رێكێش سه‌یرانی دێ ئاهه‌نگه‌كا خێزانی ل دهۆكێ گێڕیت
ئه‌ڤرۆ،ره‌مه‌زان زه‌كه‌ریا:
سترانبێژ رێكێش سه‌یرانی، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو بڕیاربوو ئه‌ڤ ساله هژماره‌كا ئاهه‌نگا بۆ شه‌ڤا سه‌رێ سالا زایینی ل چه‌ندین وه‌لاتێن ئورۆپی ب گێریت دگه‌ل دو پارێزگه‌هێن هه‌رێما كوردستانێ، به‌لێ یێن ئورۆپا ژ به‌ر ره‌وشا كۆرۆنایێ هاتنه هه‌لوه‌شاندن و یا هه‌ولێر ژی ژ به‌ر هنده‌ك ئه‌گه‌را ناهێته گێڕان، ب تنێ ل شه‌ڤا سه‌رێ سالێ دگه‌ل هه‌لبه‌ستڤان (بورهان زێباری) دێ ل دهۆكێ ئاهه‌نگه‌كا هونه‌ری یا خێزانی سازكه‌ت و نوكه كار ل سه‌ر كۆمكرن و رێكخستنا مۆزیكه‌ژه‌نان دكه‌ت ژ به‌ر كو ئه‌و مۆزیكژه‌نێن به‌رده‌وام ل ئاهه‌نگان مۆزیكێ دژه‌نن هه‌موو بكار دكه‌ڤن.
ناڤهاتی گۆت ژی: سازكرن و ئه‌نجامدانا ڤان جۆره ئاهه‌نگان گه‌له‌ك یا گرنگه و دێ بیته ئه‌گه‌رێ دلخوه‌شیه‌كا مه‌زن بۆ وه‌لاتیان، هه‌روه‌ا هه‌ر جهێ گه‌شتیار قه‌ست بكه‌نێ دخوازن كو ئاهه‌نگ هه‌بن و پشكدار ببن، ده‌مێ گه‌شتیاره‌كێ كوردستانێ دچیته ده‌رڤه پشكداری ئاهه‌نگا دبیت ئه‌گه‌ر ئاهه‌نگ ل كوردستانێ ژی هه‌بن دێ گه‌شتیار پتر هه‌ست ب ئارامیا كوردستانێ كه‌ن و دێ مفای گه‌هیننه كه‌رتێ گه‌شتاری ژی له‌ورا هه‌بوونا ڤان ئاهه‌نگان گه‌له‌ك ب گرنگ دبینم به‌رده‌وام بهێنه گێڕان و گۆت: “ئاهه‌نگێن هونه‌ری هێمایێ بلندكرنا مورالا تاكێن جڤاكیه ب گشتی ژ لایێ ده‌رونی ڤه تاك پتر ئارام دبن، پێدڤیه وه‌زاره‌تا ره‌وشه‌نبیری و هونه‌ری پتر گرنگیێ بده‌ته ئاهه‌نگان”.
