەگەرەك بیت بۆ پاشڤەزڤرینا ئاستێ تیمێ.
سەركەفتن بالێ بۆ مرۆڤی رادكێشیت، بالكێشی ژی ئۆڤەران دئینیت، دبیت یاریكەرێن سەرەكی یێن سەركەفتنا وەرزێ بووری بدەستڤەئینای ئۆڤەر بۆ ژ یانەیێن مەزنتر هاتبن و رەوشەكا نەسەقامگیر پەیدا كربیت، خو هەكە ئەو یاریكەر مابن ژی، هزركرن د پاشەرۆژێ دا و ئۆڤەرێن باش دێ كارتێكرنێ ل فۆكسا وان كەن.
راستە كارگێریێ گرێبەست ل گەل یاریكەرێن نوو ئیمزا كرینە، لێ گونجاندنا تەكتیكی د شەڤ و رۆژەكا دا چێنابیت، یاریكەرێن نوو پێدڤی ب خوە گونجاندنێ نە ل گەل شێوازێ یاریێ و هەڤالێن نوو، دبیت ئەو پێشبینیێن گۆتین ئەڤ یاریكەرە دێ راستەوخۆ ئاستی بلند كەن نەراست بن.
ژ ئالییەكێ دی ڤە سەركەفتن كارگێرییێ دئێخیتە همبەری چالنجێن نوو، چاوانییا كارگێرییا داهاتێن دارایی یێن نوو، پلاندانانا ستراتیژی، سەرەدەری ل گەل فشارێن راگەهاندنێ، ڤان هەموویان پێدڤی ب شارەزاییێ هەیە كو دبیت ل نك كارگێریا یانا دهۆك نەبن، بریارێن بلەز یان بریارێن خواندن بۆ نەهاتیە كرن پشتی سەركەفتنێ دبیت ئەنجامێن گەلەك خراب هەبن.
هەروەسا یانێن هەڤرك خواندنەكا باش بۆ یانا دهۆكێ كرییە، شێوازێ یاریكرنێ یێ ل وەرزێ بووری بوویە سۆپرایز و كارتێكرن كری یێ هاتیە نیاسین و ئاشكرا بووی، هەكە ستافێ راهێنەران تەكتیكێن نوو ڤەنەبینن یان چارەسەریێن جودا ڤەنەبینن، ئەنجامێن لاواز دێ پێشبینیكری بن. هەكە كارگێری و ستافێ تەكتیكی شیان ئاریشان دەستنیشان بكەن و بریارێن دروست بدەن، تیم هێدی هێدی دێ ڤەگەریتە سەر هێزا خوە، ڤێ یەكێ ژی هەدار و كارێ رژد پێدڤێن، یان ژی دوبارە پێداچوون د هندەك بژاردەیێن تەكتیكی و كارگێری دا پێدڤینە. لێ هەكە ئاریشە بێ چارەكرن بەردەوام بوون، تیم دێ خوە د هەڤركییا دانەكەفتنێ بۆ خولا د بن دا بینیت، ئەڤ سیناریۆیە دبیت یا دژوار بیت، لێ ژ كەتواری یا دوور نابیت هەكە گاڤێن رژد نەهێنە هاڤێتن. یان ژی هەكە كارگێری وەسا ببینیت كو چارەسەرییا هەرە باش ئەوە تیمێ دوبارە رێكبێخن و یاریكەرێن سەرەكی بهێلن و یێن ئاستێ پێدڤی پێشكێش نەكری دوور بكەن، ڤێ یەكێ ژی پێدڤی پارەیەكێ مەزن و دیتنەكا زەلال هەیە.
ب دیتنا من هەكە ئەم بخوازین یانە ڤەگەریتە سەرپێن خوە پێدڤییە ئەڤ كارە بهێنە كرن:
پلاندانان ستراتیژی یا دۆمدرێژ: د شیان دا نینە یانەیەكا سەركەفتی ئاڤا بكەی ل سەر بنیاتێ سەركەفتنێ د ئێك وەرز دا، پێدڤییە پلانەكا ستراتیژی ب كێمی بۆ پێنج سالان بهێتە دانان.
