رێكخراوه‌كا هوله‌ندی دێ هاریكاریا ئاواره و خوه‌جهێن پارێزگه‌ها دهۆكێ كه‌ت
ئه‌ڤرۆ:
د. عه‌لی ته‌ته‌ر، پارێزگارێ دهۆكێ دوهی 27/2/2022 ل كوچكا مێهڤانداریان پێشوازی ل (مستر پاول) و (قه‌شه مارتن) به‌رپرس و رێكخه‌رێن رێكخراوا بیزوردن نووردن یا هوله‌ندی و شاندێ د گه‌ل دا كر.
د هه‌ڤدیتنه‌كێ دا به‌حسێ به‌رنامێن رێكخراوا ناڤبری هه‌ر ژ سالا 2014ێ و ئه‌و هاریكاریێن پێشكێشی ئاواره و په‌نابه‌ران ل سنوورێ پارێزگه‌ها دهۆكێ كرین و به‌رنامێن رێكخراوێ یێن مرۆڤایه‌تی بۆ سێ سالێن بهێن هاته كرن.
پارێزگارێ دهۆكێ په‌سنا رۆلێ رێكخراوا ناڤبری كر ل دۆر ئه‌و هاریكاریێن مرۆڤایه‌تی یێن ل رۆژێن ته‌نگاڤیان بۆ ئاواره و په‌نابه‌ران و خوه‌جهێن پارێزگه‌هێ پێشكێشكرین و گوت: “چو جاران ئه‌و قه‌نجی ناهێته ژبیركرن و خواست كو رێكخراوا بیزوردن نووردن یا هوله‌ندی به‌رده‌وامیێ بده‌ته هاریكاریێن خوه، چونكو هێشتا پتر ژ 537 هزار ئاواره و په‌نابه‌ر ل سنوورێ پارێزگه‌هێ هه‌نه و پێدڤیا ب هاریكاریێن مرۆڤایه‌تی هه‌ی”.
ژلایێ خوه‌ڤه به‌رپرسێ رێكخراوا بیزوردن نووردن یا هوله‌ندی ته‌كه‌ز كر كو دێ به‌رده‌وامیێ ده‌نه به‌رنامێن خوه یێن مرۆڤایه‌تی و خزمه‌تا ئاواره و په‌نابه‌ران و خوه‌جهێن پارێزگه‌هێ دێ هێته كرن.
هه‌ژی گوتنێ یه ل حه‌فت سالێن بۆری رێكخراوا بیزوردن نووردن یا هوله‌ندی ب گوژمێ پتر ژ هه‌شت ملیۆن و 500 هزار یورۆیان هاریكاریێن مرۆڤایه‌تی پێشكێشی ئاواره و په‌نابه‌ران كرینه، وه‌كو جلك و ئاهێن خوارنێ و پێدڤیێن دی یێن ژیانێ.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ پێشوازی ل “شێخ فلات شێخ حسام” سه‌رۆكێ شاره‌دارییا پیران كر و د هه‌ڤدیتنه‌كێ دا به‌حس ل په‌یوه‌ندیێن جڤاكی و كه‌لتوری د ناڤبه‌را خه‌لكێ پارێزگه‌ها دهۆكێ و باژێرێن باكوورێ كوردستانێ دا هاته كرن و هه‌ردو لایان دۆپاتی ل خۆرتكرنا په‌یوه‌ندیان كر.
