رێكخستنا مافێن مرۆڤی:د ناڤ حه‌فتیه‌كێ دا پتر ژ پێنجی كه‌سان ل ئیرانێ هاتینه كوشتن
ئه‌ڤرۆ:
رێكخستنا مافێن مرۆڤی یا سه‌ر ب نه‌ته‌وه‌یێن ئێكگرتی راگه‌هاند كو هێزێن ئیرانێ ل باژێرێن كوردی یێن رۆژهه‌لاتێ كوردستانێ ب چه‌كی ئێرشی خوه‌نیشاده‌ران دكه‌ن و د ئه‌نجاما ئێرشێن هێزێن ئیرانێ دا گه‌له‌ك كه‌س ل باژێرێن كوردی جانێ خوه ژ ده‌ست داینه و هه‌روه‌سا ل ده‌ڤه‌رێن دی یێن ئیرانێ ژی نها خوه‌نیشادان به‌رفره‌هتر لێ هاتینه و هێزێن ئێمناهیێ ژی ب هه‌موو شیانێن خوه ڤه كار دكه‌ن دا خه‌لكی سه‌ركوت بكه‌ت.
ئه‌و یه‌ك د ده‌مه‌كێ دایه كو دو رۆژن ئیرانێ ب چه‌كێن گران و سڤك باژێرێ مهابادێ ل رۆژهه‌لاتێ كوردستانێ دۆرپێچ كریه و گه‌له‌ك كه‌سایه‌تیێن ناڤدار یێن كورد و فارس داخواز دكه‌ن كو هه‌موو باژێرێن ئیرانێ ژ بۆ پشته‌ڤانیا مهابادێ ده‌ست ب خوه‌نیشادانان بكه‌ن، عه‌لی كه‌ریمی یاریزانێ به‌رێ یێ هه‌لبژارتیێ ئیرانێ و كه‌سایه‌تیێ ناڤدار راگه‌هاند كو نابیت خه‌لكێ باژێرێن دی یێن ئیرانێ ل هه‌مبه‌ر ره‌وشا نها ل باژێرێ مهابادێ بێده‌نگ بن، چونكی ئیرانێ دڤێت ل مهابادێ ده‌ست ب كومكوژیێ بكه‌ت دا وه‌سا خه‌لكی چاڤترسی بكه‌ن، لێ نها شورشه‌ك برێڤه دچیت و نابیت ئه‌م بێده‌نگ بین، دڤێت هه‌موو باژێرێن ئیرانێ ده‌ست ب خوه‌نیشادانان بكه‌ن و مهابادێ ب تنێ نه‌هێلن.
ل ئالیێ دی گه‌له‌ك پارتێن سیاسی یێن ئیرانێ، رێكخستنێن مافێن مرۆڤی و كه‌سایه‌تیێن ناڤدار ژی ب رێیێن جودا جودا داخواز ژ ئه‌مریكا، وه‌لاتێن ئێكه‌تیا ئۆرۆپا و هه‌موو وه‌لاتێن جیهانێ دكه‌ن كو ل هه‌مبه‌ر ره‌وشا نها ل باژێرێن رۆژهه‌لاتێ كوردستانێ بێده‌نگ نه‌مینن، چونكی چه‌ند رۆژن هێزێن ئێمناهیێ یێن ئیرانێ ب چه‌كێن گران و سڤل ئێرشی مهابادێ و چه‌ندین باژێرێن دی یێن رۆژهه‌لاتێ كوردستانێ كرینه كو مخابن هه‌تا گه‌له‌ك كه‌س بووینه قوربانی.
رێكخستنا مافێن مرۆڤی یا رۆژهه‌لاتێ كوردستانێ ژی دوهی راگه‌هاند كو نها ل مهابادێ ره‌وش گه‌له‌ك خرابه، ب هزاران هێزێن ئێمناهیێ د ناڤ باژێری دا بجه بووینه، ب سه‌دان كه‌س هاتینه ده‌سته‌سه‌ر كرن، ترۆمبێلێن سه‌ربازی ل گه‌له‌ك جهان ته‌قه ل خه‌لكی دكه‌ن و به‌رده‌وام ژی كۆپته‌رێن شه‌ری ل سه‌ر باژێری هاتنوچوونێ دكه‌ن و به‌رده‌وام ژی ته‌قه ل خه‌لكی دهێته كرن.
هه‌ژی ئاماژه‌پێدانێ یه كو زێده‌تر ژ دو مه‌هانه ل ئیرانێ و رۆژهه‌لاتێ كوردستانێ خه‌لكی ده‌ست ب خوه‌نیشادان كرینه و ب تایبه‌تی ژی ل باژێرێن رۆژهه‌لاتێ كوردستانێ خوه‌نیشادان به‌رفره‌هتر لێ هاتینه و هێزێن ئێمناهیێ ژی به‌رده‌وام ته‌قه ل خه‌لكی دكه‌ن و ب گشتی هه‌تا نها نێزیكی ٥٠٠ كه‌سان هاتینه كوشتن و هژماره‌ك زێده خه‌لك بریندارن و نێزیكی بیست هزار كه‌سان ژی هاتینه ده‌سته‌سه‌ر كرن.
