رێككەفتنەك د ناڤبەرا پارێزگەها دهۆكێ و هەرێما بادن – ڤۆتمبێرگ دا هاتە ئیمزاكرن
د. عەلی تەتەر، پارێزگارێ دهۆكێ دوهی 21/10/2025 پێشوازی ل فلوریان هاسلەر، وەزیرێ ئێكێ یێ هەرێما بادن – ڤۆتمبێرگ بۆ كاروبارێن جڤاتا وەزیران و ئالبرێت ڤون ویتكێ، قونسلێ گشتییێ وەلاتێ ئەلمانیا فیدرال ل هەرێما كوردستانێ و شاندێ د گەل دا كر.
د ڕێورەسمەكێ دا ب ئامادەبوونا جێگرێن پارێزگاری و چەند ئەندامێن پەرلەمانێ هەرێما كۆردستانێ و ئەندام پەڕلەمانێن هەرێما بادن – ڤۆتمبێرگ و سەرۆكێ زانكۆیا دهۆك ڕێكەفتنەكا گرنگ بۆ ماوێ سێ سالان د ناڤبەرا پارێزگەها دهۆكێ و هەرێما بادن -ڤۆتمبێرگ یا ئەلمانی هاتە ئیمزاكرن، كو پەیوەندـیێن ڕاستەوخۆ د بیاڤێن ئابووری، وەبەرهێنان، چاندن، ساخلەمی، خواندنا بلند، مرۆڤایەتی، وەرزشی، بازرگانی و پیشەسازی بخوڤە دگریت.
د كۆنگرەكێ ڕۆژنامەڤانی دا هەر ئێك ژ پارێزگارێ دهۆكێ و وەزیرێ ئێكێ یێ هەرێما بادن – ڤۆتمبێرگ بەحسێ گرنگیا ڕێكەفتنێ و كارێ هەڤپشك د بیاڤێن ناڤبری دا كر، هەروەسا سوپاسیا حكومەتا ئەلمانیا فیدرال و هەرێما بادن و حكومەتا هەرێما كوردستانێ دا كر كو د دەهـ سالێن بۆری دا پەیوەندیەكا دوستانە و بەردەوام د بەرژەوەندیا هەموو لایاندا هەبوویە.
