رێكەفتنا 11 ئـادارێ .. دەستكـەفتێن دوهـی و ئـەڤـرۆ
دەولەت دۆمان
رێكەفتنا 11 ئادارێ یاكو سالا 1970 د ناڤبەرا حوكمەتا وی سەردەمیا ئیراقێ و سەركردایەتیا شۆڕشا كوردی هاتیە ئیمزاكرن ئێكە ژ وان دەستكەفتێن هەری مەزن یێن گەلێ كوردستان د چەرخێ بۆری دا، چونكو بۆ جارا ئێكێ بوو دەولەتا ئیراقێ ب شێوەیەكێ فەرمی دانپێدانێ ب مافێن كوردان بكەت، پشتی چەندین سالێن شەڕی د ناڤبەرا شۆرشا ئەیلوولا مەزن ب رێبەرایەتیا بارزانیێ نەمر و ئیراقێ، پشتی وەرگرتنا دەستهەلاتێ ژلایێ بەعسیان ڤە وان زانی نەشێن ب شەڕی شۆڕشا كوردان بێدەنگ بكەن، لەوڕا نەچاربوون رێیا دانوستانان هەلبژێرن و دەست ب دانوستانان كر دگەل شۆڕشێ، رژێمێن ئێك دویڤ یێن ئیراقێ هەر دەمێ زانبیا نەشێن ب شەڕی شۆڕشا كوردی بێدەنگ بكەن ئەڤە دەست ب دانوستانان دكر د گەل شۆڕشێ، بەلێ مخابن هەر دەمێ بهێز كەفتبان سۆزێن خۆ دشكاندن و دیسا هێرشی سەر كوردان دكر.
پشتی دو سالێن دانوستانێن بەردەوام سەركردایەتیا شۆڕشا ئەیلوولێ و دەستهەلاتدارێن ئیراقێ گەهشتنێ رێكەفتنێ شەڕ بهێتە راگرتن و لسەر چەندین خالان رێكەفتنا 11ی ئادارێ هاتە ئیمزاكرن و رۆژا 11ی ئادارا سالا 1970 بشێوەیەكێ فەرمیی ئەو رێكەفتن دچوارچوڤێ بەیانەكێ دا ژلایێ ئەحمەد حەسەن بەكر سەرۆكێ وی دەمی یێ ئیراقێ هاتە راگەهاندن، ئیراقێ د دەمێ چار سالان دا تەناهی بخۆڤە دیت و شەڕ و ئالۆزی د ناڤبەرا سەركردایەتیا كورد و دەولەتا ئیراقێ هاتنە راگرتن، رێكەفتنا 11ی ئادارێ بەلگەیەك دیرۆكیە لسەر مافێن كوردان، چونكو بۆ جارا ئێكێ بوو حوكمەتەك ل ئیراقێ دانپێدانێ ب مافێن كوردان بكەت، بێگومان بەریا رێكەفتنا بهێتە ئیمزاكرن حوكمەتا ئیراقێ چەند بڕیارەك دەركرن بۆ دەڤەرێن كوردی ژوانژی بڕیارا پارێزگەهبوونا دهۆكێ.
دەستكەفتێن رێكەفتنا 11 ئادارێ زۆرن، ژ وان ژی دانا مافێ ئۆتۆنۆمی بۆ كوردان وی سەردەمی دەستكەفتەكێ زێڕین بوو، هەروەسا كورد پشكداری حوكمەتا ئیراقێ بكەن و زمانێ كوردی بوو زمانێ فەرمی ل ئیراقێ و چالاكیێن كەلتووری و رەوشەنبیری و جەماوەری ب شێوەیەكێ بەربەلاڤ هاتنە دەستپێكرن، مخابن پشتی چار سالێن ئارامیێ مینا رژێمێن بەرێ رژێما وی سەردەمیا ئیراقێ ب هاریكاریا چەندین ولاتێن دەڤەرێ گەلەكۆمەكی ل كوردان كر و رێكەفتنا خیانەتكاریا جەزائیر هاتە ئیمزاكرن، ئەوژی بۆ نەهێلانا شۆڕشا كوردی، راستە شیان بۆ دەمەكێ كێم كوردان بێدەنگ بكەن، بەلێ هند پێنەچوو چریسكا شۆڕشا گولانێ جارەكا دی بۆ دوژمنێن كوردان سەلماند چەندین رێكەفتن و دەولەت پێكڤە دژایەتیا كوردان بكەن دێ شۆڕش هەر یا بەردەوام بیت هەتا كورد دگەهنە ئارمانجێ.
