رێكخراوەك ب گوژمێ دو ملیۆن دۆلاران دێ هاریكاریا ئاوارەیێن شنگالێ كەت
دهۆك، لەزگین جۆقی:
جێگری پارێزگارێ نەینەوا بۆ كاروبارێن ئاوارە و رێكخراوان دیار كر، رێكخراوەك دێ ب گوژمێ دو ملیۆن دۆلاران هاریكاریا شنگالێ كەت و دبێژیت: هەژمارەكا خانیان ل قوبیلەتێ چیایێ شنگالێ بۆ ئاوارەیێن دزڤڕن دێ ئاڤا كەت.
عومەر عەلی، جێگری پارێزگارێ نەینەوا بۆ كاروبارێن ئاوارە و رێكخراوان بۆ ئەڤرۆ گۆت: «رێكخراوەكا بیانی بەرنامەك بۆ شنگالێ دانایە و بڕیارە ب گوژمێ دو ملیۆن دۆلاران هەڤكاریا شنگالێ بكەت و هەژمارەكا پڕۆژەیێن خزمەتگوزاری بجهئینیت و هەژمارەكا خانیان ژی بۆ خەلكێ دزڤڕنە شنگالێ ئاڤا كەت، چاڤەرێ دهێتە كرن، ئەڤ سالە دەمێ پشتەڤانیا رێكخراوان دهێتە كرن، ئەو رێكخراو دەست ب كارێ خوە ل شنگالێ بكەت».
گۆتژی: «كار ل سەر بجهئینانا بەرنامێ رێكخراوان دهێتە كرن بۆ ڤەگەڕاندنا ئاوارەیێن شنگالێ، ب تایبەتی ژی خەلكێ گرعزێر و سیبا شێخدرێ و دەڤەرێن قوبیلەتێ چیایێ شنگالێ، كو ڤەگەڕن و نوكە كار یێ دهێتە كرن ئاوارە ڤەگەڕن».
