رێكێش شه‌هباز: هونه‌ر نانی ناده‌ته مه
دهۆك، كاوین جیهاد:
ئه‌كته‌ر و ده‌رهێنه‌ر(رێكێش شه‌هباز) د دیداره‌كێ دا بۆ رۆژناما ئه‌ڤرۆ گۆت: هه‌تا نوكه ئه‌م نه‌گه‌هشتینه وی ئاستی كو رێزێ ل هونه‌ر و هونه‌رمه‌ندێن خوه بگرین.
رێكێشی گۆت: ده‌مێ ئه‌ز هاتیمه دناڤ بۆارێ هونه‌ری دا من ژ سه‌مایێ ده‌ستپێكر، ئه‌و ژی ل گه‌ل تیپا دهۆك یا هونه‌رێ مللی بوو، پاشان ئه‌ز چوومه پشكا شانۆیێ ل په‌یمانگه‌ها هونه‌رێن جوان و بۆمه شانۆڤان، ل 2003 من پشكداری د فلمێ سینه‌مایی (ئو نێرگز بشكڤین) دا كر كو ژ ده‌رهێنانا حسێن حه‌سه‌ن بوو، دووڤدا من هنده‌ك فلمێن دكیۆمه‌نتاری چێكرن، ژوانا (گه‌ریانه‌ك ل بازارێ دهۆكێ، به‌لێ ئه‌م ژی دشێین، ئاوازێن ئاخێ، فلمێ 73 كو گرێدای كاره‌ساتا شنگارێ بوو ڤی فلمی گه‌له‌ك خه‌لاتێن نێڤده‌وله‌تی وه‌رگرتن،
ل دووماهیێ گۆت: ده‌مێ مه وه‌ك ستافێ فلمێ (ره‌شه‌یا) پشكداری د فیسته‌ڤالا پۆسان ل كوریا باشۆر كری، نێزیكی پێنج هزار كه‌سان ل وێ فیسته‌ڤالێ بوون و گه‌له‌ك ژوان ل هیڤیا ئیمزایه‌كا مه‌بوون، ژبه‌ر هندێ من و هونه‌رمه‌ند حسێن حه‌سه‌ن گه‌له‌ك گری، چنكو ل وه‌لاتێ مه ئه‌و رێز ل هونه‌رمه‌ندان ناهێته گرتن و وه‌لاتێن بیانی پتر رێزێ ل مه دگرن، بۆ نموونه ل وه‌لاتێن مسرێ و ئیرانی چێكرنا فلمان پیشه‌سازیه، ئانكو ئه‌و فلمان چێدكه‌ن و دبه‌نه سینه‌ما نیشادده‌ن، خه‌لكه‌ك دهێته پێش پارا پێ وه‌ردگرن و ب وی پاره‌ی فلمه‌كێ دی چێدكه‌ن، لێ ل وه‌لاتێ مه ل شوونا سالێ ده‌ه فلم بهێنه چێكرن و نه مه‌رجه تۆ دو یان سێ فلماندا پشكدار نابی، ئانكو هونه‌ر نانی ناده‌ته مه، لێ گرنگه دراما و سینه‌ما كوردی باش بهێته چێكرن و ئاڤاكرن و كلتۆركرنا سینه‌مایێ دناڤ مه‌دا دروست ببیت و ئه‌ڤ كاره نه‌راوه‌ستیێت.
