رێكکەفتنا 11 ئـادارێ بـەرهەمێ شـۆڕشـا ئیلۆنـێ بوو
بەهزاد بەهرام
رێكەفتنا 11 ئادارا سالا 1970 وەرچەرخانەكا مەزن بوو د دیرۆكا بزاڤا ڕزگاریخوازا كوردی دا كو د سەدێ بیستێ دا هاتیە رویدان، ئەڤە ژی پشتی وێ چەندێ هاتە ئارایێ دەما كو شۆرشا ئیلۆنا مەزن ب سەركێشییا بابێ روحی یێ نەتەوا كورد (مستەفا بارزانی ) و رۆلێ پیشمەرگێن قارەمان كو ب دل و گیان و روح بەرگری ژ ئاخا پیرۆزا كوردستانێ و مللەتێ كورد كری و ب هیچ شێوەیەكی دەست ژ خەبات و تێكۆشانێ و قوربانیدانێ، هەروەسا دەست ژ مافێن رەوایێن مللەتێ كورد بەرنەدای، بۆ ئەگەرا هندێ كو حوكمەتا وی سەردەمی یا ئیراقێ و حزبا بەعسا فاشیست نەچار ببن ژ بۆی دانوستاندنێ، پشتی ماوەیەكی ل سەر مێزا دانوستاندنێ ل گەل بارزانیێ نەمر كۆم ڤە دبن، هەژی گۆتنێ و ئاماژەپێكرنێ یە كو ئەڤ رێككەفتنە بەرهەمێ خورستی یێ خەبات و جانگوری و رەنجا پێشمەرگێن شۆرشا ئیلۆنا مەزنبوو ب سەركیشییا بابێ روحی یێ مللەتێ كورد0 رێكەفتنا 11 ئادارا سالا 1970 ژ 22 بڕگەیان پێكهاتبوو كو د ناڤەرركا خوە دا چەندین بابەتێن گرنگ یان ژی باشترە بێژین چەندین خال و بڕگەیێن گەوهەری تێدا رەنگڤەددان، هندەك ژ وان بڕگە و خالێن گەوهەری میناكێ لایەنێ ئیداری و سەربازی، پرسا پیشمەرگە، پرسا باژیرێن كەركووك، مووسل، شنگال و خانەقین، زمانێ كوردی، برایەتییا كورد و عەرەب، ڤەگەراندنا كوردان بۆ سەر وار و جهێ وان..هتد. كو دەربڕینێ ژ ئۆتونومیێ دكەن ژ بۆی مللەتێ كورد و كوردستانێ، ئەڤە ژی بوو ئەگەرێ دلخۆشیا هەردو نەتەوەیێن كورد و عەرەب، دوماهی ئینان ب شەڕ و ئالۆزی و دوبەرەكیێ، داكو پەیوەندیێن جڤاكی، نەتەوەیی، ئۆلی و ئایینی بەر ب باشتر ڤە بچن، هەروەسا پشتی راگەهاندنا رێكەفتنێ هەر زوی كاریگەریا ئابووری ل سەر هەمی دەڤەرێ دیاربوو، گەشەسەندنەكا بەرچاڤ ب خوە ڤە گرت، بەلێ ب مخابنی ڤە دوژمنێن مللەتێ كورد هەولا ژناڤبرنا ڤێ ریكەفتنێ دا ئەڤە ژلایەكی ڤە، ژلایەكێ دی ڤە هەر هەمان دوژمنان شیان دەستهەلاتدارێن ئیراقێ یێن وی سەردەمی رازی بكەن كو ئەڤ رێكەفتنە وەكی خوە ب هیچ شێوەیەكی نەهێتە جێبەجێكرن، ڕۆژ ب ڕۆژ ئالۆزی پتر دیار بوون، هەرچەندە مللەتێ كورد و بزاڤا رزگاریخوازا كوردی شیان ب شیوەیەكێ لۆژیكی و ژیواری سەرەدەریێ ل گەل كاودانان بكەن، بەلێ رێكەفتنەكا دی ل دژی مللەتێ كورد و كوردستانێ، دژی بزاڤا رزگاریخوازا كوردی، دژی رێكەفتنا 11 ئادارا سالا 1970 هاتە ئیمزاكرن كۆ ب ریكەفتنا جەزائێر هاتیە بناڤكرن.
