رێكا 15 گوندێن دەڤەرا بەرێ گارەی هاتە گرتنڤە
ئامێدیێ، مەحمود نهێلی:
پشتی 16 رۆژان ژ چوونا وان بۆ سەر گوندان ب مەرەما ئینانا بەرهەمێن خوە یێن چاندنێ، دوبارە رێكا 15 گوندێن دەڤەرا بەرێ گارەی هاتە گرتن و هاتینە ئاگەهداركرن، كو نابیت ژ ئەڤرۆ وێڤە بچنە سەر گوندێن خوە.
ئێك ژ خەلكێ وان گوندان بۆ رۆژناما ئەڤرۆ دیار كر كو ئەو هاتینە ئاگەهداركرن، ژ ئەڤرۆ وێڤە سەرەدانا گوندێن خوە نەكەن و ئەوێن ل وێرێ مایی ژی د دەمەكێ نێزیك دا ڤەگرن و گۆت: «ئەگەرێن رێك گرتنێ ژی بۆ مە نەهاتینە دیاركرن».
رێبەر سادق، رێڤەبەرێ ناوچەدارییا دێرەلۆكێ بۆ رۆژناما ئەڤرۆ دیار كر، رێكا ڤان 15 گوندێن دەڤەرا بەرێ گارەی هاتیە گرتن یێن كو بەری نوكە رێك ب وان هاتبوو دان بچنە سەر گوندێن خوە ب مەرما ئینانا دەرامەتێ خۆ و گۆت: «هەتا نوكە دیار نەبوویە، ئەرێ دێ كەنگی رێك ڤەبیتە ڤە، بەلێ دبیت ئەڤ رێكگرتنە یا دەمكی بیت».