وەبەرهێنان د ژێرخانێ دا: ئەكادیمی سازیێن راهێنانان، ستافێ نۆشداری، هەموو پێدڤییە د ئاستەكێ بلند دابن.
شارەزایی د گرێبەستان دا: نەهەر یاریكەرەكێ بەهرەدار دێ ب كێر تیمێ هێت، پێدڤییە خواندنك بۆ پێدڤیێن تیمێ بهێتە كرن بەری ئیمزاكرنا گرێبەستان.
هەروەسا ل سەر ستافێ تەكتیكی پێدڤیە پلانا یاریكرنێ پێشڤەببەت ژبۆ رووبروبوونا هەموو تیمان، هەروەسا ژبۆ پاراستنێ ل سەر وزە و شیانێن یاریكەران و خوە دووركرن ژ هنگاڤتنان، پێدڤییە ب شێوەیەكێ بەردەوام یاریكەران ل ئێك بگوهۆرن و یاریكەرێن گەنج ژ ئەكادیمیێ بیننە ناڤا تیمێ كو دبیت زیندیبوونەكێ بێخنە تیمێ.
ژ ئالییێ دەروونی ژی ڤە، پێدڤییە ل گەل كەسێن بسپۆرێن دەروونی كار بكەن دا هاریكارییا یاریكەران بكەن ژبۆ سەرەدەریكرنێ ل گەل فشاران. ژبەركو ئەنجامێ نەرێنی كارتێكرنێ ل باوەرییا یاریكەران دكەن و پێدڤیە كار بۆ ڤەگەراندنا وێ باوەریێ بهێتە كرن ب رێكا راهێنانان، جەماوەر و پشتەڤان ژی پشكەكا سەرەكینە ژ چارەسەرییێ، پێدڤییە تێبگەهن كو ئاڤاكرنا تیمەكا ب هێز پێدڤی ب دەمی هەیە، هەروەسا پشتەڤانییا وان د رەوشێن بزەحمت دا گرنگترە ژ ئاهەنگگێرانێ ل دەمێ سەركەفتنێ.
چیرۆكا یانا دهۆكێ وانەیەكا زەلالە كو سەركەفتن نە دوماهییا رێكێ یە، بەلكو دەستپێكا چالنجێن نوویە، ڤەگوهاستن ژ یانەیەكا نۆرمال بۆ قارەمانا كەنداڤی پێدڤی ب بەخت و بەهرەیان هەیە، بەلكو پێدڤی ب كارگێرییەكا شارەزا و پلانێن ستراتیژی یێن زەلال هەیە. كریزا نها یا یانا دهۆك تێدا دەرباز دبیت نە دوماهییا چیرۆكێ یە، بەلكو دبیت دەلیڤەیەك بیت ژبۆ فێربوونێ و پێگەهشتنێ، هەكە كارگێری و ستافێ راهێنەران شیان مفا ژ سەربۆران وەرگرن، دبیت یانە ڤەگەریتە سەر هێزا خوە، ل دوماهیێ ژی تیمێن ب هێز ب دەستڤەبرنا ناسناڤان ناهێنە پیڤان، بەلكو ب شیانێن وێ ژبۆ ڤەگەریانێ ل سەر هێزا خوە پشتی كریز و قەیرانان و بەردەوامبوون ل سەر هەڤركییان ژ وەرزەكی بۆ یێ دی، یانا دهۆك همبەری تاقیكرنەكا راستەقینەیە، ئەرێ دێ مینیت قارەمانا ئێك وەرز، یان ژی دێ پرۆژەیەكی دانیت گەرەنتییا بەردەوامییێ و سەركەفتنێن دۆمدرێژ بكەت؟ بەرسڤا ڤێ پرسیارێ دێ ل رۆژێن بهێن دیار بیت، راستە رێكا گۆبیتكێ یا بزەحمەتە، لێ مانا ل گۆبیتكێ زەحمەتترە.
