“رێككەفتنا دۆسـتینی یـا (زاخـۆ – مـورهێد) چ دگـەهینت؟
ئازاد جەهوەر
ئیمزاكرنا رێككەفتا دۆستایەتی د ناڤبەرا دو باژێران دا ژ رویێ ئەكادیمی و یاسای ڤە چ رامانەكێ ددەت، د دەما دو باژێر ب ڤی باوەریێ دگەهن و ڤێ رێكەفتنێ ئیمزا دكەن، زێدەتری ل پێخەمەت مفا وەرگرتنێ یە ژ سەربۆر و ئەزمۆنێن ئێكودو، نەخاسمە د وارێ كشتوكالی و رەوشەنبیری و كولتووری و هونەری و گەشتوگوزاری و ئابۆری و ئەندازیاریا مەدەنی و بازرگانی و پەروەردەی و هندەك وارێن دی، ئەگەر بەردەوامی ب رێكەفتنا دۆستایەتی بئێتەدان ئەنجام چنە، پاش ئیمزاكرنێ ب هەر شێوەیەك بیت ئالوگۆرا ئەزمۆن و زانیاریان و پێشداچوونان دئێتەكرن و شاندێن ل سەر ئاستێ هەردو باژێران یێن جودا جودا یێن وارێن بەحسكری سەرەدانا ئێك دكەن و هاریكار دبن د پارڤەكرنا زانیاریان دا بۆ كو بشێن د كەرتێن مەبەست لێ پێشدا بچن و پەرەپێدانەكا پیڤانەی تۆماربكن، هەروەسا جاران ئەڤ جۆرە رێكەفتنێن دئێنە ئیمزاكرن ل سەر ئاستێ دو باژێران دا كو گەلەك ب مفاترە ئەگەر دو باژێرێن دو وەلاتێن جودا بن، ژبەركو دێ شێن ژ ئاڤەدانی و دەستێ كاری یێ لۆكال بەرەف یا كولتوور و زمان و تەكولنوژیا و چاندا جودا ڤە بچن، یا گرنگ وەلاتێن وان ژی رێزێ ل وان رێكەفتنان دگرن و هاریكاری و ئاسانكاریێن مەزن دكن بۆ هەردو باژێرێن رێكەفتن ئیمزاكرین و كێماسی و پێدڤیاتێن وان دابین دكەن و ل سەر ئاستێ سەروك یان سەروك وەزیر و حوكمەتێن وان ژی كارئاسانیێن زێدەتر بو هەماهەنگییا كاركرنێ د ناڤبەرا وان هەردو باژێران دا دكەن، ئەگەر ئەم بەحسێ رێككەفتنا ڤان چەند رۆژان بكین د ناڤبەرا ئیدارا زاخۆ و یا سەر ب هەرێما كوردستانێ و باژێرێ مۆرهێد یا سەر ب ویلایەتا مینیسۆتا ل ویلایەتێن ئێكگرتی یێن ئەمریكا ڤە، هەردو باژێرێن بچویك و جوان و خودان سەرچاوەیێن ئاڤی وەك رویبار و خودان پێكەهێن مێژووی و شوینواری و ستراتیژینە، لەوما ب تایبەتی ئیدارا زاخۆ دێ شێت د گەلەك واران دا مفای ژ ڤێ رێككەفتنێ وەربگریت، ژبەركو باژێرێ بەرانبەر خودان وەلاتەك زلهێز و سەر ب پێشكەفتیترین وەلاتێ جیهانێ یە، بزاڤێن گوهدار شێخۆ سەرپەرەشتێ ئیدارا سەربەخۆیا زاخۆ ل گەل رایەدارێن جوداجودا یێن وی باژێری دێ رویەكی دی یێ خزمەتگوزاریان دەتە ئیدارا زاخۆ، ژ بەر كو نها ئەڤ ئیدارا تازە ژدایكبووی د بلندترین ئاستێ هێرس و گەرماتیا ڤەژەن و ئاڤەدانیا خوە دایە، لەوما دەڤەرا زاخۆ پێدڤی ب هەماهەنگیەكا زێدتر یا كاركرنێ هەیە د ڤێ قووناغێ دا.
